Telangana Cabinet Expansion: తెలంగాణ మంత్రివర్గ విస్తరణకు మోక్షం ఎపుడో.. ! ఆశావాహుల వెయిటింగ్..?

Telangana Cabinet Expansion: గత కొన్ని రోజులు ఊరిస్తూ వస్తోన్న తెలంగాణలో కేబినెట్ విస్తరణకు ముహుర్తం ఫిక్స్ అయ్యిందా..! అవుననే సమాధానం వస్తోంది. ఈ వీకెండ్ లోనే  కేబినెట్ విస్తరణ జరగబోతోందా..! అంటే ఔననే అంటున్నారు. ఇప్పటికే మంత్రివర్గ విస్తరణకు సంబంధించి గవర్నర్‌కు సమాచారం ఇచ్చినట్టు సమాచారం. మరి మంత్రులుగా ఎవరెవరూ ప్రమాణం చేయబోతున్నారనేది ఆసక్తికరంగా మారింది.  మరోవైపు పదవులు దక్కని నేతలు.. ఆందోళనకు దిగే అవకాశం ఉండటంతో.. గాంధీ భవన్‌లో హై సెక్యూరిటీ ఏర్పాటు చేసినట్టు సమాచారం.  ఇప్పటికే కాంగ్రెస్ అధిష్టానం మంత్రివర్గ విస్తరణకు ముహూర్తం ఫిక్స్ చేసినట్లు సమాచారం. దాదాపు ఏడాదిన్నరగా ఊరిస్తున్న ఆరు మంత్రి పదవులను భర్తీ చేసేందుకు హైకమాండ్ గ్రీన్ సిగ్నల్ ఇచ్చినట్లు కాంగ్రెస్ వర్గాలు చెబుతున్నాయి. 

ఈ నేపథ్యంలో గవర్నర్‌ను కూడా ముఖ్యమంత్రి అపాయింట్ మెంట్‌ కోరినట్లు సమాచారం. ఇప్పటికే వివిధ సామాజిక సమీకరణాలు, జిల్లాల నేపథ్యాన్ని దృష్టిలో పెట్టుకుని మంత్రివర్గంలో నేతలకు చోటు కల్పించవచ్చని అంటున్నారు. మరోవైపు తెలంగాణ రాష్ట్ర వ్యవహారాల ఇంచార్జ్ మీనాక్షి నటరాజన్ కూడా నేతల నుంచి అభిప్రాయాలు తీసుకుని.. ఢిల్లీకి పంపినట్టు తెలుస్తోంది. దాంతో మంత్రి పదవులు ఆశిస్తున్న వారిలో తీవ్ర ఉత్కంఠ నెలకొంది. కేబినెట్ విస్తరణ తర్వాత కొత్త మంత్రులతో రేవంత్  మంత్రివర్గ సమావేశం నిర్వహించనున్నారు. 

ప్రస్తుతం కేబినెట్‌లో ఆరుగురికి చోటు దక్కే అవకాశం ఉంది. ఆశావాహులు మాత్రం రెండంకెల్లో ఉన్నారు. దాంతో మంత్రివర్గ విస్తరణ హైకమాండ్‌కు పెద్ద తలనొప్పిగా మారింది. చివరకు నేతల మధ్య ఏకాభిప్రాయం లేకపోవడంతో ఇన్నాళ్లు వాయిదా వేస్తూ వచ్చారు. ఎట్టకేలకు హైకమాండ్‌ మంత్రివర్గాన్ని విస్తరించాలని డిసైడ్‌ కావడంతో .. ఆశావాహుల్లో కొత్త ఆశలు చిగురిస్తున్నాయి. ప్రస్తుతం మంత్రి పదవుల కోసం ఆశపడుతున్న నేతలతో మీనాక్షి నటరాజన్ సమావేశం అయ్యారు. ఇటీవల ఎమ్మెల్సీగా అవకాశం దక్కించుకున్న ఫైర్‌ బ్రాండ్ లీడర్‌, ఎమ్మెల్సీ విజయశాంతితో దాదాపు 20 నిమిషాలు సమావేశం అయ్యారు. ఇటీవల ఏఏసీ కమిటీలోనూ విజయశాంతికి చోటు దక్కలేదు.. దాంతో ఆమెకు బీసీ కోటాలో మంత్రి పదవి దక్కొచ్చని అంటున్నారు. మరోవైపు ఎస్సీ కోటాలో ఎమ్మెల్యేలు వివేక్‌ వెంకటస్వామి, అద్దంకి దయాకర్, అడ్లూరి లక్ష్మణ్‌ కుమార్ లాంటి నేతలు పోటీ పడుతున్నారు. ఇప్పటికే దళిత ఎమ్మెల్యేలు ఐదుగురు మీనాక్షి నటరాజన్ ను కలిసి తమకు మంత్రివర్గంలో చోటు కల్పించాలని కోరారు.. 

