Buying Flat: మీరు సిటీలో మంచి ఫ్లాట్ లేదా అపార్ట్ మెంట్ కొనాలని ప్లాన్ చేస్తున్నారా. భవిష్యత్ లో ఎలాంటి న్యాయపరమైన చిక్కులు రాకుండా ఉండాలంటే ఫ్లాట్ లేదా అపార్ట్ మెంట్ కొనేటప్పుడు కచ్చితంగా చెక్ చేయాల్సిన అంశాల గురించి ఇప్పుడు తెలుసుకుందాం.
రెరా:
భారత పార్లమెంట్ 2016లో రియల్ ఎస్టేట్ రెగ్యులేటరీ అథారిటీ చట్టాన్ని ఆమోదించింది. స్థిరాస్తి రంగంలో పారదర్శకతను , జవాబుదారీతనాన్ని ప్రోత్సహిస్తూ..కొనుగోలుదారుల ప్రయోజనాలను పరిరక్షించడమే లక్ష్యంగా ఈ చట్టాన్ని తీసుకువచ్చింది. రెరా చట్టం ప్రకారం డెవలపర్లు తమ ప్రాజెక్టులను రేరాలో కచ్చితంగా నమోదు చేసుకోవాలి. ప్రాజెక్ట్ ప్లాన్స్, లే అవుట్స్, ప్రాజెక్ట్ పూర్తి చేసే తేదీ వివరాలను ముందుగానే కొనుగోలుదారులకు తెలపాలి. అంతేకాదు డెవలపర్లు నిర్దిష్ట ప్రమాణాలు, మార్గదర్శకాలు పాటించాలి. ఒకవేళ డెవలపర్లు నిబంధనలను అతిక్రమిస్తే, వారికి రెరా జరిమానాలు కూడా విధిస్తుంది. మీరు అపార్ట్ మెంట్, ఫ్లాట్స్ ను కొనుగోలు చేయాలని ప్లాన్ చేస్తుంటే కచ్చితంగా రెరా వెబ్ సైట్లో నిర్మాణంలో ఉన్న ఆస్తి వివరాలను ముందుగానే చెక్ చేయాలి. ఒకవేళ మీరు దీనిపై సరైన అవగాహన లేకుంటే నిపుణుల సలహాలు తీసుకోవడం మర్చిపోవద్దు.
బిల్డింగ్ బైలాస్:
పట్టణాభివ్రుద్థి మంత్రిత్వ శాఖ ఆధ్వర్యంలోని టౌన్ అండ్ కంట్రీ ప్లానింగ్ ఆర్గనైజేషన్ కొన్ని నియమాలు, నిబంధనలను రూపొందిస్తుంది. ఈ నియమానలకు అనుగుణంగానే భవనం రూపకల్పన, ఎత్తు, నిర్మాణం, భద్రత అంశాలు ఉండాలి. కాబట్టి మీరు కొనాలని అనుకుంటున్న ఫ్లాట్ ఆ నిబంధనలకు అనుగుణంగా ఉందా లేదా అనేది చెక్ చేయాలి.
హెచ్ఓఏ:
ఒక అపార్ట్ మెంట్ లో ఎన్నో ఫ్లాట్స్ ఉంటాయి. వీటిని సక్రమంగా మెయింటైన్ చేయడానికి అందరి అవసరాలు తీర్చేందుకు, కమ్యూనిటీ నియమాలను, నిబంధనలను సక్రమంగా నిర్వహించడానికి ఒక హోం ఓనర్స్ అసోసియేషన్ అవసరం ఉంటుంది. కాబట్టి ఇంటి యజమానులు సదరు అసోసియేషన్ కు ప్రతినెలా క్రమం తప్పకుండా నిర్ణీత మొత్తాన్ని చెల్లించాల్సి ఉంటుంది.
