रोहित शर्माने नुकत्याच झालेल्या वर्ल्ड कप 2023 च्या स्पर्धेमध्ये भारतीय संघाचं उत्तम पद्धतीने नेतृत्व केलं.
36 वर्षीय रोहित शर्मा हा त्याच्या करिअरच्या शेवटाकडे वाटचाल करत आहे.
रोहितच्या निवृत्तीची आताच चर्चा सुरु झाली आहे. मात्र रोहितनंतर कर्णधार कोण असा प्रश्न आताच विचारला जातोय.
एम. एस. धोनीनंतर विराट कोहली हा पुढील कर्णधार होईल हे स्पष्ट होतं. मात्र सध्या असं चित्र दिसत नाही. सध्या तरी हार्दिक पंड्यापासून के. एल. राहुलपर्यंत अनेक जण कर्णधारपदावर दावेदारी सांगत आहेत.
रोहित शर्माच्या जागी दावेदारी सांगणारे नेमके कोण आहेत? या शर्यतीत कोण कोण आहे जाणून घेऊयात.
हार्दिक पंड्या मागील वर्षभरापासून टी-20 मध्ये भारताचा पर्यायी कर्णधार म्हणून पाहायला मिळाला आहे. मात्र अनेकदा तो जखमी होत असल्याने त्याच्या नावाबद्दल शंका व्यक्त केली जातेय.
के. एल. राहुलने एकदिवसीय क्रिकेट, टी-20 आणि कसोटी क्रिकेटमध्ये भारताचं नेतृत्व केलं आहे. एकदिवसीय वर्ल्ड कपमध्ये तो उपकर्णधार होता.
सूर्यकुमार यादव हा वर्ल्ड कप 2023 नंतर सुरु असलेल्या ऑस्ट्रेलियाविरुद्धच्या टी-20 मालिकेत हार्दिक पंड्याच्या अनुपस्थितीमध्ये कर्णधारपद भूषवत आहे. दक्षिण आफ्रिकेविरुद्धच्या मालिकेतही सूर्याच कर्णधार म्हणून दिसणार आहे.
इंग्लंडविरुद्धच्या 2022 च्या पाचव्या कसोटीमध्ये रोहित शर्माऐवजी जसप्रीत बुमराह हा भारतीय संघाचा कर्णधार होता. रोहित, कोहली वगळता केवळ बुमराह असा खेळाडू आहे ज्याची कसोटीमधील जागा निश्चित आहे. तो कसोटीसाठी उत्तम कर्णधार ठरु शकतो.
ऋषभ पंत जखमी होण्याआधी कसोटी क्रिकेटचा कर्णधार म्हणून शर्यतीत होता. पंत मैदानात येईल तेव्हा त्याचा नक्कीच कर्णधारपदासाठी विचार केला जाईल.