cyber fraud : ଆସିଲାଣି ୧୫ ଶହ ମାମଲା, ଲୁଟିଲେଣି ୫ କୋଟିରୁ ଊର୍ଦ୍ଧ୍ୱ ଟଙ୍କା

cyber fraud : ଭୁବନେଶ୍ୱର(ରାଜେଶ ସାମନ୍ତରାୟ): ଯେତେ ସଚେତନ କରିଲେ ବି ଥମୁନି ସାଇବର ଠକେଇ, ଯେତେ ଆଇନ, ନିୟମ ଓ ସିକ୍ୟୁରିଟି ଟାଇଟ୍ କରିଲେ ବି ଖାତିର କରୁ ନାହାଁନ୍ତି ସାଇବର ଅପରାଧି। ଭୁବନେଶ୍ଵରରେ ଏବେ ଏହି ଠକେଇ ମାତ୍ରାଧିକ ପରିମାଣରେ ବଢ଼ି ଯାଇଛି। ଗତ ୫ ମାସର ତଥ୍ୟରୁ ଏହା ଅନୁମେୟ । ଏହି ୫ ମାସ ଭିତରେ ସାଢ଼େ ୧୫ ଶହରୁ ଅଧିକ ମାମଲା ରୁଜୁ ହୋଇଥିବା ବେଳେ ପ୍ରାୟ ୫ କୋଟି ଟଙ୍କା ସାଇବର ଠକଙ୍କ ଖାତାକୁ ଚାଲିଯାଇଛି । ସମଗ୍ର ରାଜ୍ୟରେ ସାଢ଼େ ୧୭ ଶହ ମାମଲା ହୋଇଥିବା ବେଳେ କେବଳ ରାଜଧାନୀରେ ୧୫୩୭ ମାମଲା ରୁଜୁ ହୋଇଛି ।

ସାଇବର ଠକଙ୍କ ଠକେଇର ରାଜଧାନୀ ପାଲଟିଛି ରାଜଧାନୀ ଭୁବନେଶ୍ଵର। ସତେ ଯେମିତି କେବଳ ଭୁବନେଶ୍ଵର ଲୋକଙ୍କୁ ଠକିବା ଅତି ସହଜ। ଭୁବନେଶ୍ବର କମିସନରେଟ ପୋଲିସର ତଥ୍ୟ ଅନୁସାରେ ରାଜ୍ୟର ମୋଟ ଠକେଇର ୮୭ ପ୍ରତିଶତ କେବଳ ଭୁବନେଶ୍ବରରୁ ହୋଇଛି । ତେଣୁ ଏହା ସ୍ପଷ୍ଟ ଯେ ସାଇବର ଠକଙ୍କ ହଟ ସ୍ପଟ୍ ଭୁବନେଶ୍ବର। ଏଭଳି ମାମଲା ବାରମ୍ବାର ହେଉଥିଲେ ବି ଲୋକେ ସଚେତନ ହେଉନାହାନ୍ତି । ବରଂ ବେଶି ବେଶି ଲୋକ ସାଇବର ଠକଙ୍କ ଫାଶରେ ଫସି ଯାଉଛନ୍ତି । ଆଶ୍ଚର୍ଯ୍ୟର କଥା ସାଇବର ଠକଙ୍କ ଜାଲରେ ବହୁ ଶିକ୍ଷିତ ଓ ଉଚ୍ଚ ଶିକ୍ଷିତ ବ୍ୟକ୍ତି ଅଧିକ ଫସୁଛନ୍ତି । ପୋଲିସର ତଥ୍ୟ ଅନୁସାରେ ଡାକ୍ତର , ଇଂଜିନିୟର୍ , ଅବସରପ୍ରାପ୍ତ ସେନା ଅଧିକାରୀ , ଅବସରପ୍ରାପ୍ତ ସରକାରୀ କର୍ମଚାରୀମାନେ ଏଭଳି ଠକାମିର ଶିକାର ହେଉଛନ୍ତି । ତେଣୁ ଆପଣ ଏଣିକି ଅଧିକ ସାବଧାନ ରୁହନ୍ତୁ।  ଏକ୍ସପର୍ଟ ଙ୍କ କଥା ମାନନ୍ତୁ ।

