ପାରାସିଟାମୋଲ ସମେତ ଏହି ୧୬ଟି ଔଷଧକୁ ନେଇ ଆସିଲା ବଡ଼ ଖବର

ନୂଆଦିଲ୍ଲୀ: Paracetamol, OTC Drugs: ସାଧାରଣ ଲୋକଙ୍କୁ ସରକାର ବଡ଼ ରିହାତି ପ୍ରଦାନ କରିଛନ୍ତି । ବର୍ତ୍ତମାନ ଆପଣଙ୍କୁ ମୁଣ୍ଡବନ୍ଧା କିମ୍ୱା ଜ୍ୱର ପାଇଁ ବ୍ୟବହାର କରୁଥିବା ପାରାସିଟାମୋଲ (Paracetamol) କିଣିବା ସମୟରେ ଡାକ୍ତରଙ୍କ ପ୍ରେସକ୍ରିପସନ୍ ଦେଖାଇବାକୁ ପଡ଼ିବ ନାହିଁ । ସରକାର ପାରାସିଟାମୋଲ ସମେତ ସାଧାରଣ ରୋଗ ପାଇଁ ବ୍ୟବହୃତ ୧୬ଟି ଔଷଧ ପାଇଁ  ପ୍ରେସକ୍ରିପସନର ଆବଶ୍ୟକତାକୁ ହଟାଇ ଦେଇଛନ୍ତି । ବର୍ତ୍ତମାନ ଏହି ଔଷଧଗୁଡ଼ିକ ଓଭର ଦି କାଉଣ୍ଟର ବା ସିଧାସଳଖ କ୍ୟାମିଷ୍ଟଙ୍କୁ କହି କ୍ରୟ କରିପାରିବେ ।

ସରକାର ଯେଉଁ ସବୁ ଔଷଧକୁ ସିଧାସଳଖ କ୍ୟାମିଷ୍ଟଙ୍କ ଠାରୁ କିଣିବାକୁ ଅନୁମତି ଦେଇଛନ୍ତି, ସେଥିରେ ହାଡରେ ଆଘାତ ଓ ଗଣ୍ଠି ଯନ୍ତ୍ରଣା ପାଇଁ ବ୍ୟବହୃତ ଡିକ୍ଲୋଫେନାକ (Diclofenac) ମଧ୍ୟ ସାମିଲ ରହିଛି । ଏହା ବ୍ୟତୀତ ଥଣ୍ଡା ଓ ବନ୍ଦ ନାକ ଖୋଲିବାରେ ଉପଯୋଗୀ ନେଜଲ୍ ଡିକୋଙ୍ଗେଷ୍ଟାଣ୍ଟ (Nasal Decongestants) ଔଷଧ ମଧ୍ୟ ସାମିଲ ରହିଛି । ଏହା ସହିତ ଆଣ୍ଟି-ଆଲର୍ଜି  (Anti-Allergics) ଔଷଧ ମଧ୍ୟ ଏହି ତାଲିକାରେ ଅନ୍ତର୍ଭୁକ୍ତ କରାଯାଇଛି ।

ରିପୋର୍ଟ ଅନୁସାରେ, ପାରାସିଟାମୋଲ୍, ଡିକ୍ଲୋଫେନାକ୍, ନାସାଲ୍ ଡିକୋଙ୍ଗେଷ୍ଟାଣ୍ଟ, ଆଣ୍ଟି-ଆଲର୍ଜି ଔଷଧ, ଆଣ୍ଟିସେପ୍ଟିକ୍ ଏବଂ ଡିଜେନ୍ଫେକ୍ଟାଣ୍ଟ ଏଜେଣ୍ଟ, ଜିଙ୍ଗିଭାଇଟିସ ଚିକିତ୍ସାରେ କାମକୁ ଆସୁଥିବା ମାଉଥୱାଶ୍ କ୍ଲୋରୋହେକ୍ସିଡାଇନ୍, କାଶ ଚିକିତ୍ସାରେ ବ୍ୟବହୃତ ଔଷଧ ଡେକ୍ସଟ୍ରୋମେଥୋରଫାନ୍ ହାଇଡ୍ରୋବ୍ରୋମାଇଡ୍ ଲୋଜେଞ୍ଜସ୍, ଆଣ୍ଟି ବ୍ୟାକ୍ଟେରିଆଲ ଏକ୍ନି ଫର୍ମୂଲେଶନ, ଆଣ୍ଟି-ଫଙ୍ଗଲ୍ କ୍ରିମ୍, ବନ୍ଦ ନାକ ଖୋଲିବାର ଔଷଧ, ଆନାଲେଜିକ୍ କ୍ରିମ୍ ଫର୍ମୂଲେଶନ ଏବଂ ଆଣ୍ଟି-ଆଲର୍ଜି କ୍ୟାପସୁଲକୁ ଡାକ୍ତରଙ୍କ ବିନା ପ୍ରେସକ୍ରିପସନରେ କିଣିପାରିବେ ।

