World Spine Day 2023: ലോക നട്ടെല്ല് ദിനം എല്ലാ വർഷവും ഒക്ടോബർ 16 ന് ആഘോഷിക്കുന്നു. നട്ടെല്ലിന്‍റെ ആരോഗ്യത്തെക്കുറിച്ച് ആളുകളെ ബോധവാന്മാരാക്കുകയും ആരോഗ്യകരവും സജീവവുമായ ജീവിതം നയിക്കാൻ അവരെ പ്രേരിപ്പിക്കുകയും ചെയ്യുക എന്നതാണ് ഈ ദിനം കൊണ്ട് ലക്ഷ്യമിടുന്നത്.
ശരീരത്തിന് നിശ്ചിത ആകൃതിയും ഉറപ്പും നല്‍കുകയും ശരീരത്തെ നിവർന്നു നില്ക്കുന്നതിനും ചലിക്കുന്നതിനും സഹായിക്കുകയും ചെയ്യുന്ന അസ്ഥികളുടെ ഒരു നിരയെയാണ് നട്ടെല്ല് എന്ന് പറയുന്നത്. കേന്ദ്ര നാഡീവ്യൂഹത്തിന്‍റെ പ്രധാന ഭാഗമായ സുഷുമ്നാ നാഡിയുടെ സംരക്ഷണകവചം കൂടിയാണ് നട്ടെല്ല്.
നമ്മുടെ ശരീരത്തിന്‍റെ മൊത്തത്തിലുള്ള ആരോഗ്യത്തിന് നട്ടെല്ലിന്‍റെ ആരോഗ്യം വളരെ പ്രധാനമാണ്. അതിനാൽതന്നെ നമ്മുടെ നട്ടെല്ലിനെ പരിപാലിക്കേണ്ടത് വളരെ പ്രധാനമാണ്.
ആരോഗ്യകരമായ ഭക്ഷണക്രമം, പതിവായ വ്യായാമം, ഇരിയ്ക്കുമ്പോഴും നില്‍ക്കുമ്പോഴും ശരിയായ രീതി പിന്തുടരുക എന്നീ കാര്യങ്ങള്‍ ശ്രദ്ധിക്കുന്നത് വഴി നട്ടെല്ലിനെ ആരോഗ്യകരമായി നിലനിർത്താം.
നട്ടെല്ലിന്‍റെ ആരോഗ്യത്തെ ബാധിക്കുന്ന ഒന്നാണ് അമിതമായ ശരീരഭാരം. പൊണ്ണത്തടി നട്ടെല്ലിന്‍റെ ആരോഗ്യത്തെ സാരമായി ബാധിക്കും. ശരീരഭാരം കൂടുന്നതുവഴി നട്ടെല്ലില്‍ ഏല്‍ക്കുന്ന സമ്മര്‍ദ്ദവും വര്‍ദ്ധിക്കുന്നു. ഇതാണ് നട്ടെല്ലിന്‍റെ ആരോഗ്യത്തെ ബാധിക്കുക.
നട്ടെല്ലിന്‍റെ ആരോഗ്യത്തെ ബാധിക്കുന്ന മറ്റൊന്നാണ് പുകവലി. ഇതില്‍ അടങ്ങിയിരിയ്ക്കുന്ന നിക്കോട്ടിന്‍ നട്ടെല്ലിലേയ്ക്ക് ഓക്സിജനും പോഷകങ്ങളും എത്തുന്നത്‌ തടസപ്പെടുത്തുന്നു.
റെഡ് മീറ്റ്‌, പ്രോസസ്ദ് ഫുഡ്‌, പഞ്ചസാര എന്നിവ അമിതമായി കഴിയ്ക്കുന്നത് നട്ടെല്ലിന്‍റെ ആരോഗ്യത്തെ ബാധിക്കും.
ഒരേ പൊസിഷനില്‍ ഏറെ നേരം ഇരിയ്ക്കുകയോ നില്‍ക്കുകയോ ചെയ്യുന്നത് നട്ടെല്ലിന്‍റെ ആരോഗ്യത്തെ സാരമായി ബാധിക്കും. അതിനാല്‍ ഇടയ്ക്ക് രണ്ട് മിനിറ്റ് നടക്കുന്നത് നട്ടെല്ലിനെ സജീവമാക്കാന്‍ സഹായിയ്ക്കും.
അല്‍പസമയം പോലും വ്യായാമം ചെയ്യാതിരിയ്ക്കുന്നത് നട്ടെല്ലിന്‍റെ ആരോഗ്യത്തെ ബാധിക്കും.