ବିଦାୟ ଦିଲୀପ କୁମାର: ପେଶୱାରର ୟୁସୁଫ୍ ଯିଏ ବନିଯାଇଥିଲେ ବଲିଉଡର ଟ୍ରାଜେଡି କିଙ୍ଗ୍

ନୂଆଦିଲ୍ଲୀ: ଆମ ଗହଣରେ ଆଉ ନାହାଁନ୍ତି ହିନ୍ଦୀ ସିନେ ଜଗତର ପ୍ରସିଦ୍ଧ ତଥା ଭେଟେରାନ୍ ଅଭିନେତା ଦିଲୀପ କୁମାର (Dilip Kumar) । ୯୮ ବର୍ଷ ବୟସରେ ସେ ଆଜି (ବୁଧବାର) ସକାଳେ ଶେଷ ନିଶ୍ୱାସ ତ୍ୟାଗ କରିଛନ୍ତି । ଦିଲୀପ କୁମାର (Dilip Kumar) ଦୀର୍ଘ ସମୟ ଧରି ଅସୁସ୍ଥ ଥିଲେ । ତାଙ୍କୁ ମୁମ୍ବାଇର ଅନେକ ଥର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହା ପୂର୍ବରୁ ଦିଲୀପ କୁମାର ଦୁଇ ଭାଇଙ୍କୁ ହରାଇଥିଲେ, ଉଭୟଙ୍କ କୋରୋନା କାରଣରୁ ମୃତ୍ୟୁ ଘଟିଥିଲା । 

ଅଧିକ ପଢ଼ନ୍ତୁ:-ଦିଲ୍ଲୀରେ ସେଞ୍ଚୁରୀ ମାରିଲା ପେଟ୍ରୋଲ, ଜାଣନ୍ତୁ ଆପଣଙ୍କ ସହରରେ କ'ଣ ରହିଛି ରେଟ୍

ଡିସେମ୍ବର ୧୧, ୧୯୨୨ରେ ବ୍ରିଟିଶ ଇଣ୍ଡିଆର ପେଶୱାରରେ (ବର୍ତ୍ତମାନ ପାକିସ୍ଥାନରେ) ଜନ୍ମଗ୍ରହଣ କରିଥିବା ଦିଲୀପ କୁମାର (Dilip Kumar) ଙ୍କ ପ୍ରକୃତ ନାମ ମହମ୍ମଦ ୟୁସୁଫ ଖାନ (Mohammad Yusuf Khan) । ୟୁସୁଫ ଖାନ ନାଶିକରେ ଅଧ୍ୟୟନ କରିଥିଲେ, ରାଜ କପୁର ତାଙ୍କ ପିଲାଦିନର ବନ୍ଧୁ ଥିଲେ ।  ସେଠାରୁ ବଲିଉଡରେ ଦିଲୀପ କୁମାରଙ୍କ ଯାତ୍ରା ଆରମ୍ଭ ହୋଇଥିଲା । ୨୨ ବର୍ଷ ବୟସରେ ଦିଲୀପ କୁମାର ତାଙ୍କର ପ୍ରଥମ ଚଳଚ୍ଚିତ୍ର ପାଇଥିଲେ । ୧୯୪୪ ମସିହାରେ ସେ 'ଜୱାର ଭାଟା' ଚଳଚ୍ଚିତ୍ରରେ କାମ କରିଥିଲେ, କିନ୍ତୁ ତାଙ୍କ ଚଳଚ୍ଚିତ୍ର ଅଧିକ ଚର୍ଚ୍ଚାରେ ଆସିନଥିଲା ।

