ଯାଜପୁରରେ ଚାଲିଥିଲା ନକଲି ଅଟା କାରଖାନା, ନାମୀଦାମୀ କମ୍ପାନୀ ଜରି ଆଣି ଚଲାଇଥିଲେ ବେପାର
ଯାଜପୁରରେ ନକଲି ଅଟା କାରଖାନାକୁ ଠାବ କଲା ପୋଲିସ
ସନ୍ଦିପ୍ତ ରାୟ, ଯାଜପୁର: ଯାଜପୁରରେ ନକଲି ଅଟା କାରଖାନାକୁ ଠାବ କଲା ପୋଲିସ । ସେଠାରୁ ବିଭିନ୍ନ ପ୍ରତିଷ୍ଠିତ କମ୍ପାନୀର ଅଟା ତିଆରି ଜରି, ମେସିନ, ଗହମ ଆଦି ଅନ୍ୟାନ୍ୟ ସାମଗ୍ରୀକୁ ଜବତ କରାଯାଇଛି । ଏହି ଘଟଣାରେ ଯାଜପୁର ପୋଲିସ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ କେଶବ ଚନ୍ଦ୍ର ପାଣି । ଯାଜପୁର ଥାନା ଦେବୀଦ୍ୱାର ଅଞ୍ଚଳରେ କେଶବ ନିଜର ଅଟାକଳ ନିର୍ମାମ କରି ନକଲି ଅଟା ତିଆରି କରୁଥିଲେ । ନିଜର ଅଟାକଳରେ ଗହମ ପେଶାଇ ବିଭିନ୍ନ ନାମୀଦାମୀ କମ୍ପାନୀର ଜରି ଆଣି ସେଥିରେ ସାଧାରଣ ଅଟାକୁ ପ୍ୟାକିଂ କରି ବଜାରକୁ ଛାଡୁଥିଲେ ।
ଏ ନେଇ ପରିବାର ଅଟା କମ୍ପାନୀ ପ୍ରଥମେ କଲିକତାର ଏକ ଘରୋଇ ଡିଟେକଟିଭ କମ୍ପାନୀର ସହାୟତା ନେଇଥିଲେ । ଉକ୍ତ କମ୍ପାନୀ ଅନୁସନ୍ଧାନ କରି ଜାଣିବା ପରେ ଯାଜପୁର ଥାନାରେ ଲିଖିତ ଅଭିଯୋଗ କରାଯାଇଥିଲା । ଅଭିଯୋଗ ହେବା ପରେ ଯାଜପୁର ପୋଲିସ ଆଜି ଉକ୍ତ ଅଟାକଳ ଉପରେ ଚଢ଼ାଉ କରିଥିଲା । ସେଠାରୁ ଅଟା ପ୍ୟାକେଟ ସହିତ ପ୍ୟାକିଂ ପାଇଁ ଆବଶ୍ୟକ ବିଭିନ୍ନ ସାମଗ୍ରୀ ଜବତ ମଧ୍ୟ କରିଥିଲା । ପୋଲିସ ଅଭିଯୁକ୍ତ କେଶବକୁ ଆଜି ଗିରଫ କରିଥିବା ବେଳେ ଆସନ୍ତାକାଲି ତାଙ୍କୁ କୋର୍ଟଚାଲାଣ କରିବ ବୋଲି ଜଣାପଡିଛି ।