ପିକ୍ଚର୍ ଅଭି ବାକି ହେ...
ହୋଟେଲରେ ସିନା ଗେହଲଟ କ୍ୟାମ୍ପର ଫିଲ୍ମ ଚା୍ଲିଛି, ହେଲେ ରାଜସ୍ଥାନ ରାଜନୈତିକ ସଙ୍କଟର ଫିଲ୍ମ ଏବେ ବି ବାକି ଅଛି !
ନୂଆଦିଲ୍ଲୀ: ରାଜସ୍ଥାନ କଂଗ୍ରେସ ମଧ୍ୟରେ ହୋଇଥିବା ଅନ୍ତଃକନ୍ଦଳ ଆଗକୁ କେଉଁ ମୋଡ ନେବ ? ସିଂହାସନ ପାଇଁ ଚାଲିଥିବା ଏହି ସଂଘର୍ଷ ଏବେ ସମଗ୍ର ଦେଶର ଫୋକସରେ ରହିଛି । ଗୋଟିଏ ପଟେ ଗେହଲଟ କ୍ୟାମ୍ପ ଓ ଅନ୍ୟପଟେ ପାଇଲଟ କ୍ୟାମ୍ପ । ଏସବୁ ଭିତରେ ଦୁଇ ଦୁଇଟି ଫୋନ କ୍ଲିପ ମଧ୍ୟ ଭାଇରାଲ ହେଲାଣି । ଯେଉଁଠି ସରକାର ଭାଙ୍ଗିବାର ଷଡ଼ଯନ୍ତ୍ର ସାମ୍ନାକୁ ଆସୁଛି । ଅନ୍ୟପଟେ Phone tapping ନେଇ ସକ୍ରିୟ ହୋଇଉଠିଛି କେନ୍ଦ୍ର ଗୃହ ମନ୍ତ୍ରାଳୟ । ସେପଟେ ଆସନ୍ତା ବୁଧବାର କିମ୍ବା ଗୁରୁବାର ବିଧାନସଭାର ସ୍ୱତନ୍ତ୍ର ଅଧିବେଶନ ଡକାଯାଇ ଫ୍ଲୋର ଟେଷ୍ଟ ହେବ ବୋଲି ସୂତ୍ର କହୁଛି । ଏ ତମାମ ଘଟଣା ମଧ୍ୟରେ ୪ ଗୁରୁତ୍ୱପୂର୍ଣ୍ଣ ଚିତ୍ର ରାଜସ୍ଥାନ ରାଜନୀତିରେ ଦେଖିବାକୁ ମିଳିଛି ।
ଚିତ୍ର ନମ୍ବର- ୧
ଏବେ ଗୋଟିଏ ଗୋଟିଏ ହୋଟେଲ ମଧ୍ୟରେ ଅଛନ୍ତି ଉଭୟ ଗେହଲଟ ଓ ପାଇଲଟ କ୍ୟାମ୍ପର ବିଧାୟକ । ଫ୍ଲୋର ଟେଷ୍ଟ ପୂର୍ବରୁ ନିଜ ନିଜର ବିଧାୟକଙ୍କୁ ଏକାଠି ରଖିଛନ୍ତି ଉଭୟ ଗୋଷ୍ଠୀ । ଜୟପୁରର ହୋଟେଲ ଫେୟରମାଉଣ୍ଟରେ ଗେହଲଟ କ୍ୟାମ୍ପର ବିଧାୟକ ରହିଛନ୍ତି । ସମୟ ଅତିବାହିତ ପାଇଁ ଫିଲ୍ମ ଦେଖୁଛନ୍ତି । ବିଧାୟକଙ୍କୁ ପ୍ରଥମେ ମୁଗଲ ଆଜମ ଫିଲ୍ମ ଦେଖାଯାଇଥିଲା । ପରେ ଲଗନ ଚଳଚିତ୍ର ଦେଖିଥିଲେ । ଅନ୍ୟପଟେ ମହିଳା ବିଧାୟକଙ୍କ ପାଇଁ ହୋଟେଲ ଭିତରେ କୁକିଂ କ୍ଲାସ ମଧ୍ୟ ହୋଇଛି । ସଙ୍କଟ ମଧ୍ୟରେ ଗୋଟିଏ ଖୁସି ଆଉ !
