ସଚିନ ହେଲେ 'ଆଉଟ୍', ତ କଂଗ୍ରେସ ପାଇଁ ବ୍ୟାଟିଂ କରିବାକୁ ମୈଦାନକୁ ଓହ୍ଲାଇଲେ ବୈଭବ

ଜୟପୁର: ରାଜସ୍ଥାନ କଂଗ୍ରେସରୁ ସଚିନ ପାଇଲଟଙ୍କ ବିଦାୟ ପରେ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅ ବୈଭବ ଗେହଲଟ୍ ଦଳରେ ସକ୍ରିୟ ହେଉଛନ୍ତି । ଆଜି(ଶନିବାର) ଜୟପୁରରେ କଂଗ୍ରେସର ବିରୋଧ ପ୍ରଦର୍ଶନ କାର୍ଯ୍ୟକ୍ରମରେ ବୈଭବ ପହଞ୍ଚିଛନ୍ତି । କଂଗ୍ରେସ ଆଜି ସମଗ୍ର ରାଜ୍ୟର ଜିଲ୍ଲା ମୁଖ୍ୟାଳୟରେ ବିଜେପି ବିରୋଧରେ ପ୍ରଦର୍ଶନ କରୁଛି । କଂଗ୍ରେସ ଅଭିଯୋଗ କରିଛି ଯେ, ଗଣତନ୍ତ୍ର ଦ୍ୱାରା ନିର୍ବାଚିତ ସରକାରକୁ ହଟାଇବାକୁ କେନ୍ଦ୍ରରେ ଥିବା ବିଜେପି ସରକାର ଚେଷ୍ଟା କରୁଛି । ଏହା ଗଣତାନ୍ତ୍ରିକ ମୂଲ୍ୟବୋଧର ହତ୍ୟା ।

ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅ ଜୟପୁରରେ ବିକ୍ଷୋଭ ପ୍ରଦର୍ଶନ କରି ବିଜେପି ଉପରେ ଆକ୍ରମଣ କରିଛନ୍ତି । ବୈଭବ କଂଗ୍ରେସର ସାଧାରଣ ସମ୍ପାଦକ କିନ୍ତୁ ଦଳର ଧାରଣାରେ କେବେ ଆସୁ ନଥିଲେ । ସଚିନ ପାଇଲଟଙ୍କ ବିଦାୟ ପରେ ସେ ଦଳର କାର୍ଯ୍ୟକ୍ରମରେ ପହଞ୍ଚିଛନ୍ତି ।

ମଞ୍ଚରୁ ବିଜେପିକୁ ଟାର୍ଗେଟ କରି ବୈଭବ କହିଛନ୍ତି ଯେ, ଗଣତାନ୍ତ୍ରିକ ଉପାୟରେ ନିର୍ବାଚିତ ସରକାରକୁ ହଟାଇବାକୁ ବିଜେପି କିପରି ଚେଷ୍ଟା କରୁଛି ଆପଣ ଦେଖୁଛନ୍ତି । ଅଶୋକ ଗେହଲଟ୍ ସରକାର ବିଷୟରେ ଉଲ୍ଲେଖ କରି ବୈଭବ କହିଛନ୍ତି ଯେ, ଏହା ଏକ ସରକାର ଯିଏକି କୋରୋନା ସହିତ ଲଢ଼ିବାରେ ବହୁତ ଭଲ କାମ କରିଛନ୍ତି । ଏହା ଅତ୍ୟନ୍ତ ଚିନ୍ତାଜନକ ଯେ କୋରୋନା ମହାମାରୀର ମୁକାବିଲା ପାଇଁ ସରକାର ନିଜର ସମସ୍ତ ଶକ୍ତି ଲଗାଇଛନ୍ତି । ଅନ୍ୟପକ୍ଷେ ସେହି ସରକାରକୁ କେନ୍ଦ୍ର ହଟାଇବାକୁ ଚାହୁଁଛନ୍ତି ।

ସୂଚନାଯୋଗ୍ୟ, ବୈଭବ ଗେହଲଟ୍ ହେଉଛନ୍ତି ରାଜସ୍ଥାନ କ୍ରିକେଟ୍ ଆସୋସିଏସନର ସଭାପତି । ଅକ୍ଟୋବର ୨୦୧୯ରେ, ଯେତେବେଳେ ବୈଭବ ରାଜସ୍ଥାନ କ୍ରିକେଟ୍ ଆସୋସିଏସନର ସଭାପତି ପଦ ପାଇଁ ପ୍ରତିଦ୍ୱନ୍ଦ୍ୱିତା କରୁଥିଲେ, ସେତେବେଳେ ସଚିନ ପାଇଲଟ୍ ମଧ୍ୟ ଏହାକୁ ବିରୋଧ କରିଥିଲେ । ପାଇଲଟ କହିଥିଲେ ଯେ, ସମଗ୍ର ଘଟଣା ଦଳର ଭାବମୂର୍ତ୍ତି ଉପରେ ନକାରାତ୍ମକ ପ୍ରଭାବ ପକାଇବ ।