 "Badmashulu:‘బద్మాషులు’ మూవీ రివ్యూ.. మూవీ ఎలా ఉందంటే..")
)
రివ్యూ : బద్మాషులు (Badmashulu)
నటీనటులు: మహేష్ చింతల, మురళీధర్ గౌడ్, బలగం సుధాకర్ రెడ్డి, విద్యాసాగర్ కారంపురి, కవిత శ్రీరంగం, దీక్ష కోటేశ్వర్, అన్షుమన్ తదితరులు
సంగీతం: తేజ కూనూరు
ఎడిటింగ్: గజ్జల రక్షిత్ కుమార్
సినిమాటోగ్రఫీ: వినీత్ పబ్బతి
నిర్మాతలు: B. బాలకృష్ణ, C.రామ శంకర్
దర్శకత్వం: శంకర్ చేగూరి
‘బద్మాషులు’..తెలంగాణలో మాములుగా తిట్టుకునే పదం. ఈ టైటిల్ తో వచ్చిన చిత్రమే ‘బద్మాషులు’. చింతల మహేష్, విద్యాసాగర్ కారంపురి, మురళీధర్ గౌడ్ ముఖ్యపాత్రల్లో నటించిన చిత్రం ‘బద్మాషులు’. ఇప్పటికే విడుదలైన ఈ సినిమా టీజర్, ట్రైలర్ ప్రేక్షకులను కట్టిపడేసాయి. మరి ఈ రోజు విడుదలైన ఈ సినిమా ప్రేక్షకులను ఏ మేరకు మెప్పించిందో చూద్దాం..
కథ విషయానికొస్తే..
తెలంగాణ రాష్ట్రంలోని కోతులగూడెం గ్రామానికి చెందిన బార్బర్ ముత్యాలు (విద్యాసాగర్ కారంపురి), దర్జీ తిరుపతి (మహేష్ చింతల) మంచి దోస్తులు. ఇద్దరు దొందు దొందే. పని చేయకుండా తేరగా పైసలు రావాలనే బాపతు. ఇంట్లో పెళ్లాం పిల్లలున్నా.. వారిని పట్టించుకోకుండా బగ్గా తాగే టైపు. ఊరంత అంతా కలిసి వీరిద్దరిని ‘బద్మాషులు’అని పిలుస్తుంటారు. అయినా.. దున్నపోతు పైన వాన పడినా.. పట్టించుకోని టైపు. ఓ సారి తాగేందకు వీళ్లిద్దరు డబ్బుల్లేక అదే ఊరులోని స్కూల్ ఫెన్సింగ్ వైర్ ను దొంగలిస్తూ ఉండగా పోలీసులకు దొరికిపోతారు. ఆ తర్వాత పోలీసులు పెట్టి కేసు అని వారిని ఒదిలేస్తారు. ఇదే క్రమంలో స్కూల్లోని ఓ కంప్యూటర్ దొంగతనం అవుతుంది. అందులో పూర్వ విద్యార్ధులకు సంబంధించిన డేటా ఉంటుంది. దీంతో పోలీసులు అనుమానంతో వీళ్లిద్దరిని అదుపులోని తీసుకుంటారు. అసలు స్కూల్ కంప్యూటర్ ను వీళ్లు నిజంగానే దొంగతనం చేశారా..? దాన్ని ఎవరు దొంగతనం చేశారు.. ? ఈ క్రమంలో కానిస్టేబుల్ రామచందర్ (మురళీధర్ గౌడ్) ఈ కేసును ఎలా ఛేదిస్తాడు.. ఈ కేసులో తిరుపతి, ముత్యాలు ప్రమేయం ఉందా.. ? అసలు నిజంగానే వీళ్లిద్దరు దొంగతనం చేశారా.. ? చివరకు ఏమైందనేదే ఈ సినిమా స్టోరీ.
కథనం, టెక్నికల్ విషయానికొస్తే..
ఈ కథ చూస్తుంటే.. సాధారణంగా చాలా మంది పని చేయకుండానే డబ్బులు ఎక్కువ సంపాదించాలనే కోరిక ఉంటుంది. అందుకోసం ఏం చేయడానికైనా వెనకాడని వారుంటారు. అలాంటి తరహా పాత్రలనే తన కథగా రాసుకున్నాడు దర్శకుడు శంకర్ చేగూరి. మనం కామన్ గా చూసే క్యారెక్టర్స్ నే తన సినిమాలో చూపెట్టాడు. తెలంగాణలో తాగడం అనేది ఓ సంస్కృతి. దాన్ని ఈ సినిమాలో చక్కగా తెరపై చూపించాడు. ఇందులోని పాత్రలు సహజత్వానికి దగ్గరుండేలా రాసుకున్నాడు. ఈ సినిమా చూస్తుంటే.. మన ఊర్లో జరిగిన నిజజీవిత గాథలు గుర్తుకు వస్తుంటాయి.
తెలంగాణ గ్రామీణ నేపథ్యాన్ని చూపిస్తూనే సునిశిత హాస్యాన్ని పండించడం సక్సెస్ అయ్యాడు.ముఖ్యంగా డ్రెస్ కుట్టమని ఇస్తే.. దాన్ని అమ్ముకునే తాగే టైలర్ ఓ వైపు.. సగం షేవ్ చేస్తూ మధ్యలో తాగడానికి వెళ్లే క్యారెక్టర్ మరోవైపు మనల్ని కడుపుబ్బా నవ్విస్తాయి. అక్కడ కొన్ని సీన్స్ రొటీన్ గా అనిపిస్తాయి. ఇంటర్వెల్ తర్వాత స్కూల్ కంప్యూటర్ చుట్టు తిప్పడం కాస్త విసుగు కలిగిస్తుంది. సెకండాఫ్ ను ఇంకాస్త బలంగా రాసుకుంటే బాగేండేది. తెలంగాణ పల్లె అందాలను చక్కగా తెరపై చూపించాడు. ఆర్ఆర్ పర్వాలేదు.నిర్మాణ విలువలు బాగున్నాయి.
నటీనటుల విషయానికొస్తే..
బలగం, భీమదేవరపల్లి చిత్రాల్లో నటించిన విద్యాసాగర్ ఈ చిత్రంలో చక్కటి నటన కనబరిచాడు. ఈ సినిమాతో హీరోగా ప్రమోషన్ పొందాడు. మొత్తంగా నాచురల్ గా నటించి మెప్పించాడు. బార్బర్ ముత్యాలు పాత్రలో జీవించాడు. కొన్ని చోట్ల తన ముఖకవళికలతో నవ్వించాడు. టైలర్ పాత్రలో మహేష్ చింతల నటన బాగుంటుంది. పక్కంటి కుర్రాడు తరహా పాత్రలో ఒదిగిపోయాడు. మురళీధర్ గౌడ్ తనస్క్రీన్ ప్రెజెన్స్ తో అలరించాడు. మిగిలిన నటీనటులు తమ పరిధి మేరకు రాణించారు.
పంచ్ లైన్.. నవ్వించే ‘బద్మాషులు’..
రేటింగ్..2.75/5
స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్లోడ్ చేసుకోండి.
ఆండ్రాయిడ్ లింక్ - https://bit.ly/3P3R74U
ఆపిల్ లింక్ - https://apple.co/3loQYe
Twitter, Facebook సోషల్ మీడియా పేజీలు సబ్స్క్రైబ్ చేసేందుకు క్లిక్ చేయండి.
