Odisha News: ଝିଅ ବାହାଘର ପାଇଁ ରଖିଥିବା ଜିନିଷକୁ ଖାଇଗଲା ନିଆଁ

Odisha News: ଘୋଡ଼ା ଚଢା ଠାରୁ ସମ୍ପତ୍ତି ନାହିଁ ଘରପୋଡି ଠାରୁ ବଡ଼ ବିପତ୍ତି ନାହିଁ। ନିଆଁର ଆଁ ରେ ଜଳି ପୋଡ଼ି ପାଉଁଶ ହୋଇଗଲା ୯ଟି ପରିବାର ର ୧୨ ବଖରା । ବାହାଘର ପାଇଁ ସଞ୍ଚୟ କରିଥିବା କଷ୍ଟ ଅର୍ଜିତ ଟଙ୍କା ଏବଂ ସୁନା ଅଳଙ୍କାର ପୋଡ଼ି ଛାରଖାର ହୋଇଗଲା ।  ଏଭଳି ଦୁଃଖଦ ଘଟଣା ଘଟିଛି କେନ୍ଦୁଝର ଜିଲ୍ଲା ଆନନ୍ଦପୁର ଥାନା ଶାଳବଣୀ ପଞ୍ଚାୟତର ପଣ୍ଡୁଆ ଗାଁରେ। 

ଗ୍ରାମର ନାଇକ ସାହିରେ ଗତକାଲି ରାତିରେ ହଠାତ୍ ଫୁଲ ନାୟକ ରୋଷେଇ କରୁଥିବା ବେଳେ ଘର ଛପରରେ ନିଆଁ ଲାଗିଥିବା ଦେଖିବାକୁ ପାଇଥିଲେ । ନିଆଁ ଲିଭାଇବାକୁ ଚିତ୍କାର କରିବା ସହ ନିଆଁ ଲିଭାଇବାକୁ ଉଦ୍ୟମ କରିଥିଲେ ଫୁଲଙ୍କ ପରିବାର ଲୋକେ । ନିଆଁ ଆୟତ ହେବା ପରିବର୍ତ୍ତେ ଲାଗି ଥିବା ଚାଳଛପର ଘରର ବଖରା ପରେ ବଖରା ଘରକୁ ମାଡି ଯାଇଥିଲା ନିଆଁ । ଏଥିରେ ୯ ଟି ପରିବାର ର ୧୨ ବଖରା ଘର ସଂପୂର୍ଣ୍ଣ ଜଳିଯାଇଥିଲା । ନିଆଁ ଏତେ ଭୟଙ୍କର ଥିଲା ଯେ ଘର ଭିତରକୁ ଯାଇ କୌଣସି ଜିନିଷ ଉଦ୍ଧାର କରିବା ଅସମ୍ଭବ ଥିଲା । ଦମକଳ ବାହିନୀ ପହଞ୍ଚିବା ବେଳକୁ ଘର ର ସମସ୍ତ ଜିନିଷ ପାଉଁଶ ହୋଇଯାଇଥିଲା।

ଆସନ୍ତା ୨୮ ତାରିଖରେ ଦାମୋଦର ନାଏକଙ୍କ ବିବାହ ସ୍ଥିର ହୋଇଥିଲା । ବାହାଘରରେ ଖର୍ଚ୍ଚ କରିବା ପାଇଁ ପରିଶ୍ରମ କରି ଦେଢ଼ ଲକ୍ଷ ଟଙ୍କା ସଞ୍ଚୟ କରି ଘରେ ରଖିଥିଲେ । ଏହି ଅଗ୍ନିକାଣ୍ଡ ରେ ସମସ୍ତ ଟଙ୍କା ସହ ବହୁ ଆସବାବପତ୍ର ପୋଡ଼ି ଯାଇଥିବା ବେଳେ କେମିତି ବିବାହ କରିବେ ସେଥିପାଇଁ ଚିନ୍ତାରେ ଅଛନ୍ତି । ସେହିପରି ପରି ଗ୍ରାମର ରଥିଆ ନାଏକ ନିଜ ର ଝିଅ ବାହାଘର ପାଇଁ ସୁନା ଅଳଙ୍କାର ସହ ନୂଆ ଆସବାବପତ୍ର କିଣି ରଖିଥିବା ବେଳେ ଅଗ୍ନିକାଣ୍ଡ ରେ ସୁନା ଅଳଙ୍କାର ସହ ସମସ୍ତ ଜିନିଷ ପୋଡ଼ି ପାଉଁଶ ହୋଇଯାଇଛି ।

ଅନ୍ୟ ପରିବାର ଲୋକଙ୍କର ମଧ୍ୟ ଲକ୍ଷାଧିକ ଟଙ୍କା ସହ ସମସ୍ତ ଜିନିଷ ପୋଡ଼ି ପାଉଁଶ ହୋଇଯାଇଛି। ଅଗ୍ନିକାଣ୍ଡରେ କ୍ଷତିଗ୍ରସ୍ତ ହୋଇଥିବା ସମସ୍ତ ପରିବାର ଗରିବ ଶ୍ରେଣୀର ହୋଇ ଥିବାରୁ ସେମାନଙ୍କୁ ତୁରନ୍ତ ସାହାଯ୍ୟ କରିବାକୁ ନିବେଦନ କରିଛନ୍ତି । ଅନ୍ୟପକ୍ଷରେ ଆନନ୍ଦପୁର ତହସିଲଦାର ଘଟଣାସ୍ଥଳରେ ପହଞ୍ଚି ପ୍ରତ୍ୟେକ ପରିବାର କୁ ୫ ହଜାର ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରିବା ସହ ଜିଲ୍ଲାପାଳଙ୍କ ସହ ଆଲୋଚନା କରି ସମ୍ପୁର୍ଣ୍ଣ ଘର ପୋଡି ଯାଇଥିବା ପରିବାରକୁ ଲକ୍ଷେ କୋଡ଼ିଏ ହଜାର ଟଙ୍କା ପ୍ରଦାନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି । ଭୟାବହ ଅଗ୍ନିକାଣ୍ଡରେ କ୍ଷତିଗ୍ରସ୍ତ ହୋଇଥିବା ୯ ଟି ପରିବାର କୁ ପ୍ରଶାସନ ପକ୍ଷରୁ ତୁରନ୍ତ ସହାୟତା କରିବା ପାଇଁ ସାଧାରଣରେ ଦାବି ହେଉଛି ।