ସୀମାରେ କମିଛି ଚୀନ ସହ ସଂଘର୍ଷ: ଭାରତୀୟ ସେନା
ସୀମାରେ ଚୀନ ସଂଘର୍ଷ କମ ହୋଇଥିବା ନେଇ ଜଣାଇଛି ଭାରତୀୟ ସେନା |
ନୂଆଦିଲ୍ଲୀ: ଲଦାଖ ସୀମାରେ ସମୟ ସମୟରେ ଚୀନ ସହ ହେଉ ଥିବା ସଂଘର୍ଷ ହ୍ରାସ ପାଇଥିବା ନେଇ ଭାରତୀୟ ସେନା ପକ୍ଷରୁ କୁହାଯାଇଛି | ଚଳିତ ବର୍ଷ ମେ ପ୍ରଥମ ସପ୍ତାହରେ ଉଭୟ ଦେଶର ସେନା ମଧ୍ୟରେ ହେଉଥିବା ମୁହାଁମୁହିଁ ଭଳି ପରିସ୍ଥିତି କମିଛି | ପୂର୍ବ ଲଦାଖର ପେଙ୍ଗାମ ହ୍ରଦ ଅଞ୍ଚଳରେ ଭାରତ ଏବଂ ଚୀନ ନିଜ ଅଧିନସ୍ଥ କ୍ଷେତ୍ରରେ ଉପସ୍ଥିତି ଜାରି ରଖିବା ସହ ସେନା ମୁତୟନକୁ ବଢାଇ ଦେଇଛନ୍ତି|
ଏଲଓସି ନିକଟରେ ଏକ ଚାଇନିଜ ହେଲିକପ୍ଟର ଉଡୁଥିବାର ଦେଖାଯିବା ପରେ ସେଠାକୁ ତତକ୍ଷଣାତଚ ଯୁଦ୍ଧ ବିମାନ ପଠାଇଥିଲା ଭାରତୀୟ ବାୟୁସେନା | ପୂର୍ବ ଲଦାଖରେ ଅବସ୍ଥିତ ଥିବା ପେଙ୍ଗାମ ହ୍ରଦ ନିକଟରେ ଗତ ଫବୃଆରୀରୁ ଆରମ୍ଭ ହୋଇଥିଲା ବିବାଦ | ଏଠାରେ ଅବସ୍ଥିତ ଫିଙ୍ଗର ୨ ଅଞ୍ଚଳକୁ ଭାରତୀୟ ସୈନ୍ୟଙ୍କ ଯିବା ଆସିବା ଉପରେ ରୋକ ଲଗାଇଥିଲା ଚୀନ | ଏହା ୫ଟି ପାହାଡିଆ ହ୍ରଦ ପର୍ଯ୍ୟନ୍ତ ଯାଇଛି ଯାହା ଫିଙ୍ଗର 1ରୁ ଫିଙ୍ଗର 5 ଭାବେ ଜଣାଶୁଣା |
ଫିଙ୍ଗର ୨ ଅଞ୍ଚଳରେ ସଡକ ନିର୍ମାଣ ହୋଇସାରିଛି | ଯେଉଁଥିରେ ଭାରତୀୟ ସୈନ୍ୟଙ୍କ ଗାଡି ଯିବା ଆସିବା କରିଥାଏ | ଗତ ମାସର ଶେଷ ସପ୍ତାହରେ ଉଭୟ ଚୀନ ଏବଂ ଭାରତ ନିଜର ସୈନ୍ୟ ଉପସ୍ଥିତିକୁ ବୃଦ୍ଧି କରିଥିଲେ | ଚଳିତ ମାସ ୫-୬ ମଧ୍ୟରାତ୍ରୀରେ ଦୁଇ ଦେଶରେ ସୈନିକଙ୍କ ମଧ୍ୟରେ ସାମ୍ନାସାମ୍ନି ହୋଇଥିଲା | ଭାରତୀୟ ସୈନ୍ୟଙ୍କ ପକ୍ଷରୁ ନିଜ ଅଧିନସ୍ଥ କ୍ଷେତ୍ର ମଧ୍ୟରେ କୌଣସି ଏକ ନିର୍ମାଣ କାର୍ଯ୍ୟ କରୁଥିବା ବେଳେ, ଯାହାର ବିରୋଧ କରିଥିଲେ ଚାଇନିଜ ସୈନ୍ୟ | ଯାହାକୁ ନେଇ ଉଭୟ ଦେଶର ସୈନିକଙ୍କ ମଧ୍ୟରେ ବିବାଦ ବଢିବାରୁ ହାତାହାତି ପରିସ୍ଥିତି ଉପୁଜିଥିଲା | ଯେଉଁଥିରେ କେତେକ ସୈନିକ ଘାୟଲ ହୋଇଥିଲେ |
ଏ ଘଟଣା ପରେ ଉଭୟ ଚାଇନା ଏବଂ ଭାରତୀୟ କମାଣ୍ଡର ବିବାଦର ସମାଧାନ କରିଥିଲେ | ପରେ ପରେ ନିଜ ନିଜ ସ୍ଥାନରେ ମୁତୟନ ହୋଇଥିଲେ ଉଭୟ ଦେଶର ସେନା | ନିକଟରେ ଏକ ଚାଇନିଜ ହେଲିକପ୍ଟର ଏଲଓସି ନିକଟରେ ଦେଖାଯାଇଥିଲା | ଏ ଘଟଣା ସମ୍ପର୍କରେ ଜଣାପଡିବା ପରେ ଭାରତୀୟ ବାୟୁସେନାର ୨ ସୁଖୋଇ-30 ଯୁଦ୍ଧ ବିମାନ ସେଠାକୁ ପଠାଯାଇଥିଲା | ଲଦାଖର ଲେହ ଏବଂ ଥୋଇସରେ ଦୁଇଟି ଏୟାରବେସ ରହିଛି | ମାତ୍ର ସେଠାରେ ସ୍ଥାୟୀ ରୂପେ କୌଣସି ଫାଇଟର ଏୟାରକ୍ରାଫ୍ଟର ମୁତୟନ ହୋଇନଥାଏ | ସମୟ ସମୟରେ କରାଯାଇଥାଏ |
ଗତ ୨୦୧୭ରେ ଡୋକଲାମରେ ଭାରତ ଏବଂ ଚୀନ ସୈନିକଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା | ଏହି ଘଟଣାକୁ ନେଇ ଯୁଦ୍ଧ ଭଳି ସ୍ଥିତି ଉପୁଜିଥିଲା | ସେହି ବର୍ଷ ଜୁନ ୧୬ ତାରିଖରେ ଭାରତ-ଭୂଟାନ-ଚୀନ ସୀମାର ସଂଯୋଗ ସ୍ଥଳ କୁହାଯାଉଥିବା ଟ୍ରାଇଜଙ୍କସନ ଠାରେ ଚାଇନିଜ ସୈନ୍ୟ ଆଗକୁ ବଢିବା ପାଇଁ ଉଦ୍ୟମ କରିଥିଲେ | ମାତ୍ର ଭାରତୀୟ ସେନା ସେମାନଙ୍କୁ ଅଟକାଇଥିଲା | ବେଶ ଦୀର୍ଘଲ ଦିନ ଧରି ଚାଲିଥିବା ଏହି ବିବାଦର ସମାଧାନ ୨୮ ଅଗଷ୍ଟରେ ହୋଇଥିଲା | ଗତ ବର୍ଷ ସେପ୍ଟମ୍ବରେ ଲଦାଖ ଠାରେ ଚୀନ-ଭାରତୀୟ ସୈନ୍ୟଙ୍କ ମଧ୍ୟରେ ହୋଇଥିବା ବିବାଦର ସମାଧାନ କରାଯାଇଥିଲା |