ପ୍ରାୟ ପାଞ୍ଚ ଦଶନ୍ଧି ଧରି କ୍ୟାରିଅରରେ ଦିଲୀପ କୁମାର (Dilip Kumar) ପ୍ରାୟ ୬୦ଟି ଚଳଚ୍ଚିତ୍ରରେ କାମ କରିଥିଲେ ।  ଦିଲୀପ କୁମାର ତାଙ୍କ କ୍ୟାରିଅରରେ ଅନେକ ଚଳଚ୍ଚିତ୍ରକୁ ପ୍ରତ୍ୟାଖ୍ୟାନ କରିଥିଲେ, କାରଣ ଦିଲୀପ କୁମାର ବିଶ୍ୱାସ କରୁଥିଲେ ଯେ ଚଳଚ୍ଚିତ୍ର କମ୍ ହେଉ କିନ୍ତୁ ଭଲ ହେବା ଉଚିତ୍ । କିନ୍ତୁ ପ୍ୟାସା, ଦୀୱାର ପରି ଫିଲ୍ମରେ କାମ କରିପାରିନଥିବା କାରଣରୁ ଦିଲୀପ କୁମାର ମଧ୍ୟ ଦୁଃଖିତ ଥିଲେ ।

ଅଧିକ ପଢ଼ନ୍ତୁ:-ସୁନା-ରୁପା ମୂଲ୍ୟରେ ସାମାନ୍ୟ ପରିବର୍ତ୍ତନ, ଜାଣନ୍ତୁ କ'ଣ ରହିଛି ରେଟ୍

ଦିଲୀପ କୁମାର ସାଇରା ବାନୁ (Saira Banu) ଙ୍କୁ ୧୯୬୬ ମସିହାରେ ବିବାହ କରିଥିଲେ, ଯିଏ କି ଜଣେ ଅଭିନେତ୍ରୀ ମଧ୍ୟ ଥିଲେ । ଯେତେବେଳେ ଦୁହେଁ ବିବାହ କରିଥିଲେ ସେତେବେଳେ ସାଇରା ବାନୁ ଦିଲୀପ କୁମାରଙ୍କ ଠାରୁ ୨୨ ବର୍ଷ ସାନ ଥିଲେ । ଦିଲୀପ କୁମାର ମଧ୍ୟ ଆସମା ସାହିବାଙ୍କୁ ବିବାହ କରିଥିଲେ, ଯଦିଓ ଏହି ବିବାହ କେବଳ ୧୯୮୩ ପର୍ଯ୍ୟନ୍ତ ଚାଲିଥିଲା । କିନ୍ତୁ ସାଇରା ବାନୋଙ୍କ ସହ ଦିଲୀପ କୁମାରଙ୍କ ସାଥ୍ ଶେଷ ନିଃଶ୍ୱାସ ପର୍ଯ୍ୟନ୍ତ ରହିଲା । ସାଇରା ବାନୁ ଡାକ୍ତରଖାନାରୁ ଦିଲୀପ କୁମାରଙ୍କ ସ୍ୱାସ୍ଥ୍ୟକୁ ନେଇ କ୍ରମାଗତ ଭାବରେ ପ୍ରଶଂସକଙ୍କୁ ଅପଡେଟ୍ ଦେଉଥିଲେ ।

ଅଧିକ ପଢ଼ନ୍ତୁ:-ପୁଣି କୋରୋନା ମାମଲାରେ ବୃଦ୍ଧି: ଦେଶରେ ଦିନକରେ ଚିହ୍ନଟ ହେଲେ ଏତିକି ସଂକ୍ରମିତ, ଆଖି ବୁଜିଲେ ୯୦୦ରୁ ଉର୍ଦ୍ଧ୍ୱ ଲୋକ

ଉଲ୍ଲେଖଥାଉ କି, ସାଇରାଙ୍କୁ ବିବାହ କରିବା ପୂର୍ବରୁ ଦିଲୀପ କୁମାର ମଧୁବାଲା (Madhubala) ଙ୍କୁ ବହୁତ ଭଲ ପାଉଥିଲେ । ମଧୁବାଲା ଓ ଦିଲୀପ କୁମାରଙ୍କ ପ୍ରେମ କାହାଣୀ ୧୯୫୧ ଚଳଚ୍ଚିତ୍ର 'ତରାନା'ର ସେଟରେ ଆରମ୍ଭ ହୋଇଥିଲା । ମଧୁବାଲା ଓ ଦିଲୀପ କୁମାର ପ୍ରଥମ ଦେଖାରେ ପ୍ରେମରେ ପଡିଥିଲେ । କୁହାଯାଏ ଯେ ମଧୁବାଲା ଦିଲୀପ କୁମାରଙ୍କୁ ଗୋଲାପ ଫୁଲ ଏବଂ ଏକ ଚିଠି ପଠାଇଥିଲେ ।

ସ୍ମରଣୀୟ ଚଳଚ୍ଚିତ୍ର ...

