ଆଦେଶ ଜାରି ହେବା ସତ୍ତ୍ୱେ SBI ଫେରାଉନି ଆକାଉଣ୍ଟଧାରୀଙ୍କ ଠାରୁ ଆଦାୟ କରିଥିବା ୧୬୪ କୋଟି ଟଙ୍କା

ନୂଆଦିଲ୍ଲୀ: ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ (SBI) ଡିଜିଟାଲ ପେମେଣ୍ଟ ପାଇଁ ପ୍ରଧାନମନ୍ତ୍ରୀ ଜନ-ଧନ ଯୋଜନା ଆକାଉଣ୍ଟଧାରୀଙ୍କଠାରୁ ଆଦାୟ ୧୬୪ କୋଟି ଟଙ୍କାର ଅନୁଚିତ ଶୁଳ୍କ ଆଦାୟ କରିଛି, ଯାହାକୁ ବ୍ୟାଙ୍କ ଏପର୍ଯ୍ୟନ୍ତ ଫେରସ୍ତ କରିନାହିଁ । ଜନ-ଧନ ଆକାଉଣ୍ଟ ଯୋଜନା (Jan-Dhan Yojana) ଉପରେ ଆଇଆଇଟି-ମୁମ୍ବାଇ (IIT Mumbai) ଦ୍ୱାରା ପ୍ରସ୍ତୁତ ଏକ ରିପୋର୍ଟ ଅନୁଯାୟୀ, ଏହି ଶୁଳ୍କ ରାଶି ଫେରସ୍ତ ପାଇଁ ସରକାରଙ୍କ ନିର୍ଦ୍ଦେଶ ପାଇବା ପରେ ମଧ୍ୟ କେବଳ ୯୦ କୋଟି ଟଙ୍କା ଆକାଉଣ୍ଟଧାରୀଙ୍କୁ ଫେରସ୍ତ କରାଯାଇଛି । ୧୬୪ କୋଟି ଟଙ୍କା ଏପର୍ଯ୍ୟନ୍ତ ଫେରସ୍ତ ହୋଇନାହିଁ ।

ଏହି ରିପୋର୍ଟ ଅନୁଯାୟୀ, ଏପ୍ରିଲ୍ ୨୦୧୭ରୁ ସେପ୍ଟେମ୍ବର ୨୦୨୦ ମଧ୍ୟରେ ଜନ-ଧନ ଯୋଜନା ଅଧୀନରେ ଖୋଲାଯାଇଥିବା ସାଧାରଣ ସଞ୍ଚୟ ଆକାଉଣ୍ଟରୁ UPI ଓ RuPay କାରବାର ପାଇଁ SBI ମୋଟ ୨୫୪ କୋଟିରୁ ଅଧିକ ଟଙ୍କାର ଶୁଳ୍କ ଆଦାୟ କରିଛି । ଏଥିରେ ବ୍ୟାଙ୍କ ଆକାଉଣ୍ଟଧାରୀଙ୍କ ଠାରୁ ପ୍ରତ୍ୟେକ କାରବାର ପାଇଁ ୧୭.୭୦ ଟଙ୍କା ଶୁଳ୍କ ଆଦାୟ କରିଥିଲା । ଦେଶର ସର୍ବ ବୃହତ ବ୍ୟାଙ୍କ ଏ ବାବଦରେ ସ୍ପଷ୍ଟୀକରଣ ପାଇଁ ପଠାଯାଇଥିବା ପ୍ରଶ୍ନର ଉତ୍ତର ଦେଇ ନାହିଁ ।

ତଥାପି, ପ୍ରକୃତ କଥା ହେଉଛି ଯେ ଅନ୍ୟ ବ୍ୟାଙ୍କ ତୁଳନାରେ SBI ଜନ ଧନ ଆକାଉଣ୍ଟଧାରୀଙ୍କ ଦ୍ୱାରା ଡିଜିଟାଲ କାରବାର କରିବା ପାଇଁ ଚାର୍ଜ ଆଦାୟ ଆରମ୍ଭ କରିଥିଲା । ଏକ ମାସରେ ଚାରିରୁ ଅଧିକ ଟଙ୍କା ଉଠାଇବା ଉପରେ ବ୍ୟାଙ୍କ ୧୭.୭୦ ଟଙ୍କା ପ୍ରତି ଲେଣଦେଣର ଶୁଳ୍କ ଆଦାୟ କରୁଥିଲା ।

ଏସବିଆଇର ଏହି ପଦକ୍ଷେପ ସରକାରଙ୍କ ଆହ୍ୱାନ ଉପରେ ଡିଜିଟାଲ ଲେଣଦେଣ କରୁଥିବା ଜନ ଧନ ଆକାଉଣ୍ଟଧାରୀଙ୍କ ଉପରେ ପ୍ରତିକୂଳ ପ୍ରଭାବ ପକାଇଥିଲା । ଏହି ରିପୋର୍ଟ ଅନୁଯାୟୀ, ଏସବିଆଇର ଏହି ପଦକ୍ଷେପକୁ ନେଇ ଅଗଷ୍ଟ ୨୦୨୦ରେ ଅର୍ଥ ମନ୍ତ୍ରଣାଳୟରେ ଅଭିଯୋଗ କରାଯାଇଥିଲା, ଯାହା ପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । କେନ୍ଦ୍ରୀୟ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ (CBDT) ଅଗଷ୍ଟ ୩୦, ୨୦୨୦ରେ ବ୍ୟାଙ୍କଗୁଡିକ ପାଇଁ ଏହି ପରାମର୍ଶ ଜାରି କରିଛି ଯେ ଜାନୁଆରୀ ୧, ୨୦୨୦ଠାରୁ ଆକାଉଣ୍ଟଧାରୀଙ୍କଠାରୁ ଆଦାୟ କରାଯାଇଥିବା ଶୁଳ୍କକୁ ଫେରସ୍ତ କରିଦିଆଯାଉ । ଏହା ବ୍ୟତୀତ ଭବିଷ୍ୟତରେ ଏପରି କୌଣସି ଶୁଳ୍କ ଆଦାୟ ନକରିବାକୁ ମଧ୍ୟ କୁହାଯାଇଥିଲା ।