ଯେଉଁ ବିଧାୟକ ଜନତାଙ୍କ ଆଗରେ କାନ୍ଦି କାନ୍ଦି ଉଦ୍ଧବଙ୍କ ପାଇଁ ମାଗିଥିଲେ ସମର୍ଥନ, ସେ ମଧ୍ୟ ସିନ୍ଦେ ଗୋଷ୍ଠୀରେ ହେଲେ ସାମିଲ

ମୁମ୍ୱାଇ: Maharashtra Politics: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଆସ୍ଥା ଭୋଟରେ ବିଜୟ ଲାଭ କରିଛି । ଏହା ପୂର୍ବରୁ ଉଦ୍ଧବ ଠାକରେଙ୍କୁ ଆଉ ଏକ ଝଟକା ଲାଗିଥିଲା । ବାସ୍ତବରେ, ଠାକରେ କ୍ୟାମ୍ପରେ ସାମିଲ ଅନ୍ୟ ଜଣେ ଶିବସେନା ବିଧାୟକ ସିନ୍ଦେ କ୍ୟାମ୍ପରେ ଯୋଗ ଦେଇଛନ୍ତି । ଗତକାଲି ବିଳମ୍ବିତ ରାତିରେ ବିଧାୟକ ସନ୍ତୋଷ ବାଙ୍ଗର (Santosh Bangar) ମୁମ୍ବାଇର ହୋଟେଲକୁ ଯାଇଥିଲେ, ଯେଉଁଠାରେ ନୂତନ ମୁଖ୍ୟମନ୍ତ୍ରୀ ସିନ୍ଦେ (Eknath Shinde) ନିଜ ସମର୍ଥକ ବିଧାୟକଙ୍କ ସହ ରହିଥିଲେ । କୌତୁହଳର ବିଷୟ, ସିନ୍ଦେଙ୍କ ସାଥ୍ ଦେଇଥିବା ବିଧାୟକ ସନ୍ତୋଷ ବାଙ୍ଗର ପ୍ରାୟ ଏକ ସପ୍ତାହ ପୂର୍ବେ ହିଁ ଉଦ୍ଧବ ଠାକରେ (Uddhav Thackeray) ଙ୍କ ସମର୍ଥନରେ ସମସ୍ତଙ୍କ ଆଗରେ କାନ୍ଦିଥିଲେ ।

ଜୁନ ୨୪ରେ ଯେତେବେଳେ ଉଦ୍ଧବ ଠାକରେ ବିଧାୟକମାନଙ୍କୁ ଏକନାଥ ସିନ୍ଦେଙ୍କ ବିଦ୍ରୋହୀ ଗୋଷ୍ଠୀରେ ଯୋଗଦେବାକୁ ଅଟକାଉଥିଲେ, ସେହି ସମୟରେ ସନ୍ତୋଷ ବାଙ୍ଗର ଠାକରେଙ୍କ ସମର୍ଥନରେ ଏକ ଭିଡିଓ ପୋଷ୍ଟ କରିଥିଲେ, ଯେଉଁଥିରେ ସେ ନିଜ ନିର୍ବାଚନମଣ୍ଡଳୀରେ ଲୋକମାନଙ୍କ ଆଗରେ କାନ୍ଦୁଥିବାର ଦେଖାଯାଇଥିଲା ।

ଭିଡିଓରେ ବାଙ୍ଗର ଠାକରେଙ୍କ ପ୍ରତି ତାଙ୍କର ଆନ୍ତରିକତା ପ୍ରଦର୍ଶନ କରୁଥିବା ନଜର ଆସିଛନ୍ତି । ସେ ଏହି ବିଦ୍ରୋହକୁ ବିଶ୍ୱାସଘାତକତା ବୋଲି କହିଥିଲେ ଓ ଏକନାଥ ସିନ୍ଦେଙ୍କୁ ଫେରିବାକୁ ଅନୁରୋଧ କରିଥିଲେ । ତାଙ୍କ ପାଖରେ ବସିଥିବା ଜଣେ ସମର୍ଥକ ରୁମାଲରେ ତାଙ୍କ ଗାଲକୁ ପୋଛୁ ଥିବାର ନଜରକୁ ଆସିଛି । ବାଙ୍ଗର କହିଛନ୍ତି, "ବାଲାସାହେବ ଠାକରେ, ଉଦ୍ଧବ-ଜୀ ଠାକରେ, ଆପଣ ଆଗକୁ ବଢ଼ନ୍ତୁ, ଆମେ ତୁମ ସହିତ ଅଛୁ ।"

ଏହା ବି ପଢ଼ନ୍ତୁ:-ଆଦିତ୍ୟ ଠାକରେଙ୍କ ଯିବ ବିଧାୟକ ପଦ!

