ମରିଗଲା ମାନବିକତା: ବୃଦ୍ଧଙ୍କୁ ପିଟି ମାରିଦେଲେ ସମ୍ପର୍କିୟ ଭାଇ, ଆଖି ବୁଜିଦେଲେ ଦେଖଣାହାରୀ

ବୌଦ୍ଧ(ହିମାଂଶୁ ଶେଖର ସାହୁ): ବୌଦ୍ଧ ଜିଲା ପୁରୁଣାକଟକ ଲୁଣିବାହାଲ ବଜାରରେ ଘଟିଛି ଏକ ବିଭତ୍ସ ହତ୍ୟାକାଣ୍ଡ। କଇଁଚି ଓ କାଠ ଫାଳିଆ ସାହାଯ୍ୟରେ ବାପପୁଅ ମିଶି ସମ୍ପର୍କୀୟ ଭାଇଙ୍କୁ ଆତର୍କିତ ମରଣାନ୍ତକ ଆକ୍ରମଣ କରି ହତ୍ୟା କରିଛନ୍ତି। ହତ୍ୟା ପରେ ଉଭୟ ବାପପୁଅ ଫେରାର ମାରିଥିଲେ। ଘଟଣା ଘଟୁଥିବାବେଳେ ଲୋକେ ସାହାଯ୍ୟ କଣ କରିବେ ଦୋକାନ ବଜାର ବନ୍ଦ କରିଦେଇଥିଲେ। ସୁନସାନ ହୋଇଗଲା ଲୁଣିବାହାଲ ବଜାର। ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତାରେ ପଡି ଛଟପଟ ହେଉଥିଲେ ଲୁଣିବାହାଲ ପଞ୍ଚାୟତ ଯୁବରାଜପୁର ଗ୍ରାମର ଝରିଆ ବାରିକ । କିଛି ବ୍ୟକ୍ତି ତାଙ୍କୁ ଉଦ୍ଧାର କରି ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । 

ସୁଚନା ଥାଉ କି ଯୁବରାଜପୁର ଗ୍ରାମର ଝରିଆ ବାରିକ ସାଥିରେ ଗାଇ ଗେଣ୍ଡାଳିଆ ଡାଳ ନେଇ ବଜାରକୁ ବିକ୍ରି କରିବାକୁ ଆସିଥିଲେ। ବିକ୍ରି କରୁଥିବା ସମୟରେ ଝରିଆ ବାରିକଙ୍କ ନିଜ ଗାଁର ନିଜ ସମ୍ପର୍କିୟ ଭାଇ ସୁବାସ ବାରିକ ଓ ପୁତୁରା ଅସିତ ବାରିକ ତାଙ୍କୁ କଇଁଚି ଓ କାଠ ଫାଳିଆରେ ଆତର୍କିତ ଆକ୍ରମଣ କରିଥିଲେ। ଝରିଆ ବାରିକ ଓ ସୁବାସ ବାରିକଙ୍କ ମଧ୍ୟରେ ଜମି ବିବାଦକୁ କେନ୍ଦ୍ର କରି ବହୁ ଦିନରୁ ଦୁଇ ପରିବାର ମଧ୍ୟରେ ଶତୃତା ଲାଗି ରହୁଥିଲା । ହେଲେ ଆଜି ଝରିଆ କୁ ବଜାରରେ ଏକା ଦେଖିବା ପରେ ବାପପୁଅ ମିଶି ଆକ୍ରମଣ କରିଥିବା ଜଣାପଡିଛି । ଆକ୍ରମଣ କରିବା ପରେ ବାପପୁଅ ଦୁହେଁ ସରସରା ଫେରାର ମାରିଥିବାବେଳେ ପୁରୁଣାକଟକ ପୋଲିସ ସରସରା ରୁ ଦୁଇ ଅଭିଯୁକ୍ତକୁ ଗିରଫ କରିଥିବା ଜଣାପଡିଛି । 

ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ଝରିଆ ବାରିକଙ୍କ ମୃତ ଶରୀରକୁ ଜବତ କରି ପୋଷ୍ଟବଟମ ପାଇଁ ବୌଦ୍ଧ ମୁଖ୍ୟ ଡାକ୍ତରଖାନାକୁ ପଠାଇବା ସହିତ ହତ୍ୟାକାଣ୍ଡର ଅଧିକ ତଦନ୍ତ ଯାରି ରହିଥିବା ନେଇ ସୁଚନା ଦେଇଛନ୍ତି ପୁରୁଣାକଟକ ଥାନା ଅଧିକାରୀ