ଜୱାର ଭାଟାରୁ ଦିଲୀପ କୁମାରଙ୍କ କ୍ୟାରିୟର ଆରମ୍ଭ ହୋଇଥିଲା । ଏହା ପରେ ତାଙ୍କ ସ୍ମରଣୀୟ ଚଳଚ୍ଚିତ୍ରଗୁଡ଼ିକ ହେଲା ସହିଦ, ମେଲା, ନଦିଆ କେ ପ୍ୟାର, ବାବୁଲ, ଫୁଟପଥ, ଦେବଦାସ, ନୟା ଦୌର, ମୋଗଲ-ଏ-ଆଜମ, ଗଙ୍ଗା-ଯମୁନା, ରାମ ଅର ଶ୍ୟାମ, କର୍ମା । ଦିଲୀପ କୁମାରଙ୍କ ଶେଷ ଚଳଚ୍ଚିତ୍ର ଥିଲା କିଲା, ଯାହା ୧୯୮୯ରେ ଆସିଥିଲା ।

ବଲିଉଡର ଟ୍ରାଜେଡି କିଙ୍ଗ୍

୧୯୪୪ ମସିହାରେ ଚଳଚ୍ଚିତ୍ର 'ଜୱାର-ଭାଟା'ରୁ ଚଳଚ୍ଚିତ୍ରରେ ଡେବ୍ୟୁ କରିଥିବା ଦିଲୀପ କୁମାରଙ୍କୁ ତାଙ୍କ ଅଭିନୟ ହେତୁ ଟ୍ରାଜେଡି କିଙ୍ଗ୍ କୁହାଯାଏ । 'ଦାଗ୍' (1952), 'ଦେବଦାସ' (1955) ପରି ଦୁଃଖଦ ଭୂମିକା ଉପରେ ଆଧାରିତ ତାଙ୍କର ଅନେକ ସିନେମା ବଡ଼ ହିଟ୍ ହୋଇଥିଲା । ଏହା ପରେ ଅନ୍ୟ ନିର୍ମାତାମାନେ ମଧ୍ୟ ଦିଲୀପ କୁମାରଙ୍କ ସହ ସମାନ ଥିମ୍ ଉପରେ ଫିଲ୍ମ କରିବା ଆରମ୍ଭ କରିଥିଲେ ।

କ୍ରମାଗତ ଟ୍ରାଜିକ୍ ରୋଲ କରିବା ହେତୁ ଦିଲୀପ ସାହେବ ବାସ୍ତବ ଜୀବନରେ ଡିପ୍ରେଶନରେ ଆସିଯାଇଥିଲେ । ନିଜେ ଏହି ସମସ୍ୟାରୁ ବାହାରିବାରେ ବିଫଳ ହେବା ପରେ ସେ ଜଣେ ମାନସିକ ରୋଗ ବିଶେଷଜ୍ଞଙ୍କ ନିକଟକୁ ଯାଇଥିଲେ । ସେ ଜଣେ ମନସ୍ତତ୍ତ୍ୱବିତଙ୍କଠାରୁ ପରାମର୍ଶ ନେଲେ ଯେ ଦୁଃଖଦ ଚଳଚ୍ଚିତ୍ର ପରିବର୍ତ୍ତେ ସେ କିଛି କମେଡି ଚଳଚ୍ଚିତ୍ର କରିବା ଉଚିତ୍ । ଦିଲୀପ କୁମାର ଏହି ପରାମର୍ଶକୁ ଗ୍ରହଣ କରି 'କୋହିନୁର' (1960) ଏବଂ 'ଆଜାଦ' (1955) ପରି କେତେକ ଶ୍ରେଷ୍ଠ କମେଡି ଚଳଚ୍ଚିତ୍ରରେ ଅଭିନୟ କରିଥିଲେ ଏବଂ ଅବସାଦରୁ ବାହାରିଥିଲେ ।