ସାବଧାନ! KYC କୁ ନେଇ ଆଲର୍ଟ ଜାରି କଲା RBI, ଭୁଲରେ ବି କରନ୍ତୁ ନାହିଁ ଏହି କାମ

ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (RBI) କହିଛି ଯେ ବ୍ୟାଙ୍କୁ ଏପରି ଅଭିଯୋଗ ଆସିଛି ଯେ KYC ଅପଡେଟ୍ ନାମରେ ଗ୍ରାହକଙ୍କୁ ଠକାମିର ଶିକାର ହେବାକୁ ପଡ଼ୁଛି । ଏପରି ପରିସ୍ଥିତିରେ ଦେଖାଯାଇଛି ଯେ ଫୋନ୍ କଲ, SMS, ଇମେଲ୍ ଇତ୍ୟାଦି ମାଧ୍ୟମରେ KYC କୁ ଅପଡେଟ୍ କରିବାକୁ ଗ୍ରାହକଙ୍କୁ ସେମାନଙ୍କର ବ୍ୟକ୍ତିଗତ ବିବରଣୀ, ଆକାଉଣ୍ଟ୍ / ଲଗଇନ୍ ବିବରଣୀ / କାର୍ଡ ବିବରଣୀ, PIN, OTP ଇତ୍ୟାଦି ପାଇଁ ପଚରାଯାଉଛି । ଯୋଗାଯୋଗ ମାଧ୍ୟମରେ ଏକ ଲିଙ୍କ୍ ପ୍ରଦାନ କରାଯାଇଥାଏ ଓ KYC ଅପଡେଶନ ପାଇଁ କିଛି ଅନଧିକୃତ / ଯାଞ୍ଚ ହୋଇନଥିବା ଆପ୍ଲିକେଶନକୁ ଇନଷ୍ଟାଲ କରିବାକୁ କୁହାଯାଇଥାଏ ।

RBI ଏକ ବିବୃତ୍ତିରେ କହିଛି ଯେ ବ୍ୟାଙ୍କ ଗ୍ରାହକଙ୍କୁ ଏଭଳି କମ୍ୟୁନିକେଶନ୍ସ ପଠାଯିବା ସହିତ ଧମକ ଦିଆଯାଉଛି ଯେ ଯଦି ସେମାନେ KYC ଅପଡେଟ୍ ନକରନ୍ତି, ତା’ହେଲେ ସେମାନଙ୍କ ଆକାଉଣ୍ଟ ଫ୍ରିଜ୍, ବ୍ଲକ୍ କିମ୍ବା ବନ୍ଦ ହୋଇପାରେ । ଯଦି ଗ୍ରାହକ କଲ୍, ମେସେଜ୍ କିମ୍ବା ଅବୈଧ୍ୟ ଆପ୍ ମାଧ୍ୟମରେ ତାଙ୍କ ସୂଚନା ସେ ସେୟାର କରନ୍ତି, ତେବେ ଠକଙ୍କୁ ତାଙ୍କ ଆକାଉଣ୍ଟର ଏକ୍ସେସ ମିଳିଯିବ ଓ ସେମାନେ ଗ୍ରାହକଙ୍କୁ ସହଜରେ ଠକି ପାରିବେ । କେନ୍ଦ୍ରୀୟ ବ୍ୟାଙ୍କ ଲୋକଙ୍କୁ ଏଭଳି ଠକମାନଙ୍କ ପ୍ରତି ସତର୍କ ରହିବାକୁ କହିଛନ୍ତି ।

