இன்றைய வாழ்க்கை முறை, உணவு பழக்கம் காரணமாக பாலியல் தொடர்பான பிரச்சனைகள் மிகவும் அதிகரித்துள்ளன. இந்நிலையில், ஆண்கள் பாலியல் ஆரோக்கியத்தையும் விந்தணு எண்ணிக்கையையும் பாதிக்கக்கூடும் உணவுகளை தவிர்க்க வேண்டியது அவசியம்.
திடீரென பாலியல் ஆர்வம் குறைந்து போதல், விதைப்பையில் வீக்கம் மற்றும் வலி, விறைப்புக் கோளாறு, திடீர் எடை இழப்பு போன்றவை விந்தணு குறைவாக இருப்பதற்கான அறிகுறிகள் ஆகும்.
ஊட்டச்சத்துக்கள் குறைபாடும் சத்துக்களே இல்லாத, உடலுக்குத் தீங்கு விளைவிக்கும் சில வகை உணவுகளும் அதிகமாக உட்கொள்ளும்போது விந்துவில் உள்ள விந்தணுக்களின் எண்ணிக்கை குறைபாடு ஏற்படுகிறது.
சோயா தயாரிப்புகளில் பைட்டோ ஈஸ்ட்ரோஜன்கள் ( phytoestrogens) அதிகம் உள்ளன. பைட்டோ ஈஸ்ட்ரோஜன்களை அதிகமாக உட்கொள்வது உடலின் ஹார்மோன் சமநிலையை சீர்குலைக்கும்.
விந்தணு குறைபாடுகளுக்காக சிகிச்சை பெற்று வரும் ஆண்களிடம் மேற்கொள்ளப்பட்ட ஆய்வின்படி, அதிகப்படியான சோயா உட்கொள்வதால் விந்தணு குறையக்கூடும் என தெரிய வந்துள்ளது.
பதப்படுத்தப்பட்ட இறைச்சிகளை அதிகமாக எடுத்துக் கொள்வதால், விந்தணுக்களின் எண்ணிக்கை குறைவதாக கூறப்படுகிறது.
பயிர்களில் பயன்படுத்தப்படும், பூச்சிக் கொல்லிகள், ரசாயனங்கள், காய்கறிகள் மற்றும் பழங்களின் மூலம் உணவில் சேருகின்றன. இவை விந்தணுவை பாதிக்கும். இவற்றை உப்பு மற்றும் மஞ்சள் கலந்து நீரில் சுத்தம் செய்து சாப்பிடுவது நல்லது.
பேக்கேஜிங் மற்றும் கேன்களில் உள்ள உணவுகளிலும் பிபிஏ மற்றும் பூச்சிக்கொல்லிகளில் உள்ள ரசாயனங்கள் இரண்டும் ஜீனோஎஸ்ட்ரோஜன்களாக செயல்படுகின்றன. ஜீனோ ஈஸ்ட்ரோஜன்களும் (Xenoestrogens) விந்தணு எண்ணிக்கையை குறைக்கும்.
டிரான்ஸ் கொழுப்பு உள்ள உணவுகள் ஆண்களுக்கும் பெண்களுக்கும் ஆரோக்கியமற்றதாகக் கருதப்படுகின்றன. டிரான்ஸ் கொழுப்புகள் இதய நோய் அபாயத்தை அதிகரிப்பதோடு விந்தணு குறைபாட்டை ஏற்படுத்தும்.
அதிக கொழுப்பு பால் பொருட்கள் அதிகம் எடுத்துக் கொள்வதும் விந்தணுக்களை குறைக்கும். கொழுப்பு நீக்கப்படாத பால், கிரீம் மற்றும் சீஸ் ஆகியவை காரணமாக விந்தணு குறையும்.
அதிகப்படியான உடல் எடை , சில மன ஆரோக்கியம் சார்ந்த பிரச்சினைகள், ஆகியவையும் விந்தணு குறைய காரணமாகின்றன. எனவே, ஆரோக்கியமான வாழ்க்கையை வாழ புத்திசாலித்தனமான மற்றும் சிறந்த உணவு தேர்வுகளை செய்யுங்கள்.