Nursing Day: କଟକ: ସ୍ଥାନୀୟ ଶ୍ରୀ ଶ୍ରୀ ବିଶ୍ୱବିଦ୍ୟାଳୟରେ ନର୍ସିଂ ସପ୍ତାହ ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ବିଶ୍ୱବିଦ୍ୟାଳୟ ପରିସରସ୍ଥିତ ଆୟୁର୍ବେଦ ଚିକିତ୍ସାଳୟ ଓ ସ୍ୱାସ୍ଥ୍ୟସେବା ପରିଚାଳନା କ୍ଲବ୍ ସହଯୋଗରେ ଶ୍ରୀ ଶ୍ରୀ କଲେଜ ଅଫ୍ ନର୍ସିଂ ପକ୍ଷରୁ ପାଳିତ ନର୍ସିଂ ସପ୍ତାହ ଅବସରରେ ଏଠାରେ ଅଧ୍ୟୟନରତ ଶିକ୍ଷାର୍ଥୀଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା ଓ ଆକର୍ଷଣୀୟ କାର୍ଯ୍ୟକ୍ରମମାନ ଅନୁଷ୍ଠିତ ହୋଇଥିଲା । ଦୀର୍ଘ ଏକ ସପ୍ତାହ ଧରି ଚାଲିଥିବା ଏହି କାର୍ଯ୍ୟକ୍ରମରେ ‘ଆମ ନର୍ସ, ଆମ ଭବିଷ୍ୟତ’, ‘ଦ ଇକୋନମିକ୍ ପାୱାର ଅଫ୍ କେୟାର’ ଭଳି ବିଷୟବସ୍ତୁ ଉପରେ ପୋଷ୍ଟର ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏଥିରେ ଛାତ୍ରୀମାନେ ନିଜ ନିଜ ପ୍ରତିଭା ପ୍ରଦର୍ଶନ କରିବା ସହିତ ନର୍ସିଂ ପ୍ରତି ସେମାନଙ୍କର ପ୍ରତିବଦ୍ଧତାକୁ ମଧ୍ୟ ଦର୍ଶାଇଥିଲେ । ଖାଲି ସେତିକି ନୁହେଁ, ‘ନର୍ସେସ୍ ମେକ୍ ଦ ଡିଫରେନ୍ସ’ ଶୀର୍ଷକରେ ସେମାନଙ୍କ ଭିତରେ ଏକ ବକ୍ତୃତା ପ୍ରତିଯୋଗିତା ମଧ୍ୟ ଅନୁଷ୍ଠିତ ହୋଇଥିଲା।


COMMERCIAL BREAK
SCROLL TO CONTINUE READING

ସପ୍ତାହ ବ୍ୟାପୀ ଚାଲିଥିବା କାର୍ଯ୍ୟକ୍ରମର ଉଦଯାପନୀ ଦିବସରେ ବହରମପୁର ମହାବିଦ୍ୟାଳୟର ସହଯୋଗୀ ପ୍ରାଧ୍ୟାପିକା ଶ୍ରୀମତି ବିଜୟଲକ୍ଷ୍ମୀ ଦାଶ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ । ସ୍ୱାସ୍ଥ୍ୟସେବାରେ ନର୍ସମାନଙ୍କର ଅନବଦ୍ୟ ଭୂମିକାକୁ ନେଇ ତାଙ୍କର ଅଭିଭାଷଣରେ ସେ ଖୁବ୍ ପ୍ରାଞ୍ଜଳ ଭାବରେ ବୁଝାଇଥିଲେ । ଏଥିସହ ସମାଜର ପ୍ରତ୍ୟେକ କ୍ଷେତ୍ରରେ ସ୍ୱାସ୍ଥ୍ୟସେବାରେ ନିୟୋଜିତ ନର୍ସମାନଙ୍କର ତ୍ୟାଗ ଏବଂ ଅବଦାନକୁ ଖୁବ୍ ପ୍ରେରଣାଦାୟୀ ଭାଷାରେ ବର୍ଣ୍ଣନା କରିଥିଲେ ।
ନର୍ସିଂ ସପ୍ତାହ ଅବସରରେ ଏହି କାର୍ଯ୍ୟକ୍ରମ ବାସ୍ତବିକ ନର୍ସିଂ ବୃତ୍ତିକୁ ସମ୍ମାନ ପ୍ରଦାନ କରିବା ସହ ସେମାନଙ୍କ ପାଇଁ ଜନସାଧାରଣଙ୍କୁ ଗର୍ବ କରିବାର ଏକ ସୁଯୋଗ ଦେଇଥିଲା । ଏଥିସହ ଏହି କାର୍ଯ୍ୟକ୍ରମ ଅନ୍ତର୍ଜାତୀୟ ସ୍ତରରେ ମଧ୍ୟ ନର୍ସିଂ ବୃତ୍ତିର ସଫଳତାର ଗାଥା ବର୍ଣ୍ଣନା କରିଥିଲା ।