പാലക്കാട് ജില്ലയിൽ മേഘങ്ങള് ഓമനിക്കുന്ന നെല്ലിയാമ്പതി മലനിരകള് ആരേയും ആകര്ഷിക്കുന്ന കാഴ്ചയാണ്. നല്ല കാലാവസ്ഥയ്ക്കൊപ്പം തേയില, ഏലം, കാപ്പി തോട്ടങ്ങളും കണ്ട് ആസ്വദിക്കാം. വന്യജീവികളുടെയും പക്ഷികളുടെയും ആവാസകേന്ദ്രമാണിവിടം.
തിരുവനന്തപുരം ജില്ലയിൽ സ്ഥിതി ചെയ്യുന്ന പൊന്മുടി കാട്ടുപൂക്കളും, ചിത്രശലഭങ്ങളും, അരുവികളും, വെള്ളചാട്ടങ്ങളും ഒക്കെയായി സമ്പന്നമാണ്. ട്രെക്കിങ് നടത്താൻ താത്പര്യമുള്ളവർക്ക് ഒരു പറുദ്ദീസയാണ് പൊന്മുടി.
യുനെസ്കോ ലോകപൈതൃക പദവി നൽകിയ വനപ്രദേശമാണ് പാലക്കാട് സ്ഥിതി ചെയ്യുന്ന സൈലന്റ് വാലി. സസ്യജാലങ്ങളുടെയും മൃഗങ്ങളുടെയും ഒരു വലിയ ലോകമാണ് ഈ ദേശീയോദ്യാനം. ചീവീടുകളുടെ സാന്നിദ്ധ്യം ഇവിടെയില്ലാത്തത് കൊണ്ടാണ് സൈലന്റ് വാലി എന്ന പേര് ലഭിച്ചത്.
രാജ്യത്തെ തന്നെ ആദ്യത്തെ ആസൂത്രിത പരിസ്ഥിതി സൗഹൃദ വിനോദ സഞ്ചാര പദ്ധതിയാണ് കൊല്ലത്ത് സ്ഥിതി ചെയ്യുന്ന തെന്മലയിലേത്. തോട്ടങ്ങളും, കുന്നുകളും, സ്വാഭാവിക വനങ്ങളും ഉള്പ്പെടുന്ന പ്രകൃതി ജാലകമാണ് തേൻ മല എന്ന തെന്മലയിലുള്ളത്
കേരള കായൽ ടൂറിസത്തിൻ്റെ ഹൃദയമാണ് വേമ്പനാട് കായൽ. ഓണക്കാലമെത്തുന്നതോടെ ആർപ്പുവിളികളുമായി വള്ളംകളി മത്സരങ്ങളും ഇവിടെ അരങ്ങേറും. റിസോര്ട്ടുകള്, ഹൗസ്ബോട്ടുകൾ, ബോട്ടിങ് എന്നിങ്ങനെ വേമ്പനാട് നീട്ടുന്നത് അനന്തസാധ്യതകളാണ്.
ആലപ്പുഴയിലെ അധികം അറിയപ്പെടാത്ത ബീച്ച് ഡെസ്റ്റിനേഷനാണ് മാരാരി ബീച്ച്. തെങ്ങിൻതോപ്പുകളാൽ ചുറ്റപ്പെട്ട ഈ മനോഹരമായ ബീച്ചിൽ കടലിനെ ആസ്വദിക്കുന്നതിനോടൊപ്പം വാട്ടർ സ്പോർട്സിലും ഏർപ്പെടാം.
സഞ്ചാരികളെ ഏറെ ആകര്ഷിക്കുന്ന ഒരു പ്രകൃതി സൗഹൃദ വിനോദ സഞ്ചാര പദ്ധതിയാണ് പത്തനംതിട്ടയിലെ ഗവിയിലേത്. ട്രെക്കിംഗ്, വന്യജീവി നിരീക്ഷണം, ഔട്ട് ഡോര് ക്യാമ്പിംഗ്, വനയാത്രകള് എന്നിവയാണ് ഇവിടത്തെ സവിശേഷതകള്.