മായം ചേർത്തതുമായി ബന്ധപ്പെട്ട വിവാദങ്ങളിൽപ്പെട്ട് രാജ്യം മുഴുവൻ ചർച്ചാവിഷയമായിരിക്കുകയാണ് തിരുപ്പതി ലഡു. ശ്രീ വെങ്കിടേശ്വര ക്ഷേത്രത്തിലെ പ്രസാദമായ തിരുപ്പതി ലഡു വീട്ടിൽ തന്നെ പരീക്ഷിച്ചാലോ? ഏറ്റവും എളുപ്പമായ പാചകക്കുറിപ്പ് ഇതാ.
300 ഗ്രാം ചെറുപയർ മാവ്, മൂന്ന് കപ്പ് നെയ്യ്, അരകിലോ പഞ്ചസാര, 50 ഗ്രാം ബദാം, 100 ഗ്രാം കശുവണ്ടി, 100 ഗ്രാം ഉണക്കമുന്തിരി, 20 ഗ്രാം പഞ്ചസാര കട്ടകൾ, 10 ഗ്രാം ഏലയ്ക്ക, 300 മില്ലി പാൽ, 100 ഗ്രാം അരിപ്പൊടി
ഒരു ചീനച്ചട്ടിയിൽ പാൽ ചൂടാക്കി 250 ഗ്രാം പഞ്ചസാര ചേർക്കുക. പഞ്ചസാര അലിഞ്ഞുപോകുന്നത് വരെ തിളപ്പിക്കുക.
അടുത്തതായി അരിപൊടി പാലിലേക്ക് ചേർത്ത് കട്ടപിടിക്കാതെ നന്നായി ഇളക്കുക.
അതിന് ശേഷം വറുത്ത ചെറുപയർ മാവ് ചേർത്ത് കട്ടപിടിക്കാതെ നന്നായി ഇളക്കുക. ബൂന്തിയുണ്ടാക്കാനുള്ള ബാറ്റർ തയ്യാർ.
ഇനി ഒരു കടായിയിൽ നെയ്യ് ചൂടാക്കി മാവ് കൊണ്ട് ബൂന്തികൾ ഉണ്ടാക്കുക. ഓട്ടയുള്ള തവി ഇതിനായി ഉപയോഗിക്കാവുന്നതാണ്. ചൂടായ അതേ നെയ്യിൽ കശുവണ്ടിയും ബദാമും വറുത്തെടുക്കുക. ഉണക്കമുന്തിരി വറുത്തെടുക്കുമ്പോൾ കരിയാതെ നോക്കണം.
തിരുപ്പതി ലഡുവിൻ്റെ ഘടന ലഭിക്കാനായി വറുത്തെടുത്ത ബൂന്തി മിക്സി ജാറിൽ നന്നായി പൊടിക്കുക.
250 ഗ്രാം പഞ്ചസാരയും വെള്ളവും ഏലയ്ക്കയും ചേർത്ത് തിളപ്പിച്ച് പഞ്ചസാര സിറപ്പുണ്ടാക്കുക. ബൂന്തി പൊടിച്ചതിലേക്ക് ഈ പഞ്ചസാര സിറപ്പ് ചേർത്ത് നന്നായി ഇളക്കുക. ഇതിലേക്ക് വറുത്ത് വച്ച കശുവണ്ടി, ബദാം, ഉണക്കമുന്തിരി, പഞ്ചസാര കട്ട എന്നിവ ചേർക്കുക.
അല്പം നെയ്യ് ചേർത്ത് ഈ മിശ്രിതം നന്നായി ഇളക്കുക. മിശ്രിതം ചൂടായിരിക്കുമ്പോൾ തന്നെ ലഡുവിൻ്റെ രൂപത്തിലേക്ക് ഉരുട്ടി മാറ്റുക. നിങ്ങൾ വീട്ടുലുണ്ടാക്കിയ മായമൊന്നും ചേരാത്ത തിരുപ്പതി ലഡു തയ്യാർ.