ഇന്ന് പലരും നേരിടുന്ന പ്രശ്നമാണ് മുടികൊഴിച്ചിൽ. തലമുടിയുടെ ആരോഗ്യത്തിന് ഭക്ഷണം വലിയ ഒരു ഘടകമാണ്. ബയോട്ടിൻ ഭക്ഷണത്തിൽ ഉൾപ്പെടുത്തേണ്ടത് മുടിയുടെ ആരോഗ്യത്തിന് അത്യാവശ്യമാണ്. മുടി വളരുന്നതിനായി ഒരു ബയോട്ടിൻ ഡ്രിങ്ക് വീട്ടിൽ തന്നെ തയ്യാറാക്കിയാലോ?
പ്രോട്ടീൻ, ഒമേഗ 3 ഫാറ്റി ആസിഡ്, ഫൈബർ, ആൻ്റി ഓക്സിഡൻ്റ് എന്നിവയാൽ സമ്പന്നമാണ് ഫ്ലാക്സ് സീഡ്സ്. തലയോട്ടിയെ പോഷിപ്പിക്കാനും മുടി നന്നായി വളരാനും ഫ്ലാക്സ് സീഡ്സ് സഹായിക്കുന്നു.
മുടിയ്ക്ക് ആവശ്യമായ ബയോട്ടിൻ, വൈറ്റമിൻ ബി 7 എന്നിവ ബദാമിൽ ധാരാളമടങ്ങിയിട്ടുണ്ട്. മുടിയെ നല്ല ബലമുള്ളതാക്കാനും പൊട്ടി പോകാതിരിക്കാനും ബദാം സഹായിക്കുന്നു. ആൻ്റി ഓക്സിഡൻ്റായ വൈറ്റമിൻ ഇയും ബദാമിൽ ധാരാളമായി അടങ്ങിയിരിക്കുന്നു.
തലമുടിയുടെ ആരോഗ്യത്തിനും മുടികൊഴിച്ചിലിനും കറുത്ത എള്ള് വളരെ നല്ലതാണ്. എള്ളിലെ ആൻ്റി ഫംഗൽ ഗുണങ്ങൾ മുടി അമിതമായി കൊഴിയുന്നതും കട്ടി കുറഞ്ഞ് പോകുന്നതും ഇല്ലാതാക്കാൻ സഹായിക്കും.
തലയോട്ടിയുടെയും മുടിയുടെയും ആരോഗ്യത്തിന് ആവശ്യമായ നിരവധി പോഷകങ്ങളും മത്തങ്ങയുടെ വിത്തിൽ അടങ്ങിയിട്ടുണ്ട്. ഇതിൽ അടങ്ങിയിരിക്കുന്ന വൈറ്റമിൻ ഇ, ലിനോലെയിക് എന്നീ ആൻ്റിഓക്‌സിഡൻ്റുകൾക്ക് ആൻറി-ഇൻഫ്ലമേറ്ററി ഗുണങ്ങളുമുണ്ട്.
ഫ്ലാക്സ് സീഡ്സ്, മത്തങ്ങ വിത്ത്, ബദാം, കറുത്ത എള്ള്, കശുവണ്ടി എന്നിവ പാത്രത്തിൽ ചൂടാക്കിയെടുക്കുക. തണുത്ത ശേഷം ഒരു ബ്ലെൻഡറിലിട്ട് നന്നായി പൊടിച്ച് എടുക്കുക. മധുരം വേണ്ടവർക്ക് അൽപ്പം പനം കൽക്കണ്ടം കൂടി ചേർത്ത് പൊടിക്കാവുന്നതാണ്.
ഒരു ഗ്ലാസ് പാലിൽ ഈ പൊടി രണ്ട് സ്പൂൺ ചേർത്ത് രണ്ട് ദിവസത്തിൽ ഒരിക്കൽ കുടിക്കാവുന്നതാണ്. ഈ മിക്സ് ഒരു എയർടൈറ്റ് കണ്ടെയ്നറിൽ നിറച്ച് ഫ്രിഡ്ജിൽ ഒരു മാസം വരെ സൂക്ഷിച്ചുവയ്ക്കാവുന്നതാണ്.
ഇവിടെ നൽകിയിരിക്കുന്ന വിവരങ്ങൾ വീട്ടുവൈദ്യങ്ങളും പൊതുവായ വിവരങ്ങളും അടിസ്ഥാനമാക്കിയുള്ളതാണ്. അത് സ്വീകരിക്കുന്നതിന് മുമ്പ് വൈദ്യോപദേശം തേടുക