ଏହା ବି ପଢ଼ନ୍ତୁ:-ସିନ୍ଦେ ସରକାରଙ୍କ ଭବିଷ୍ୟତକୁ ନେଇ ବଡ଼ ବୟାନ ଦେଲେ ସଞ୍ଜୟ ରାଉତ

ଏହା ବି ପଢ଼ନ୍ତୁ:-ସଞ୍ଜୟ ରାଉତଙ୍କ ବିରୋଧରେ ଜାରି ହେଲା ୱାରେଣ୍ଟ

ଅନ୍ୟପଟେ, ଆଜି ସିନ୍ଦେ ଆସ୍ଥା ଭୋଟରେ ବିଜୟ ହାସଲ କରିଛନ୍ତି । ବିଧାନସଭାରେ ୧୬୪ ଜଣ ବିଧାୟକ ସିନ୍ଦେ ସରକାରଙ୍କୁ ସମର୍ଥନ କରିଛନ୍ତି । ବାଚସ୍ପତିଙ୍କ ଭୋଟ୍ ଗଣନା କରାଯାଇ ନଥିଲା, ନଚେତ୍ ଏହି ଭୋଟ୍ ୧୬୫ ହୋଇଥାନ୍ତା । ସେପଟେ ବିରୋଧୀ ସପକ୍ଷରେ ୯୯ ଭୋଟ ପଡ଼ିଛି । ଏହା ବ୍ୟତୀତ ମହାବିକାଶ ଅଘାଡ଼ିର ୮ ବିଧାୟକ ଭୋଟିଂ ସମୟରେ ଅନୁପସ୍ଥିତ ଥିଲେ ।

ସେପଟେ ଏନସିପି ମୁଖ୍ୟ ଶରଦ ପାୱାର ଏକ ବଡ଼ ବୟାନ ଦେଇ କହିଛନ୍ତି ଯେ, ମହାରାଷ୍ଟ୍ରରେ ମଧ୍ୟବର୍ତ୍ତୀକାଳୀନ ନିର୍ବାଚନର ସମସ୍ତ ସମ୍ଭାବନା ଅଛି । ଶିବସେନାର ବିଦ୍ରୋହୀ ନେତା ଏକନାଥ ସିନ୍ଦେଙ୍କ ନେତୃତ୍ୱରେ ଗଠନ ହୋଇଥିବା ସରକାର ପାଞ୍ଚରୁ ୬ ମାସରେ ଭାଙ୍ଗି ପାରେ । କୁହାଯାଉଛି ଯେ ଏନସିପି ବିଧାୟକ ତଥା ଦଳର ନେତାମାନଙ୍କୁ ସମ୍ବୋଧିତ କରିବାବେଳେ ଶରଦ ପାୱାର ଏସବୁ କହିଛନ୍ତି । ଶରଦ ପାୱାରଙ୍କ ସମ୍ୱୋଧନରେ ସାମିଲ ଜଣେ ନେତା କହିଛନ୍ତି ଯେ, ମହାରାଷ୍ଟ୍ରରେ ନୂତନ ଭାବେ ଗଠିତ ସରକାର ଆଗାମୀ ୫ରୁ ୬ ମାସ ମଧ୍ୟରେ ଭାଙ୍ଗି ପାରେ, ଯେଉଁଥିପାଇଁ ଆମେ ସମସ୍ତ ବିଧାୟକ ଓ ନେତାମାନଙ୍କୁ ମଧ୍ୟବର୍ତ୍ତୀକାଳୀନ ନିର୍ବାଚନ ପାଇଁ ପ୍ରସ୍ତୁତ ହେବାକୁ କହିଛୁ ।