Hockey World Cup Arrival: ଭୁବନେଶ୍ଵରରେ ପହଞ୍ଚିଲା ହକି ବିଶ୍ୱକପ୍ ଟ୍ରଫି, ସ୍ୱାଗତ କଲେ ରାଜ୍ୟବାସୀ

Hockey World Cup Arrival: କିଛିଦିନ ତଳେ ମୁଖ୍ୟ ଶାସନ ସଚିବ ହକି ଖେଳ ଓ ଖେଳାଳିଙ୍କ ସୁବିଧା ନେଇ ଅନେକ ଗୁରୁତ୍ୱପୂର୍ଣ୍ଣ ସୂଚନା ଦେଇଥିଲେ । ଉଭୟ କଳିଙ୍ଗ ଓ ରାଉରକେଲା ଷ୍ଟାଡିୟମରେ ସମସ୍ତ ବନ୍ଦୋବସ୍ତ କରାଯାଇଛି । ଆସନ୍ତା ୧୩ ତାରିଖରୁ ଓଡ଼ିଶାରେ ଆରମ୍ଭ ହେଉଛି ପୁରୁଷ ହକି ବିଶ୍ବକପ । ଏଥିରେ ୧୬ଟି ଟିମ୍ ଅଂଶଗ୍ରହଣ କରିବେ ।

Hockey World Cup Arrival: ଧୀରେ ଧୀରେ ସମସ୍ତଙ୍କ ମନରେ ବଢ଼ୁଛି ହକି ବିଶ୍ବକପ ଉତ୍କଣ୍ଠା । କାରଣ ଆଉ କିଛିଦିନ ପରେ ଆମ ରାଜ୍ୟ ଓଡ଼ିଶାରେ ହକି ମହାକୁମ୍ଭ । ଆଉ ଆଜି ସାରା ଦେଶରେ ପରିକ୍ରମା କରି ଓଡ଼ିଶାକୁ ଫେରିଛି FIH ଓଡ଼ିଶା ପୁରୁଷ ହକି ବିଶ୍ୱକପ୍ ଟ୍ରଫି । ରାଜ୍ୟରେ ପହଞ୍ଚିବା ପରେ ଆଜିଠୁ ଓଡ଼ିଶାର ସବୁ ଜିଲ୍ଲା ପରିକ୍ରମା କରିବ ଟ୍ରଫି । ସୁନ୍ଦରଗଡ଼ରେ ଏହି ବିଶ୍ୱକପ ଟ୍ରଫି ୧୭ଟି ବ୍ଲକ୍ ପରିକ୍ରମା କରିବ । ଏହାଦ୍ବାରା ଲୋକଙ୍କ ମଧ୍ୟରେ ଉତ୍ସାହ ବଢ଼ିବ ବୋଲି କୁହାଯାଇଛି । ୨୧ ଦିନ ଧରି ହକି ବିଶ୍ବକପ ଟ୍ରଫି ଦେଶର ୧୩ ସହର ଓ ଗୋଟିଏ କେନ୍ଦ୍ରଶାସିତ ଅଞ୍ଚଳରେ ପରିକ୍ରମା କରିସାରିଛି । 

ଓଡ଼ିଶାକୁ ଟ୍ରଫି ଫେରିବା ପରେ ସ୍ୱାଗତ କରିବାକୁ ବିମାନବନ୍ଦରରେ ହକି ଇଣ୍ଡିଆର (Hockey India President) ସଭାପତି ଦିଲ୍ଲୀପ ତିର୍କୀ , କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା, ମନ୍ତ୍ରୀ ଅଶୋକ ପଣ୍ଡା, ମେୟର ସୁଲୋଚନା ଦାସ, କ୍ରୀଡା ବିଭାଗର ଅଧିକାରୀ ଓ ଅନ୍ୟ କର୍ପୋରେଟର୍ ପହଞ୍ଚିଥିଲେ । ଟ୍ରଫିକୁ କ୍ରୀଡା ମନ୍ତ୍ରୀ ଭୁବନେଶ୍ୱର ମେୟରଙ୍କୁ (Bhubaneswar Mayor) ହସ୍ତାନ୍ତର କରିବା ପରେ ଏହାକୁ ରାଜଧାନୀରେ ପରିକ୍ରମା କରାଯାଇଛି । କଡା ସୁରକ୍ଷା ଭିତରେ ଟ୍ରଫିକୁ ବାଇକ ରାଲିରେ ଲିଙ୍ଗରାଜ ମନ୍ଦିର ପର୍ଯ୍ୟନ୍ତ ନିଆଯାଇଥିଲା । ଏବଂ ସେଠାରେ ଏହାକୁ ସାର୍ବଜନୀନ ଭାବେ ପ୍ରଦର୍ଶିତ କରାଯାଇଥିଲା । 