ସୂଚନା ଅନୁସାରେ ଗତ ଜୁଲାଇ ମାସରେ ସର୍ବାଧିକ ୧.୩୮ କୋଟି ଟଙ୍କା ସାଇବର ଠକେଇ ହୋଇଥିଲା । ଜୁନ୍‌ରେ କୋଟିଏ ୬ଲକ୍ଷ , ମେ’ରେ ୯୫ ଲକ୍ଷ ୭୫ ହଜାର , ଅଗଷ୍ଟରେ ୮୦ଲକ୍ଷ ଟଙ୍କା ଏବଂ ଏପ୍ରିଲ୍‌ରେ ୭୬ଲକ୍ଷ ଟଙ୍କା ଠକେଇ ହୋଇଥିଲା । ଏପ୍ରିଲ୍‌ରେ ସମଗ୍ର ରାଜ୍ୟରୁ ୩୧୩ଟି ଅଭିଯୋଗ ଆସିଥିବା ବେଳେ କେବଳ ଭୁବନେଶ୍ଵରରୁ ଥିଲା ୨୬୧ ମାମଲା । ସେଥିରେ ସର୍ବାଧିକ ୧୧୪ଟି ୟୁପିଆଇ ଠକେଇ ଏବଂ ୭୪ଟି କ୍ରେଡିଟ୍ ଓ ଡେବିଟ୍ କାର୍ଡ ଠକେଇ ରିପୋର୍ଟ ହୋଇଛି । ସେହିପରି ୭୩ଟି ଅନ୍‌ଲାଇନ ଠକେଇ ଅଭିଯୋଗ ଥିଲା । ତେବେ ଅଭିଯୋଗକାରିମାନଙ୍କୁ ପାଖାପାଖି ୯ ଲକ୍ଷ ୭୦ ହଜାର ଟଙ୍କା ଫେରସ୍ତ କରାଯାଇଥିବା ବେଳେ ଏକ ଲକ୍ଷ ୩୧ ହଜାର ଟଙ୍କା ବ୍ଲକ୍ କରାଯାଇପାରିଥିଲା । ମେ ’ ମାସରେ ସାରା ରାଜ୍ୟରୁ ୩୩୬ଟି ଠକେଇ ଅଭିଯୋଗ ଆସିବା ବେଳେ କେବଳ ଭୁବନେଶ୍ଵରରୁ ଥିଲା ୩ ଶହ ସେଥିରେ ସର୍ବାଧିକ ୧୩୬ଟି ୟୁପିଆଇ ଠକେଇ ଏବଂ ୫୪ଟି କ୍ରେଡିଟ୍ ଓ ଡେବିଟ୍ କାର୍ଡ ଠକେଇ ରିପୋର୍ଟ ହୋଇଛି ।

ସେହିପରି ୧୧୦ଟି ଅନ୍‌ଲାଇନ ଠକେଇ ଅଭିଯୋଗ ହୋଇଛି । ତେବେ ପାଖାପାଖି ୭ଲକ୍ଷ ୬୯ ହଜାର ଟଙ୍କା ଫେରସ୍ତ କରାଯାଇଥିବା ବେଳେ ୬୭ ହଜାର ଟଙ୍କା ବ୍ଲକ୍ କରାଯାଇଥିଲା । ସେହିଭଳି ଜୁନ୍ ମାସରେ ମୋଟ ୩୯୦ ଅଭିଯୋଗ ମଧ୍ୟରୁ ଭୁବନେଶ୍ୱରରୁ ଥିଲା ୩୫୭ଟି ଅଭିଯୋଗ । ମୋଟ କୋଟିଏ ୬ଲକ୍ଷ ୭ଶହ ୬୯ଟଙ୍କା ଠକେଇ ହୋଇଥିବା ରେକର୍ଡ କରାଯାଇଥିଲା । ଗତ ୫ମାସର ଏହି ତଥ୍ୟକୁ ତର୍ଜମା କଲେ ରାଜଧାନୀରେ ଠକେଇ ପରିମାଣ ବଢୁଥିବା ଦେଖିବାକୁ ମିଳୁଛି । ଉଦ୍‌ବେଗର ବିଷୟ ହେଉଛି , ପୁଳାପୁଳା ଅଭିଯୋଗ ଆସୁଥିଲେ ମଧ୍ୟ ଠକଙ୍କୁ ଧରିବା ତ ଦୂରର କଥା ପୁଲିସ ମାମଲା ରୁଜୁକରୁନାହିଁ । ଗତ ମାସକରେ ୩୪୪ଟି ମାମଲା ରୁଜୁ ହୋଇଥିବା ବେଳେ ଭୁବନେଶ୍ବରର ସାଇବର କ୍ରାଇମ୍ ଓ ଅର୍ଥନୈତିକ ଅପରାଧ ଥାନାରେ ମାତ୍ର ୬ଟି ମାମଲା ପଞ୍ଜୀକୃତ ହୋଇଛି ।

ବହୁ ପ୍ରକାର ସଚେତନତା କାର୍ଯ୍ୟକ୍ରମ ସତ୍ତ୍ଵେ ଲୋକେ ଚେତୁନାହାନ୍ତି । ଏମିତିକି ଠକେଇର ଶିକାର ହେବା ପରେ ପରେ ୨୪ ଘଣ୍ଟା ଭିତରେ ବି ସାଇବର ଥାନାକୁ ଆସି ଅଭିଯୋଗ କରୁନାହାନ୍ତି । ତେଣୁ ବିଳମ୍ବରେ ପଞ୍ଜୀକୃତ ହେଉଥିବା ମାମଲାର ସମାଧାନ ପୁଲିସ ପାଇଁ ଅଡ଼ୁଆ ସୃଷ୍ଟି କରୁଛି । ପୂର୍ବରୁ ଚାକିରି ଲୋଭ , ଷ୍ଟକ୍ ମାର୍କେଟ୍ ପ୍ରଲୋଭନ , ଲୋନ୍ କରାଇବା ଭଳି ଯୋଜନା କରି ଠକୁଥିଲେ । ସେହିଭଳି ସାଇବର ସୁନ୍ଦରୀ ବେଶରେ ଫସାଇ ବ୍ଲାକ୍‌ମେଲ୍ କରି ଠକୁଥିଲେ । ଏବେ କ୍ରେଡିଟ୍‌ କାର୍ଡ ଲିମିଟି ବଢ଼ାଇବା ଓ ବିଦ୍ୟୁତ ବିଲ୍‌ ପୈଠକୁ ଅସ୍ତ୍ର ପୈଠ ବାହାନା ଦେଖାଇ ଠକୁଛନ୍ତି ।