പലർക്കും ഉണ്ടാകുന്ന ഒരു രോഗാവസ്ഥയാണ് വായിൽ വരുന്ന പുണ്ണുകൾ. ഇത് മനഷ്യർക്ക് വല്ലാത്ത അവസ്ഥയാണ് ഉണ്ടാക്കുക. ഒന്നും കഴിക്കാനോ കുടിക്കാനോ ഒന്നിനും സാധിക്കാത്ത സാഹചര്യമാണ് ഇത് സൃഷ്ടിക്കുന്നത്. ചിലർക്ക് ഇത് അടിക്കടി വായിൽ രൂപപ്പെടാറുണ്ട്.
ചിലരെ സംബന്ധിച്ച് വായിൽ പുണ്ണ് വരുക എന്നുള്ളത് ഒരു പേടി സ്വപ്നമായി മാറാറുണ്ട് പലപ്പോഴും. എന്നാൽ ഇങ്ങനെ ഇടയ്ക്കിടെ വരുന്ന പുണ്ണുകളെ അവഗണിക്കരുതെന്നാണ് ഡോക്ടർമാർ പറയുന്നത്. കാരണം ഇത് ഏതെങ്കിലും തരത്തിലുള്ള രോഗങ്ങളുടെ തുടക്കമോ രോഗലക്ഷണങ്ങളോ ആകാം.
രോഗങ്ങളുടെ ലക്ഷണങ്ങൾ മാത്രമല്ല വായിൽ ഉണ്ടാകുന്ന പുണ്ണുകൾ ചൂണ്ടിക്കാണിക്കുന്നത്. പലപ്പോഴും നമ്മുടെ ശരീരത്തിലെ ചില പോഷകങ്ങളുടെ അഭാവവും കാണിക്കുന്നു. പ്രധാനമായും വിറ്റാമിൻ ബി12ന്റെ അഭാവം കൊണ്ടും ഈ അവസ്ഥ ഉണ്ടാകാറുണ്ട്.
അടിക്കടി ഉണ്ടാകുന്ന വായിലെ പുണ്ണുകൾ ക്യാൻസറിന്റെ ലക്ഷണവുമാകാം. ഇന്ന് ലോകത്തെ മനുഷ്യർ നേരിടുന്ന രോഗങ്ങളിൽ മുൻപന്തിയിൽ നിൽക്കുന്ന ഒന്നാണ് ക്യാൻസർ. അതിനാൽ തന്നെ വായിൽ പുണ്ണ് ഇടയ്ക്കിടെ വരുന്നുണ്ടെങ്കിൽ തീർച്ചയായും ഒരു ഡോക്ടറെ സമീപിക്കേണ്ടതാണ്.
നിങ്ങളുടെ വായയിൽ ചുവപ്പും വെള്ളയും നിറത്തിൽ പാടുകൾ രൂപപ്പെടുന്നുണ്ടെങ്കിൽ തീർച്ചയായും ഒരു വിദഗ്ധനെ സമീപിക്കേണ്ടത് അനിവാര്യമാണ്. കാരണം വായയിൽ ഉണ്ടാകുന്ന ഈ പാടുകൾ ക്യാൻസറിന്റെ ലക്ഷണമാണ്.
അകാരണമായി വായയിൽ വീക്കമോ വേദനയോ അനുഭവപ്പെടുക. എന്ത് ഭക്ഷണം കഴിക്കുമ്പോഴും വിഴുങ്ങാൻ ബുദ്ധിമുട്ട് നേരിടുക തുടങ്ങയവും വായയിലെ ക്യാൻസറിന്റെ ലക്ഷണമാണ്. അതുപോലെ നാവ് വീങ്ങുക, നാവ് ചലിപ്പിക്കാനുള്ള ബുദ്ധിമുട്ട് എന്നിവയും അനുഭവപ്പെടാം.
വായയിൽ വ്രണങ്ങൾ ഉണ്ടാവുക. എന്തെങകിലും തരത്തിലുള്ള മുറിവുകൾ ഉണ്ടായാൽ അവ ഉണങ്ങാൻ ബുദ്ധിമുട്ട് അനുഭവപ്പെടുക എന്നീ പ്രശ്നങ്ങൾ ഉണ്ടെങ്കിൽ തീർച്ചയായും ഒരു ഡോക്ടറെ സമീപിക്കുക(ശ്രദ്ധിക്കുക: ഇവിടെ നൽിയിരിക്കുന്ന കാര്യങ്ങൾ പൊതുവായ വിവരങ്ങളുടേയും പഠനങ്ങളേയും അടിസ്ഥാനപ്പെടുത്തി ഉള്ളവയാണ്. സീ മീഡിയ ഇത് സ്ഥിരീകരിക്കുന്നില്ല.)