பாபர் அசாம் இதை ஏன் செஞ்சீங்க? கொதித்தெழுந்த வாசிம் அக்ரம்

ஒருநாள் உலக கோப்பை போட்டியில் பாகிஸ்தான் அணியை 7 விக்கெட் வித்தியாசத்தில் வீழ்த்தியது இந்தியா

முதலில் பேட்டிங் ஆடிய பாகிஸ்தான் அணி 191 ரன்களுக்கு ஆல் அவுட்டாகியது. கடைசி 8 விக்கெட்டுகளை வெறும் 36 ரன்களுக்குள் இழந்தது.

இதையடுத்து களமிறங்கிய இந்திய அணி 30.3 ஓவர்களில் இலக்கை எட்டி அசத்தினர். இதன் மூலம் உலகக்கோப்பை தொடரில் இந்திய அணியிடம் பாகிஸ்தான் அணி 8வது முறையாக தோல்வியடைந்தது.

இதனையடுத்து உலகக்கோப்பை தொடருக்கான புள்ளிப்பட்டியலில் இந்தியா முதலிடத்திற்கு முன்னேறியுள்ளது.

இந்தப் போட்டிக்கு பின் பாகிஸ்தான் அணியின் கேப்டன் பாபர் அசாம், இந்திய அணியின் நட்சத்திர வீரர் விராட் கோலியிடம் அவர் கையெழுத்திட்ட ஜெர்சியை பரிசாக பெற்றுக் கொண்டார்.

அகமதாபாத் மைதானத்திலேயே விராட் கோலியின் 2 ஜெர்சிக்களில் பாபர் அசாம் கையெழுத்து பெற்றது பாகிஸ்தான் ரசிகர்களிடையே விமர்சனத்தை பெற்று வருகிறது.

இதுகுறித்து வாசிம் அக்ரம் பேசுகையில், விராட் கோலியிடம் இருந்து 2 ஜெர்சியை பாபர் அசாம் வாங்கும் வீடியோவை பார்க்க முடிகிறது...

... ஆனால் பாகிஸ்தான் அணியின் மோசமான ஆட்டத்தை பார்த்து ரசிகர்கள் வருத்தத்தில் இருக்கும் போது, இப்படி வெளிப்படையாக செய்திருக்க கூடாது.

திறந்தவெளி மைதானத்தில் இப்படி ஜெர்சியை பாபர் அசாம் பெற்றிருக்கவே கூடாது என்றே சொல்லுவேன். அதற்கான நாள் இது இல்லை.

உங்களின் மாமா மகன் அல்லது உறவுக்கார பையன் கோலியின் ஜெர்சியை கேட்டிருந்தால், ஓய்வறையில் சென்று தனியாக வாங்கி இருக்கலாம்.

ஆனால் லட்சக்கணக்கான ரசிகர்கள் முன், கோடிக்கணக்கான ரசிகர்கள் தொலைக்காட்சி முன்பாக பார்க்கும் போது இப்படி செய்ய கூடாது என்று ஆவேசப்பட்டுள்ளார்.