ଚିତ୍ର ନମ୍ବର- ୨
ଘୋଡ଼ା ବେପାର ନେଇ ଦୁଇ ଦୁଇଟି ଅଡିଓ କ୍ଲିପ ଭାଇରାଲ ହେବା ପରେ ରାଜସ୍ଥାନ ପୋଲିସର ଭ୍ରଷ୍ଟାଚାରୀ ନିରୋଧୀ ବ୍ୟୁରୋ(ଏସିବି) ଏହାର ତଦନ୍ତ କରୁଛି । ଅନ୍ୟପଟେ ରାଜସ୍ଥାନ ସରକାର ଯେ ଲୋକଙ୍କ Phone tapping କରୁଛି, ଏଭଳି ସଙ୍ଘାତିକ ଅଭିଯୋଗ ଆଣିଛି ବିଜେପି । ଏନେଇ ସିବିଆଇ ତଦନ୍ତର ମଧ୍ୟ ଦାବି କରିଛି । ତେବେ ଏହି ମାମଲାରେ କେନ୍ଦ୍ର ଗୃହ ମନ୍ତ୍ରାଳୟ ମଧ୍ୟ ସକ୍ରିୟ ହୋଇଉଠିଛି । Phone tapping ନେଇ ରାଜସ୍ଥାନ ମୁଖ୍ୟ ଶାସନ ସଚିବଙ୍କୁ ରିପୋର୍ଟ ମାଗିଛି ।
ଚିତ୍ର ନମ୍ବର- ୩
ସେପଟେ ହରିୟାଣା ମାନେସରରେ ଥିବା ଆଇଟିସି ଭାରତ ହୋଟେଲରେ ମଧ୍ୟ ହଇଚଇ ସୃଷ୍ଟି ହେଲାଣି । ସୂତ୍ର ଅନୁସାରେ, ରାଜସ୍ଥାନ ବିଜେପିର ସଭାପତି ସତୀଶ ପୁନିୟା ଏବଂ ରାଜେନ୍ଦ୍ର ରାଠୋର ଦୀର୍ଘ ୨ ଘଣ୍ଟା ଧରି ଏହି ହୋଟେଲ ଭିତରେ ଥିବା ପାଇଲଟ କ୍ୟାମ୍ପ ସହ ଆଲୋଚନା କରିଛନ୍ତି । କୁହାଯାଉଛି, ଫ୍ଲୋର ଟେଷ୍ଟ ପୂର୍ବରୁ ଏଠି ମାଷ୍ଟରପ୍ଲାନ ପ୍ରସ୍ତୁତ ହୋଇଛି ।
ଚିତ୍ର ନମ୍ବର- ୪
ଗତକାଲି BTPର ଦୁଇ ବିଧାୟକ କଂଗ୍ରେସକୁ ସମର୍ଥନ ଜଣାଇଛନ୍ତି । ଦିନେ ମୁହଁ ଫେରାଇ ନେଇଥିବା ଏହି ଦୁଇ ବିଧାୟକ ପୁଣିଥରେ ଫେରିଛନ୍ତି । ଆଉ ଏହାରି ଭିତରେ ରାଜ୍ୟପାଳଙ୍କ ସାକ୍ଷାତ କରିଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲଟ । ସୂତ୍ର କହୁଛି, ନିଜ ପାଖରେ ଆବଶ୍ୟକ ବିଧାୟକଙ୍କ ସମର୍ଥନ ଥିବା ଦାବି କରିଛନ୍ତି ଗେହଲଟ । ସେପଟେ ଆସନ୍ତା ବୁଧବାର କିମ୍ବା ଗୁରୁବାର ଫ୍ଲୋର ଟେଷ୍ଟ ହୋଇପାରେ ।
ତେବେ ବର୍ତ୍ତମାନର ଚିତ୍ର ଦେଖିଲେ ଯଦିଓ ଗେହଲଟ କ୍ୟାମ୍ପର ପଲା ଭାରି ଲାଗୁଛି, ତଥାପି ମଧ୍ୟ ରାଜନୀତିରେ କିଛି କହିବା ସମ୍ଭବ ନୁହେଁ । ହୋଟେଲରେ ସିନା ଗେହଲଟ କ୍ୟାମ୍ପର ଫିଲ୍ମ ଚା୍ଲିଛି, ହେଲେ ରାଜସ୍ଥାନ ରାଜନୈତିକ ସଙ୍କଟର ଫିଲ୍ମ ଏବେ ବି ବାକି ଅଛି !