ଗାଁ ମୁହାଁ କଲରାପତରିଆ ବାଘ, ବାଛୁରୀକୁ ବନାଇଲା ଆହାର

ନୂଆପଡା: ସୁନାବେଡା ଅଭୟାରଣ୍ୟର ସୋସେଙ୍ଗ ଗାଁରେ କଲରାପତରିଆ ବାଘ ଆତଙ୍କ ଦେଖିବାକୁ ମିଳିଛି । ଗୋଟିଏ ବାଛୁରୀକୁ ମାରି ଆହାର ବନାଇଛି ବାଘ । ଗାଁରେ ବାଘ ଭୟ ଦେଖା ଦେବା ସହିତ ଲୋକମାନେ ଘରୁ ପଦାକୁ ବାହାରିବାକୁ ଡରୁଛନ୍ତି । ଘଟଣା ସମ୍ପର୍କରେ ସୂଚନା ପାଇବା ପରେ ବନ୍ୟ ବିଭାଗର ଅଧିକାରୀ ମାନେ ଘଟଣା ସ୍ଥଳରେ ପହଞ୍ଚିବା ସହ ତଦନ୍ତ ଆରମ୍ଭ କରିଛନ୍ତି । 

ସୂଚନା ମୁତାବକ, ଗତକାଲି ବିଲମ୍ବିତ ରାତିରେ ସୋସେଙ୍ଗ ଗାଁର ସନ୍ତୋଷ ମାଝୀଙ୍କ ଗୁହାଳରେ ପସିଥିଲା କଲରାପତରିଆ ବାଘ । ବାଛୁରୀକୁ ଗୁହାଳରୁ ଟେକି ନେଇ ମାରି ଖାଇଥିବା ଅଭିଯୋଗ ହୋଇଛି । ବନ୍ୟ ବିଭାଗ ଅଧିକାରୀମାନେ ପହଞ୍ଚିବା ପରେ ବାଘର ଗତିବିଧି ଜାଣିବା ପାଇଁ ସୋସେଙ୍ଗ ଜଙ୍ଗଲରେ ଟ୍ରାପ କ୍ୟାମେରା ଲଗାଇଛନ୍ତି ।