ସେପଟେ ଆଜିଠାରୁ ଭୁବନେଶ୍ୱରରେ ରାହାଗିରି(Rahagiri) ଅର୍ଥାତ୍ ପଥୋତ୍ସବର ଆୟୋଜନ କରାଯାଇଛି। ଜନ ସମୁଦ୍ର ମଧ୍ୟରେ ଆଜି ବିଶ୍ୱକପ ଟ୍ରଫି ମଧ୍ୟ ପହଞ୍ଚିଛି। ଏଥିପାଇଁ ଲୋକଙ୍କ ମନରେ ଉତ୍କଣ୍ଠା ଆହୁରି ବେଶ ବଢିଯାଇଛି।  ସ୍ମାର୍ଟ ଜନପଥରେ ଆଜି ସକାଳୁ ସକାଳୁ ଲାଗିଥିଲା ଗହଳି । ବିଭିନ୍ନ ମନୋରଞ୍ଜନଧର୍ମୀ କାର୍ଯ୍ୟକ୍ରମରେ ଝୁମିଛନ୍ତି ରାଜଧାନୀବାସୀ । ମିନି ମାରାଥନ ସହ ରାଜରାସ୍ତାରେ ଦେଖିବାକୁ ମିଳିଥିଲା ଖେଳକୁଦ । ତେବେ ଦୀର୍ଘ ଦୁଇ ବର୍ଷ ପରେ ପଥୋତ୍ସବର (Patha Utsav) ଆୟୋଜନ କରାଯାଇଥିବାରୁ ରାଜଧାନୀ ବାସୀ ବି ବେଶ ଖୁସ୍ । ଅନ୍ୟପଟେ ଏହି ଖୁସିକୁ ଆଉ କିଛିଦିନ ପରେ ଦ୍ୱି-ଗୁଣିତ କରିବ ହକି ମହାକୁମ୍ଭ। 

ସୂଚନା ଅନୁସାରେ ଆସନ୍ତା ୧୩ ତାରିଖରୁ ଓଡ଼ିଶାରେ ଆରମ୍ଭ ହେଉଛି ପୁରୁଷ ହକି ବିଶ୍ବକପ (Hockey World Cup) । ଏଥିରେ ୧୬ଟି ଟିମ୍ ଅଂଶଗ୍ରହଣ କରିବେ । ଭୁବନେଶ୍ବର ଓ ରାଉରକେଲାରେ ଖେଳାଯିବ ବିଶ୍ୱକପର ସମସ୍ତ ମ୍ୟାଚ ।  ଜାନୁଆରୀ ୧୩ରୁ ହକି ବିଶ୍ବକପ ଆରମ୍ଭ ହେବାକୁ ଥିବା ବେଳେ ୨୯ ଜାନୁଆରୀରେ ଭୁବନେଶ୍ୱରରେ କଳିଙ୍ଗ ଷ୍ଟାଡିୟମରେ ଫାଇନାଲ ମ୍ୟାଚ୍ ଖେଳାଯିବ। ତେବେ ଏଥିପାଇଁ କାଉଣ୍ଟ ଡାଉନ ଆରମ୍ଭ ହୋଇଯାଇଛି। ସେପଟେ ଉଭୟ ଅଫଲାଇନ ଓ ଅନଲାଇନରେ ଟିକଟ ବିକ୍ରି ମଧ୍ୟ ଶେଷ ହୋଇଛି।