ശരീരത്തിൻ ഇരുമ്പിന്റെ അംശം കുറയുന്നത് വലിയ ആരോഗ്യപ്രശ്നങ്ങളുണ്ടാക്കും എന്നത് നമുക്ക് എല്ലാവർക്കും അറിയാവുന്ന കാര്യമാണ്. ശരീരത്തിന് ഏറ്റവും ആവശ്യമായിട്ടുള്ള ഒരു ധാതുവാണിത്.
ഇരുമ്പിന്റെ അംശം കുറയുമ്പോഴാണ് അനീമിയ അല്ലെങ്കിൽ വിളർച്ച എന്ന് പറയുന്ന അവസ്ഥയുണ്ടാകുന്നത്. ക്ഷീണം, തളര്‍ച്ച, ഉന്മേഷക്കുറവ്, തലക്കറക്കം, തലവേദന, വിളറിയ ചര്‍മ്മം എന്നിവയാണ് വിളര്‍ച്ചയുടെ ലക്ഷണങ്ങൾ.
ഇരുമ്പ് അടങ്ങിയ ഭക്ഷണങ്ങൾ ധാരാളം കഴിക്കുന്നതാണ് ഈ അവസ്ഥയ്ക്കുള്ള പ്രതിവിധി. ഡോക്ടർമാരെ സമീപിച്ചാൽ അയേൺ സപ്ലിമെന്റുകൾ നൽകും. എന്നാൽ ഭക്ഷണങ്ങളിലൂടെ ഒരു പരിധി വരെ ഇരുമ്പിന്റെ അംശം ഉണ്ടാക്കിയെടുക്കാനാകും.
ഇരുമ്പ് അടങ്ങിയ ഭക്ഷണം കഴിക്കുന്നതിലൂടെ രക്തത്തിലെ ഓക്സിജന്‍റെ അളവ് കൂടും. ഇവ കഴിക്കുന്നത് ഹീമോഗ്ലോബിൻ കൂടാൻ സഹായിക്കും. ഇരുമ്പ് അടങ്ങിയ ചില വിത്തുകൾ പരിചയപ്പെടാം...
ചിയ സീഡ് ഡയറ്റിൽ ഉൾപ്പെടുത്തുന്നത് വിളർച്ച തടയാൻ സഹായിക്കും. ഇതിൽ ഒമേഗ 3 ഫാറ്റി ആസിഡ്, ഫൈബര്‍, പ്രോട്ടീന്‍, കാത്സ്യം, അയേണ്‍ തുടങ്ങിയവ അടങ്ങിയിട്ടുണ്ട്. ചിയ സീഡിൽ അടങ്ങിയിട്ടുള്ള കാത്സ്യവും മഗ്നീഷ്യവും എല്ലുകളുടെ ആരോഗ്യത്തിനും നല്ലതാണ്.
ഇരുമ്പിന്റെ അംശം ധാരാളം അടങ്ങിയതാണ് മത്തന്‍ വിത്തുകള്‍. സിങ്ക്, മഗ്നീഷ്യം, വിറ്റാമിന്‍ ഇ, കെ, ആന്‍റി ഓക്സിഡന്‍റുകള്‍ എന്നിവയാല്‍ സമ്പന്നമാണ് മത്തൻ വിത്ത്. പ്രമേഹത്തെ നിയന്ത്രിക്കാനും ഹൃദയത്തിന്‍റെ ആരോഗ്യത്തിനുമെല്ലാം മത്തൻ വിത്ത് നല്ലതാണ്.
സൂര്യകാന്തി വിത്തുകളിൽ ശരീരത്തിന് ആവശ്യമായ നിരവധി പോഷകങ്ങൾ ഉണ്ട്. വിറ്റാമിന്‍ ഇ, കൊഴുപ്പുകൾ, പ്രോട്ടീൻ, നാരുകൾ, ധാതുക്കൾ എല്ലാം ഇതിൽ അടങ്ങിയിട്ടുണ്ട്
വിളർച്ചയെ തടയാൻ സഹായിക്കുന്നതാണ് ഫ്ലാക്സ് സീഡ്. ഫൈബര്‍, ഒമേഗ 3 ഫാറ്റി ആസിഡുകള്‍, ആന്‍റി ഓക്സിഡന്‍റുകള്‍ തുടങ്ങിയവ ഇതിൽ ധാരാളമായി അടങ്ങിയിട്ടുണ്ട്.
എള്ളിൽ പ്രോട്ടീന്‍, ആരോഗ്യകരമായ കൊഴുപ്പ്, ഫൈബര്‍, വിറ്റാമിനുകള്‍, കാത്സ്യം, ഇരുമ്പ്, മഗ്നീഷ്യം, മറ്റ് ആന്‍റി ഓക്സിഡന്‍റുകള്‍ എന്നിവയടങ്ങിയിട്ടുണ്ട്. വിളർച്ച തടയാൻ സഹായിക്കുന്നതാണിത്.