ଡ୍ରଗ୍ ନିୟମ 1945କୁ ସଂଶୋଧନ କରି ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ନୂତନ ଗେଜେଟ୍ ବିଜ୍ଞପ୍ତି ଜାରି କରିଛି । ଏହି ବିଜ୍ଞପ୍ତି ସହିତ ଔଷଧ ଯାହା ପ୍ରେସକ୍ରିପସନରୁ ମୁକ୍ତ, ଡ୍ରଗ୍ ନିୟମର କାର୍ଯ୍ୟସୂଚୀ K ରେ ଅନ୍ତର୍ଭୂକ୍ତ ହେବ । ଏହି ନିୟମ ଲାଗୁ ହେବା ପରେ ଏହିପରି ଔଷଧ ବିକ୍ରୟ ପାଇଁ କ୍ୟାମିଷ୍ଟଙ୍କ ଉପରେ କୌଣସି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ।

ଡାକ୍ତରଙ୍କ ବିନା ପ୍ରେସକ୍ରିପସନରେ ଏହି ଔଷଧ ଉପଲବ୍ଧ ହେବ । କିନ୍ତୁ କିଛି ସର୍ତ୍ତ ସହିତ ବିକ୍ରୟ ଅନୁମତି ଦିଆଯାଇଛି । ଯାହାର ଚିକିତ୍ସା କିମ୍ବା ବ୍ୟବହାରର ଅବଧି ୫ ଦିନରୁ ଅଧିକ ଏହିପରି ଔଷଧକୁ ଅନୁମତି ଦିଆଯିବ ନାହିଁ । ଯଦି ଏଥିରୁ ରୋଗୀଙ୍କୁ ଆରାମ ମିଳୁ ନାହିଁ, ତେବେ ସେ ଡାକ୍ତରଙ୍କ ସହିତ ପରାମର୍ଶ କରିବା ଆବଶ୍ୟକ ।

ଏହା ବି ପଢ଼ନ୍ତୁ:-ସରକାର କର୍ମଚାରୀଙ୍କ ପାଇଁ ଖୁସି ଖବର, ମହଙ୍ଗା ଭତ୍ତାରେ ହେବ ବଡ଼ ଧରଣର ବୃଦ୍ଧି!

ବର୍ତ୍ତମାନ ଔଷଧ ଦୋକାନରେ ଏପରି ଅନେକ ଔଷଧ ଅଛି ଯାହା ଡାକ୍ତରଙ୍କ ବିନା ପ୍ରେସକ୍ରିପସନରେ ଉପଲବ୍ଧ ଅଛି । ଏଥିରେ ଅନେକ ଆଣ୍ଟିସେପ୍ଟିକ୍ ଓ ଥଣ୍ଡା ଜ୍ୱର ଔଷଧ ମଧ୍ୟ ମିଳିଥାଏ । କିନ୍ତୁ ବର୍ତ୍ତମାନ OTC ଔଷଧ ପାଇଁ କୌଣସି ନିୟମ ନାହିଁ । ବର୍ତ୍ତମାନ ସରକାର ଏହି ବ୍ୟବସ୍ଥାକୁ ନିୟମିତ କରିବାକୁ ଚେଷ୍ଟା କରୁଛନ୍ତି । ଯଦିଓ ଡାକ୍ତରଙ୍କ ପ୍ରେସକ୍ରିପସନରୁ ସରକାର ରିହାତି ଦେଇଛନ୍ତି, କିନ୍ତୁ ଡାକ୍ତରଙ୍କ ପରାମର୍ଶରେ ଆପଣ ଔଷଧ ଖାଇବାକୁ ପରାମର୍ଶ ଦିଆଯାଇଛି । ମନ ଇଚ୍ଛା ଚିକିତ୍ସା ସାଂଘାତିକ ହୋଇପାରେ ।