କେଜ୍ରିଓ୍ୱାଲ୍‍ଙ୍କ ଗିରଫଦାରୀକୁ ନେଇ ଅଶାନ୍ତ ଦିଲ୍ଲୀ: କଡ଼ା ସୁରକ୍ଷା

Arvind Kejriwal Arrested Updates: ସ୍ୱାଧୀନ ଭାରତର ଇତିହାସରେ ପ୍ରଥମ ଥର ପାଇଁ ଜଣେ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଇଛି। କେଜ୍ରିୱାଲଙ୍କ ଗିରଫକୁ ବିରୋଧ କରି ଆପର ନେତାମାନେ ବିରୋଧ ପ୍ରଦର୍ଶନ କରୁଛନ୍ତି । ତେଣୁ ରାଜଧାନୀ ଦିଲ୍ଲୀରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।

Arvind Kejriwal Arrested Updates: ଦିଲ୍ଲୀର ମଦ ନୀତି ମାମଲାରେ ସର୍ଚ୍ଚ ୱାରେଣ୍ଟ ନେଇ ଏନଫୋର୍ସମେଣ୍ଟ ନିର୍ଦ୍ଦେଶାଳୟର ୧୨ ଜଣିଆ ଟିମ୍ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନରେ ପହଞ୍ଚି ଗୁରୁବାର ରାତିରେ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଛି । ମୁଖ୍ୟମନ୍ତ୍ରୀଙ୍କୁ ଅଧିକ ପଚରାଉଚରା କରିବା ପାଇଁ ଅନୁସନ୍ଧାନକାରୀ ସଂସ୍ଥା ଏହାର ପ୍ରଥମ ରାଉଣ୍ଡ ଆରମ୍ଭ କରିଛି। ଗିରଫ ପରେ AAP ପକ୍ଷରୁ କୁହାଯାଇଛି ଯେ, ଜେଲରୁ ମଧ୍ୟ କେଜ୍ରିୱାଲ ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିବେ ।

ଏହି ଗିରଫଦାରୀ ବିରୋଧରେ ଦେଶବ୍ୟାପୀ ବିରୋଧ ଘୋଷଣା କରାଯାଇଛି । AAP ନେତାମାନେ ଦିଲ୍ଲୀର ବିଜେପି ମୁଖ୍ୟାଳୟ ବାହାରେ ବିକ୍ଷୋଭ ପ୍ରଦର୍ଶନ କରିବେ । ସେଥିପାଇଁ ସମସ୍ତ ଗୁରୁତ୍ୱପୂର୍ଣ୍ଣ ସ୍ଥାନ ଗୁଡିକରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଏଥିସହ କିଛି ସ୍ଥାନରେ ଧାରା ୧୪୪ ଲାଗିଛି ।  ବିରୋଧକୁ ରୋକିବା ପାଇଁ ପାରାମିଲିଟାରୀ ଫୋର୍ସ ନିୟୋଜିତ ହୋଇଛନ୍ତି। ଦିଲ୍ଲୀର AAP କାର୍ଯ୍ୟାଳୟକୁ ସଂଯୁକ୍ତ ସମସ୍ତ ରାସ୍ତାକୁ ଅବରୋଧ କରାଯାଇଛି।

ସ୍ୱାଧୀନ ଭାରତ ଇତିହାସରେ ପ୍ରଥମ ଥର ଜଣେ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଇଛି। ଏହି ମାମଲାରେ ଅନୁସନ୍ଧାନକାରୀ ସଂସ୍ଥା ପୂର୍ବରୁ କେଜ୍ରିୱାଲଙ୍କ ଦଳର ଦୁଇ ନେତା ମନୀଷ ସିସୋଡିଆ ଏବଂ ସଞ୍ଜୟ ସିଂଙ୍କୁ ଗିରଫ କରିସାରିଛି। ମୁଖ୍ୟମନ୍ତ୍ରୀଙ୍କୁ ୯ ଥର ସମନ ପଠାଯାଇଥିଲେ ମଧ୍ୟ ହାଜର ହେବାକୁ ମନା କରିଦେଇଥିଲେ।

ବିଜେପି ମୁଖ୍ୟାଳୟ ସାମ୍ନାରେ ୧୪୪ ଧାରା
ଶୁକ୍ରବାର ସକାଳେ ଦିଲ୍ଲୀ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ବିଭିନ୍ନ ସ୍ଥାନରେ ବ୍ୟାରିକେଡ୍ ଲଗାଯାଇଥିବା ଦେଖିବାକୁ ମିଳିଛି । ବିଜେପି ମୁଖ୍ୟାଳୟକୁ ସଂଯୁକ୍ତ ରାସ୍ତାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀକୁ ବିରୋଧ ପ୍ରଦର୍ଶନ କରାଯିବ । ତେଣୁ ପାରାମିଲିଟାରୀ କର୍ମଚାରୀଙ୍କୁ ଏହି ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ବଜାୟ ରଖିବା ପାଇଁ ନିୟୋଜିତ କରାଯାଇଛି।

AAP ସୂତ୍ରରୁ ପ୍ରକାଶ ଯେ, ସମସ୍ତ ଦିଲ୍ଲୀ ବିଧାୟକ ଏବଂ କାଉନସିଲରଙ୍କୁ ବିଜେପି ମୁଖ୍ୟାଳୟ ନିକଟରେ ଏକାଠି ହେବାକୁ ପରାମର୍ଶ ଦିଆଯାଇଛି । କେଜ୍ରିୱାଲଙ୍କ ଗିରଫଦାରୀକୁ ବିରୋଧ କରିବାକୁ ବହୁ ସଂଖ୍ୟାରେ ସାଧାରଣ ଲୋକ ମଧ୍ୟ ରାଜରାସ୍ତାକୁ ଓହ୍ଲାଇବେ ବୋଲି ଦଳ ଆଶା ରଖିଛି । ଜଣେ ବରିଷ୍ଠ ପୋଲିସ ଅଧିକାରୀଙ୍କ କହିବା ଅନୁଯାୟୀ, ବିଜେପି ମୁଖ୍ୟାଳୟ ଏବଂ ଇଡି କାର୍ଯ୍ୟାଳୟ ବାହାରେ ଧାରା ୧୪୪ ଲାଗୁ କରାଯାଇଥିବାରୁ ବିକ୍ଷୋଭକାରୀଙ୍କୁ ଅଟକାଯିବ ।