Ollywood News: ବରିଷ୍ଠ ନିର୍ଦ୍ଦେଶକ ତୃପ୍ତି ବିଶ୍ୱାଳଙ୍କ ଦେହାନ୍ତ: ଓଡ଼ିଆ କଳାକାରଙ୍କ ଶୋକ

Ollywood Director Trupti Biswal: ସିରିଏଲ, ସିନେମା ଏବଂ ଯାତ୍ରା ରଙ୍ଗମଞ୍ଚରେ ଆପଣଙ୍କ ପାଇଁ ମନରଞ୍ଜନର ଖୋରାକ ତିଆରି କରୁଥିବା ବରିଷ୍ଠ ନିର୍ଦ୍ଦେଶକ ତୃପ୍ତି ବିଶ୍ୱାଳଙ୍କ ଦେହାନ୍ତରେ ଓଲିଉଡର ଶୋକ ।

Ollywood Director Trupti Biswal: ଆରପାରିରେ ଓଡ଼ିଆ ସିନେମା, ଯାତ୍ରା, ଓ ଧାରାବାହିକର ଲୋକପ୍ରିୟ (Famous Director) ନିର୍ଦ୍ଦେଶକ ତୃପ୍ତି ବିଶ୍ୱାଳ । ଗତକାଲି ଏକ ମଟର ସାଇକେଲ ଦୁର୍ଘଟଣାର ଶିକାର ହୋଇ କଟକ ସ୍ଥିତ ଏକ ବେସରକାରୀ ହସ୍ପିଟାଲ (Private Hospital)ରେ ଚିକିତ୍ସିତ ହେଉଥିଲେ । ଡାକ୍ତରଙ୍କ ସମସ୍ତ ଚେଷ୍ଟା ସତ୍ୱେ ଆଜି ତାଙ୍କର ପରଲୋକ ଘଟିଛି । ତୃପ୍ତି ବିଶ୍ୱାଳଙ୍କ ପରଲୋକ ଖବର ପ୍ରଚାରିତ ହେବାପରେ ଓଲିଉଡ, ଜଲିଉଡ ଓ ଧାରାବାହିକ ଜଗତରେ ଶୋକର ଛାୟା ଖେଳିଯାଇଛି ।

ବରିଷ୍ଠ ନିର୍ଦ୍ଦେଶକ ତଥା ଖଳନାୟକ ଭୂମିକାରେ ଘରେ ଘରେ ପରିଚିତ ଥିବା ଆପଣଙ୍କ ପ୍ରିୟ ଅଭିନେତା ହର ପଟ୍ଟନାୟକ (Hara pattnaik)ଙ୍କ ସହ ତୃପ୍ତି ବିଶ୍ୱାଳ କାମ ଆରମ୍ଭ କରିଥିଲେ । ଦୂରଦର୍ଶନରେ ପ୍ରସାରିତ ଲୋକପ୍ରିୟ ଧାରାବାହିକ 'ସୁନା କଳସ'ରେ ସେ ନିର୍ଦ୍ଦେଶନାର ଭାର ସମ୍ଭାଳିଥିଲେ । ଏଥିସହ ଆହୁରି ଅନେକ ଲୋକପ୍ରିୟ ସିରିଏଲରେ ତୃପ୍ତି କାମ କରିଥିଲେ । 'ଜୟ ଶ୍ରୀରାମ' ଚଳଚ୍ଚିତ୍ରରେ ମଧ୍ୟ ସେ ନିର୍ଦ୍ଦେଶନା ଦେଇଥିଲେ । କେବଳ ସେତିକି ନୁହେଁ, ଯାତ୍ରା ଜଗତରେ ମଧ୍ୟ ସେ ସ୍ୱତନ୍ତ୍ର ଛାପ ଛାଡିଯାଇଛନ୍ତି । 'କେମିତି କହିବି ଏମିତି କଥା', 'ଏତେ ସରି ତତେ କିଏ କଲା' 'କେମିତି କହିବି ଏମିତି କଥା' 'ମିଛୁଆ ରାଧୁଆ ଗପ ସରିଲା' ପରି ଆହୁରି ଅନେକ ସୁପରହିଟ୍ ଯାତ୍ରା ଆଜି ବି ଲୋକଙ୍କର ପ୍ରିୟ ହୋଇ ରହିଛି । ଅନେକ ବରିଷ୍ଠ କଳାକାରଙ୍କୁ ନେଇ ସେ ସିନେମା ଓ ସିରିଏଲରେ କାମ କରିଥିଲେ । ଅନେକ ନବ ପ୍ରତିଭାକୁ ସେ ନିଜ ସିରିଏଲରେ ସୁଯୋଗ ମଧ୍ୟ ଦେଇଥିଲେ । ତାଙ୍କ ବିୟୋଗରେ ଆଜି ପୁରା ଓଡ଼ିଆ ମନୋର଼ଞ୍ଜନ ଜଗତ ଶୋକ ପ୍ରକାଶ କରୁଛି ।