ఇక నల్గొండ జిల్లా నుంచి కోమటిరెడ్డి రాజ్‌ గోపాల్ రెడ్డికి మంత్రి పదవి ఖాయమైందని అంటున్నారు. ఆయనకు పార్టీ మారే సమయంలోనే మంత్రి పదవిపై హామీ ఇవ్వడంతో ఆయనకు కేబినెట్‌లో చోటు దక్కొచ్చని ప్రచారం జరుగుతోంది. ఒకవేళ రాజ్‌గోపాల్ రెడ్డికి మంత్రి పదవి దక్కకపోతే మాత్రం.. మల్‌రెడ్డి రంగారెడ్డి, పరిగి ఎమ్మెల్యే రామ్మోహన్ రెడ్డి పేర్లను హైకమాండ్‌ పరిశీలించే అవకాశం ఉంది. ఆల్రెడీ కోమటిరెడ్డి బ్రదర్ వెంకట్ రెడ్డి క్యాబినేట్ లో ఉన్నారు. ఒకవేళ రాజగోపాల్ రెడ్డిని తీసుకుంటే.. ఆయన్ని పదవి నుంచి తప్పిస్తారా అనేది చూడాలి.  మరోవైపు ఆదిలాబాద్ నుంచి గడ్డం బ్రదర్స్‌లో ఒకరికి మంత్రి పదవి వరించే అవకాశం ఉందని అంటున్నారు. ఇందులో వివేక్‌కు మంత్రి పదవిపై గతంలోనే హామీ ఇచ్చారని చెబుతున్నారు. దాంతో ఆయనకు కేబినెట్లో చోటు‌ దక్కొచ్చని అంటున్నారు. ఇదే జిల్లా నుంచి మంచిర్యాల ఎమ్మెల్యే ప్రేమ్‌ సాగర్‌ రావు పేరును కూడా హైకమాండ్ పరిశీలిస్తోందట. మరోవైపు నిజామాబాబ్‌ జిల్లా నుంచి సుదర్శన్ రెడ్డికి మంత్రివర్గంలో బెర్త్ కన్‌ఫర్మ్‌ అయ్యిందని అంటున్నారు.. 

మరోవైపు ఓ మైనారిటీ నేతకు మంత్రి పదవి ఇచ్చే అవకాశం ఉందని అంటున్నారు. ఇప్పటి వరకు తెలంగాణ క్యాబినేట్ లో ముస్లిమ్ మైనారిటీలకు చోటు దక్కలేదు. ఈ నేపథ్యలో షబ్బీర్‌ అలీ, అజారుద్దీన్‌, ఎమ్మెల్సీ అమీర్‌ అలీఖాన్ పేర్లను కాంగ్రెస్ హైకమాండ్ పరిశీలిస్తోందట. అటు బీసీ కోటా నుంచి వాకిటి శ్రీహరికి మంత్రి పదవి కన్ఫామ్ అని చెబుతున్నారు. ఇదే కోటాలో ఆది శ్రీనివాస్ పేరును కూడా హైకమాండ్ సీరియస్‌గా పరిశీలిస్తోందట. ఒకవేళ మంత్రి పదవులు దక్కని నేతలకు పార్టీ పదవుల్లో అవకాశం కల్పించే చాన్స్ ఉందని అంటున్నారు. మొత్తానికి మంత్రివర్గ విస్తరణ నేపథ్యంలో.. గాంధీ భవన్‌ దగ్గర కూడా భారీ సెక్యూరిటీని ఏర్పాటు చేశారు. ఒకవేళ మంత్రి పదవులు దక్కని నేతలు.. తమ అసంతృప్తిని గాంధీ భవన్‌లో తెలిపే అవకాశం ఉండటంతోనే సెక్యూరిటీని భారీగా మోహరించినట్టు సమాచారం. ఏదీఏమైనా ఏడాదిన్నర తర్వాత విస్తరణకు గ్రీన్ సిగ్నల్ రావడంతో.. ఆశావాహుల్లో టెన్షన్ నెలకొందని సమాచారం. మంత్రివర్గ విస్తరణ నేపథ్యంలో ఇపుడున్న మంత్రుల్లో ఎవరినైనా తప్పించే సాహసం కాంగ్రెస్ పార్టీ చేస్తుందా అనేది చూడాలి. 

Also Read:  Nandamuri Heroes: నందమూరి మూడు తరాల హీరోలు కలిసి నటించిన ఈ సినిమా తెలుసా

Also Read:  NTR Sensational Record: తెలుగులో మరే ఇతర హీరోలు బ్రేక్ చేయని రికార్డు సాధించిన అన్న ఎన్టీఆర్..

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.  

ఆండ్రాయిడ్ లింక్ - https://bit.ly/3P3R74U

ఆపిల్ లింక్ - https://apple.co/3loQYe 

Twitter, Facebook సోషల్ మీడియా పేజీలు సబ్‌స్క్రైబ్ చేసేందుకు క్లిక్ చేయండి.