RBI କହିଛି ଯେ ଗ୍ରାହକମାନେ ସେମାନଙ୍କର ଆକାଉଣ୍ଟ ଲଗଇନ୍ ବିବରଣୀ, ବ୍ୟକ୍ତିଗତ ସୂଚନା, KYC ଡକ୍ୟୁମେଣ୍ଟର କପି, କାର୍ଡ ସୂଚନା, ପିନ୍, ପାସୱାର୍ଡ ଏବଂ OTP ଇତ୍ୟାଦି ଅଜ୍ଞାତ ବ୍ୟକ୍ତି କିମ୍ବା ଏଜେନ୍ସି ସହିତ ସେୟାର କରିବା ଉଚିତ୍ ନୁହେଁ । ଆହୁରି ମଧ୍ୟ ଗ୍ରାହକମାନେ ବେଆଇନ କିମ୍ବା ଯାଞ୍ଚ ହୋଇନଥିବା ୱେବସାଇଟ୍ କିମ୍ବା ଆପ୍ ମାଧ୍ୟମରେ ସେମାନଙ୍କର ବିବରଣୀ ସେୟାର କରିବା ଉଚିତ୍ ନୁହେଁ । ଯଦି କୌଣସି ଗ୍ରାହକଙ୍କୁ ଏପରି ଅନୁରୋଧ ଆସେ, ତେବେ ସେ ତାଙ୍କ ବ୍ୟାଙ୍କ ଶାଖା ସହିତ ଯୋଗାଯୋଗ କରିବା ଉଚିତ୍ ।

RBI କହିଛି ଯେ ନିୟନ୍ତ୍ରିତ ସଂସ୍ଥାଗୁଡ଼ିକୁ ସମୟ ସମୟରେ KYC ଅପଡେଟ୍ କରିବାକୁ ପଡିଥାଏ କିନ୍ତୁ ଏହି ପ୍ରକ୍ରିୟା ସରଳୀକୃତ କରାଯାଇଛି । କେନ୍ଦ୍ରୀୟ ବ୍ୟାଙ୍କ କହିଛି ଯେ, ଯଦି କୌଣସି ଗ୍ରାହକଙ୍କ ଆକାଉଣ୍ଟର ପିରିୟୋଡିକ ଅପଡେଶନ ହେବାର ଅଛି ତ ଡିସେମ୍ବର ୩୧, ୨୦୨୧ ପର୍ଯ୍ୟନ୍ତ ତାଙ୍କ ଆକାଉଣ୍ଟରେ କେବଳ ଏଥିପାଇଁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ଯେପର୍ଯ୍ୟନ୍ତ କୌଣସି ରେଗୁଲେଟର କିମ୍ୱା ଇନଫୋର୍ସମେଣ୍ଟ ଏଜେନ୍ସି ବା କୋର୍ଟଙ୍କ ନିର୍ଦ୍ଦେଶ ଏପରି କରିବାକୁ ଜରୁରୀ ନ ହେବ ।

ଗ୍ରାହକଙ୍କୁ ଚିହ୍ନିବା ପାଇଁ KYC ହେଉଛି ଏକ ଉପାୟ, ଯେଉଁଥି ପାଇଁ କିଛି ଆବଶ୍ୟକୀୟ ଡକ୍ୟୁମେଣ୍ଟ୍ ଦାଖଲ କରିବାକୁ ପଡିଥାଏ । ଦାଖଲ ହୋଇଥିବା ଡକ୍ୟୁମେଣ୍ଟଗୁଡ଼ିକୁ KYC ନଥିପତ୍ର କିମ୍ବା KYC ଡକ୍ୟୁମେଣ୍ଟ୍ କୁହାଯାଏ ।

ବ୍ୟାଙ୍କର ୱେବସାଇଟରେ ଦିଆଯାଇଥିବା ସୂଚନା ଅନୁଯାୟୀ, ଏହାକୁ ନୂତନ KYC ଡକ୍ୟୁମେଣ୍ଟ ସହିତ ସମ୍ପୂର୍ଣ୍ଣ କରିବା ଆବଶ୍ୟକ । KYC ପୂରଣ ନହେବା କ୍ଷେତ୍ରରେ ଆପଣଙ୍କ ଆକାଉଣ୍ଟରେ ଭବିଷ୍ୟତରେ କାରବାର ବନ୍ଦ ହୋଇପାରେ ।