ఓసీ:
బిల్డర్లు కట్టిన బిల్డింగ్, అపార్ట్ మెంట్, ఫ్లాట్స్ ను స్థానిక అధికారులు పరిశీలిస్తారు. తర్వాత ప్లాన్ ప్రకారం, నిబంధనలను అనుసరించి నిర్మాణం జరిగిందని తెలుపుతూ సర్టిఫికెట్ జారీ చేస్తారు. దీన్ని బిల్డర్ ఇంటి కొనుగోలుదారులకు అందిస్తాడు. ఇదే ఆక్టుపెన్సీ సర్టిఫికేట్. సదరు అపార్ట్ మెంట్, ఫ్లాట్ కు విద్యుత్, నీటి సరఫరా, డ్రైనేజీ వంటి సౌకర్యాలు అన్నీ ఉన్నాయని, కాబట్టి అది నివాసయోగ్యమేనని ఆ ఆక్యుపెన్సీ సర్టిఫికేట్ కొనుగోలుదారుడికి హామీ ఇస్తుంది.
క్లోజింగ్ ఛార్జీలు:
చాలా మందికి క్లోజింగ్ ఛార్జీల గురించి అవగాహన ఉండదు. బ్యాంకులు, బీమా సంస్థలు, న్యాయవాదులు, స్థిరాస్తి ఏజెంట్లు, పన్ను విధించే వర్గాలు, ఇంటి యజమానుల అసోసియేషన్స్ స్థిరాస్తి కొనుగోలుదారుల నుంచి కొన్ని రకాల ఫీజులు వసూలు చేస్తుంటారు. అందుకే వీటిని క్లోజింగ్ ఛార్జీలు లేదా క్లోజింగ్ కాస్ట్స్ అంటారు.
స్టాంప్ డ్యూటీ:
మీరు ఇంటిని కొనుగోలు చేసేటప్పుడు కచ్చితంగా సబ్ రిజిస్ట్రార్ ఆఫీస్ లో ఆస్తిని రిజిస్ట్రేషన్ చేయించాలి. ఎందుకంటే చట్టబద్ధమైన సేల్ డీడ్ లేకుండా ఏ రియల్ ఎస్టేట్ లావాదేవీ చెల్లుబాటు అవదు.
కార్పెట్ ఏరియా:
కార్పెట్ ఏరియా అంటే ఆస్తికి సంబంధించిన వాస్తవ వినియోగం ప్రాంతం. గోడల మందాన్ని మినహాయించి, ఇంట్లో నివసించేవారి అవసరాలకు ఉపయోగపడే ప్రాంతం. ఆస్తి విలువను ఆ కార్పెట్ ఏరియా ఆధారంగా నిర్ణయిస్తారు. కాబట్టి దీని గురించి బిల్డర్ ను ముందుగానే అడిగి తెలుసుకోవాలి. ఇక్కడ కచ్చితంగా కొన్ని విషయాలను గుర్తించుకోవాల్సి ఉంటుంది. అవి ఏంటంటే..టెర్రస్, బాల్కనీ, యుటిలిటీ ఏరియాలు వంటి ప్రాంతాలు కార్పెట్ ఏరియా కిందికి రావు
బిల్ట్ అప్ ఏరియా:
మనం ఫ్లాట్ లేదా అపార్ట్ మెంట్ కొనుగోలు చేసినప్పుడు బిల్డ్ అప్ ఏరియా గురించి కచ్చితం తెలుసుకోవాల్సిందే. ఆస్తికి సంబంధించిన బిల్డ్ అప్ ఏరియాలోనే ఇంటి కార్పెట్ ఏరియా, గోడలు, బాల్కనీ, కామన్ ఏరియాలు కూడా ఉంటాయి. మామూలుగా కార్పెట్ ఏరియా కంటే ఈ బిల్డ్ అప్ ఏరియా 15 నుంచి 25శాతం ఎక్కువగా ఉంటుంది. కాబట్టి ఈ బిల్డ్ అప్ ఏరియాను బట్టే మనం బిల్డర్లకు డబ్బులు చెల్లించాల్సి ఉంటుంది.
స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్లోడ్ చేసుకోండి.
ఆండ్రాయిడ్ లింక్ - https://bit.ly/3P3R74U
ఆపిల్ లింక్ - https://apple.co/3loQYe
)