ശരീരഭാരം കുറയ്ക്കാം, ഹൃദ്രോഗങ്ങളെ തടയാം; അറിയാം, വീഗൻ ഡയറ്റിന്‍റെ ആരോഗ്യ ഗുണങ്ങൾ
നവംബർ ഒന്ന് ലോക വീഗൻ ദിനമായി ആചരിക്കുന്നു. ലോകമെമ്പാടും ഇന്ന് ഏറെ പ്രചാരം നേടിക്കൊണ്ടിരിക്കുന്ന ആഹാരക്രമങ്ങളിലൊന്നാണ് വീഗൻ. നിരവധി സെലബ്രിറ്റികൾ തങ്ങൾ വീഗൻ ഡയറ്റാണ് പിന്തുടരുന്നതെന്ന് വെളിപ്പെടുത്തിയിട്ടുണ്ട്.
മത്സ്യ, മാംസാദികളും പാലും പാലുത്പന്നങ്ങളും പൂർണമായും ഒഴിവാക്കി സസ്യാഹാരം മാത്രം പിന്തുടരുന്നതാണ് വീഗൻ ഡയറ്റ്. ഇവയുടെ ആരോഗ്യഗുണങ്ങൾ നമുക്ക് പരിശോധിക്കാം.
സസ്യാഹാരം ഭാരം കുറയ്ക്കാനും ആരോഗ്യകരമായ ഭാരം നിലനിർത്താനും സഹായിക്കുന്നു. സംസ്കരിച്ച ഭക്ഷണങ്ങൾ ഒഴിവാക്കുന്നുണ്ടെന്ന് ഉറപ്പ് വരുത്തേണ്ടതാണ്.
നാരുകൾ, ഫോളിക് ആസിഡ്, ഫൈറ്റോകെമിക്കൽസ്, ആൻറി-ഓക്സിഡൻറ്സ് എന്നിവയാലെല്ലാം സമ്പന്നമാണ് പച്ചക്കറികൾ. അതിനാൽ ആൻ്റിഓക്‌സിഡൻ്റുകളാൽ സമ്പുഷ്ടമായ വീഗനിസം ഹൃദയാരോഗ്യം നിലനിർത്താൻ സഹായിക്കുന്നു.
കൊളസ്ട്രോൾ, ഹൃദയാഘാതം, ഹൃദ്രോഗങ്ങൾ, പക്ഷാഘാതം എന്നിവയെ അകറ്റുന്നു. പഞ്ചസാരയുടെ അളവ് കുറവായതിനാൽ സസ്യാധിഷ്ഠിത ഭക്ഷണക്രമം ടൈപ്പ് 2 പ്രമേഹ സാധ്യത കുറയ്ക്കും.
എല്ലുകളെ ബലപ്പെടുത്തുന്നതിനും വീഗൻ ഡയറ്റ് സഹായിക്കും. വിറ്റമിൻ-ഡി, വിറ്റമിൻ-കെ, പൊട്ടാസ്യം, മഗ്നീഷ്യം എന്നീ ഘടകങ്ങൾ എല്ലുകളുടെ ആരോഗ്യത്തിന് വേണം. ഇവയെല്ലാം അധികവും സസ്യാഹാരങ്ങളിലൂടെയാണ് ലഭിക്കുന്നത്.
വീഗൻ ഡയറ്റ് പിന്തടരുന്നവരിൽ ക്യാൻസർ ഉണ്ടാകാനുള്ള സാധ്യത കുറവാണ്. വീഗൻ ഡയറ്റിലുള്ളവരിൽ പരിപ്പ്- പയർ വർഗങ്ങൾ, പഴങ്ങൾ, തക്കാളി, നാരുകൾ അടങ്ങിയ ഭക്ഷണങ്ങൾ, വൈറ്റമിൻ-സി അടങ്ങിയ ഭക്ഷണങ്ങൾ കഴിക്കുന്നതാണ് ഇതിന് സഹായകരമാകുന്നത്.
ഈ വാർത്ത പൊതുവായ വിവരങ്ങളെ അടിസ്ഥാനമാക്കിയുള്ളതാണ്. ഒരു മെഡിക്കൽ വിദഗ്ധന്റെ ഉപദേശത്തിന് പകരമല്ല.