మీరే మాకు పెద్దన్న.. ఎప్పటికైనా మీరే నా కెప్టేన్ : విరాట్ కోహ్లీ

టీమిండియా మాజీ కెప్టేన్ మహేంద్ర సింగ్ ధోని పేరు చెబితే, అతడి గొప్పతనం గురించి తెలిసిన వాళ్లు ఎవరైనా.. ఎంతటివారైనా సాహో అనాల్సిందే. జులై 7 ఆదివారం ధోని బర్త్ డే  సందర్భంగా ఆయనకు పుట్టినరోజు శుభాకాంక్షలు చెబుతూ ఓ ప్రముఖ క్రికెటర్ కూడా ధోని భాయ్‌కి సాహో అన్నాడు. ''మీరే మా అందరికీ పెద్దన్నగా ఉంటూ వస్తున్నారు.. ఎప్పటికైనా మీరే నా కెప్టేన్'' అంటూ మహేంద్ర సింగ్ ధోనిని ఆకాశానికెత్తేశాడు. ఈ వ్యాఖ్యలు చేసింది ఎవరో కాదు.. టీమిండియా ప్రస్తుత కెప్టేన్, రన్ మెషిన్ విరాట్ కోహ్లి. అవును, ట్విటర్ ద్వారా ధోనికి తనదైన స్టైల్లో బర్త్ డే విషెస్ చెప్పిన విరాట్ కోహ్లీ.. ఆ ట్వీట్‌తో తనకు ధోనికి మధ్య వున్న అనుబంధం ఎటువంటిదో చెప్పకనే చెప్పాడు. ఇటీవల స్లో బ్యాటింగ్‌తో బాల్స్ వృథా చేస్తున్నాడంటూ సీనియర్ క్రికెటర్స్ ధోనిని విమర్శించినప్పుడు కూడా ''ధోని క్రికెట్‌లో ఓ లెజెండ్'' అంటూ ధోనికి మద్దతుగా నిలిచిన విరాట్ కోహ్లీ.. మరోసారి ధోని అంటే తనకెంత ఇష్టమో ఈ ట్వీట్ ద్వారా చాటుకున్నాడు.

ధోని గొప్పతనం గురించి, ధోనితో తనకున్న అనుబంధం గురించి విరాట్ కోహ్లీ పోస్ట్ చేసిన ట్వీట్ ప్రస్తుతం సోషల్ మీడియాలో వైరల్‌గా మారింది. కోహ్లీ ఆటకే కాదు.. కోహ్లి ట్వీట్‌కి కూడా క్రికెట్ ప్రియులు ఫిదా అయ్యారు.