വാഴയിലയിൽ ഭക്ഷണം കഴിക്കാൻ ഇഷ്ടപ്പെടുന്നവരാണ് മലയാളികൾ. വീടുകളിൽ ഇപ്പോൾ മിക്കവരും പ്ലേറ്റുകളിലേക്ക് മാറിയെങ്കിലും നല്ല നാടൻ സദ്യ കഴിക്കാൻ നമ്മൾ വാഴയില അന്വേഷിക്കും. വാഴയിലയിൽ ഭക്ഷണം കഴിക്കുന്നതിൻ്റെ ഗുണങ്ങൾ അറിയാമോ?
വാഴയിലയ്ക്ക് ആൻ്റി-ബാക്ടീരിയൽ ഗുണങ്ങളുണ്ട്. ചൂടുള്ള ഭക്ഷണം വാഴയിലയിൽ വിളമ്പുമ്പോൾ അതിലെ ആൻ്റി-ബാക്ടീരിയിൽ സംയുക്തങ്ങൾ ആക്ടീവാകുന്നു. ഇത് അണുബാധയുണ്ടാകാനുള്ള സാധ്യത കുറയ്ക്കുന്നു.
വാഴയിലയിൽ പ്രകൃതിദത്ത ആൻ്റി-ഓക്സിഡൻ്റായ പോളിഫിനോൾസ് ധാരാളം അടങ്ങിയിരിക്കുന്നു. ഇലയിൽ ഭക്ഷണം വിളമ്പുമ്പോൾ ഈ പോളിഫിനോൾസ് ഭക്ഷണത്തിലേക്ക് മാറുന്നു.
രോഗങ്ങൾ തടയുന്നതിനും മൊത്തതിലുള്ള ആരോഗ്യം മെച്ചപ്പെടുത്തുന്നതിനും വാഴയിലുള്ള പോളിഫിനോൾസ് സഹായിക്കുന്നു.
വാഴയിലയിൽ ഭക്ഷണം കഴിക്കുമ്പോൾ ഭക്ഷണത്തിൻ്റെ രുചി മെച്ചപ്പെടും. വാഴയിലെ പ്രകൃതിദത്ത മെഴുക് കോട്ടിംഗ് ചൂടുള്ള ഭക്ഷണം വിളമ്പുമ്പോൾ ഉരുകുകയും ഭക്ഷണത്തിന് സ്വാദും മണവും വർധിക്കുകയും ചെയ്യുന്നു.
പാരിസ്ഥിതിക പ്രശ്നങ്ങൾ ചർച്ച ചെയ്യുന്ന ഈ കാലത്തിൽ പ്ലാസ്റ്റിക്കിനും മറ്റ് അജൈവ വസ്തുക്കൾക്കും ബദലായി വാഴയില ഉപയോഗിക്കാവുന്നതാണ്. വാഴയില ബയോഡീഗ്രേഡബിളും പരിസ്ഥിതി സൗഹൃദമായതുമാണ്.
വാഴയിലകൾ ചൂടുള്ള ഭക്ഷണം വിളമ്പാൻ അനുയോജ്യമാണ്. പ്ലാസ്റ്റിക് അല്ലെങ്കിൽ ഫോം പ്ലേറ്റുകളിൽ ചൂട് ഭക്ഷണം വിളമ്പിയാൽ പ്ലേറ്റിലെ ദോഷകരമായ രാസവസ്തുക്കൾ ഭക്ഷണവുമായി കൂടിച്ചേരുകയും ആരോഗ്യം മോശമാക്കുകയും ചെയ്യും.
വാഴയിലയുടെ പച്ചനിറവും ഘടനയും ഭക്ഷണം കഴിക്കുമ്പോൾ മികച്ച അനുഭവും നൽകുന്നു. മൊത്തതിലുള്ള ഡൈനിംഗ് അനുഭവത്തിന് ഇത് സഹായിക്കും.