Puri Crime News: ଛାତ୍ରଙ୍କୁ ଛୁରା ମାଡ଼, ପୋଲିସର ତଦନ୍ତ ଆରମ୍ଭ
ମୁନାଙ୍କ ବାମ ହାତରେ ଗଭୀର କ୍ଷତ ହୋଇଥିବା ବେଳେ ରକ୍ତାକ୍ତ ଅବସ୍ଥାରେ ସେ ଚିତ୍କାର କରିଥିଲେ। ଏହା ଦେଖି ଆକ୍ରମଣକାରୀ ଫେରାର ହୋଇ ଯାଇଥିଲେ।
Puri Crime News ପୁରୀ: ଛାତ୍ରର ଛୁରା ମାଡ଼ରେ ଛାତ୍ର ଗୁରୁତର। ଆଜି ପୁରୀରୁ ଏଭଳି ଏକ ଲୋମଟାଙ୍କୁରା ଘଟଣା ସାମ୍ନାକୁ ଆସିଛି। ଛୁରା ମାଡ଼ରେ ଆହତ ହୋଇଥିବା ଛାତ୍ର ହେଉଛନ୍ତି ପୋଲିସ ହାଇସ୍କୁଲର ଦଶମ ଶ୍ରେଣୀର ମୁନା ସାହୁ। ରେଡକ୍ରସ ରୋଡର ଜଣେ ଅଷ୍ଟମ ଶ୍ରେଣୀ ଛାତ୍ର ମୁନାଙ୍କୁ ଛୁରାମାଡ଼ କରିଥିବା ସୂଚନା। ଗୁରୁତର ଛାତ୍ରଙ୍କୁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି। ସେପଟେ ଘଟଣାସମ୍ପର୍କରେ ସୂଚନା ପାଇ କୁମ୍ଭାରପଡ଼ା ଥାନା ପୋଲିସ ଛାନଭିନ୍ ଆରମ୍ଭ କରିଛି।
ମିଳିଥିବା ସୂଚନା ଅନୁଯାୟୀ ଆଜି ସ୍କୁଲରେ ବିଜ୍ଞାନ ମେଳା ଥିବାରୁ ସକାଳୁ ସକାଳୁ ମୁନା ସ୍କୁଲ ବାହାରି ଯାଇଥିଲେ। ପାଠପଢ଼ା ନ ଥିବାରୁ ବ୍ୟାଗ ବି ନେଇ ନ ଥିଲେ ମୁନା। ହେଲେ ଘରୁ ବାହାରିବାରୁ କିଛି ସମୟ ମଧ୍ୟରେ ମୁନାଙ୍କୁ ଛୁରା ମାଡ଼ ହୋଇଥିବା ନେଇ ପରିବାର ସଦସ୍ୟଙ୍କୁ ସୂଚନା ମିଳିଥିଲା। ଫଳରେ ଆହତ ଅବସ୍ଥାରେ ମୁନାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ସଦସ୍ୟ। ଉଭୟ ଆକ୍ରମଣକାରୀ ଓ ଆକ୍ରମଣର ଶିକାର ନାବାଳକ ପୁଲିସ୍ ଲାଇନ୍ ହାଇସ୍କୁଲର ଛାତ୍ର ବୋଲି ଜଣାଯାଇଛି। ତେବେ ପୂର୍ବ କଳହରୁ ଏହି ଆକ୍ରମଣ ହୋଇଥିବା ନେଇ ଆଶଙ୍କା କରାଯାଉଛି।
ମୁନା ଆଜି ସକାଳ ୯ଟା ପରେ ଘରୁ ସ୍କୁଲକୁ ବାହାରିଥିଲେ। ମାତ୍ର ସେ ରେଡକ୍ରସ ରୋଡରେ ପହଞ୍ଚିବା ବେଳକୁ ସେଠାରେ ପୂର୍ବରୁ ଆକ୍ରମଣକାରୀ ଛକି ରହିଥିଲେ। ସେଠାରେ କୌଣସି କାରଣରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏହାପରେ ଉତ୍ତ୍ୟକ୍ତ ନାବାଳକଜଣକ ମୁନାଙ୍କୁ ଛୁରୀ ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ। ମୁନାଙ୍କ ବାମ ହାତରେ ଗଭୀର କ୍ଷତ ହୋଇଥିବା ବେଳେ ରକ୍ତାକ୍ତ ଅବସ୍ଥାରେ ସେ ଚିତ୍କାର କରିଥିଲେ। ଏହା ଦେଖି ଆକ୍ରମଣକାରୀ ଫେରାର ହୋଇ ଯାଇଥିଲେ।