Hockey Men's Junior World Cup: ଆଜିଠାରୁ ରାଜ୍ୟରେ ଜୁନିୟର ହକି ବିଶ୍ୱକପ୍, ରାତି ୮ଟାରେ ଭାରତ-ଫ୍ରାନ୍ସ ମଧ୍ୟରେ ମୁକାବିଲା

ଭୁବନେଶ୍ୱର: Hockey Men's Junior World Cup 2021: ଆଜି ଅର୍ଥାତ ନଭେମ୍ୱର ୨୪ ଠାରୁ ଜୁନିୟର ହକି ଅଣ୍ଡର-19 ବିଶ୍ୱକପ (Hockey Men's Junior World Cup 2021) ର ମହାକୁମ୍ଭ । ରାଜଧାନୀ ଭୁବନେଶ୍ୱର (Bhubaneswar) ଠାରେ ଶୁଭିବ ଚକ ଦେ ଇଣ୍ଡିଆ । ଆସନ୍ତା ଡିସେମ୍ୱର ୫ ତାରିଖ ପର୍ଯ୍ୟନ୍ତ ହେବାକୁ ଥିବା ଏହି ଜୁନିୟର ବିଶ୍ୱକପ ମୁକାବିଲାରେ ବିଶ୍ୱ ବିଜେତା ହେବା ପାଇଁ ଲଢିବେ ୧୬ଟି ଟିମ୍ । ମୋଟ ୪ଟି ପୁଲରେ ବିଭକ୍ତ ହୋଇଛନ୍ତି ସମସ୍ତ ଦଳ । ଆଜି ୫ଟି ମ୍ୟାଚ ହେବାକୁ ଥିବା ବେଳେ ପ୍ରଥମ ମ୍ୟାଚ ସକାଳ ସାଢ଼େ ୯ଟାରେ ବେଲଜିୟମ-ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ । ସେହିପରି ପଞ୍ଚମ ମ୍ୟାଚ ଭାରତ-ଫ୍ରାନ୍ସ ମଧ୍ୟରେ ରାତି ୮ଟା ସମୟରେ ଅନୁଷ୍ଠିତ ହେବ । ସେହିପରି ଦିନ ୧୨ଟା ସମୟରେ ଜର୍ମାନୀ ଓ ପାକିସ୍ତାନ ମଧ୍ୟରେ ଦ୍ୱିତୀୟ ମ୍ୟାଚ ହେବାକୁ ଯାଉଥିବା ବେଳେ ତୃତୀୟ ମ୍ୟାଚ୍ କାନାଡା ଓ ପୋଲାଣ୍ଡ ମଧ୍ୟରେ ଅନୁଷ୍ଠିତ ହେବ । ସେହିପରି ଚତୁର୍ଥ ମ୍ୟାଚ ମାଲେସିଆ ଓ ଚିଲି ମଧ୍ୟରେ ଅନୁଷ୍ଠିତ ହେବ ।

ଏଥର କୋରୋନା କଟକଣା ପାଇଁ ଷ୍ଟାଡିୟମରେ ମ୍ୟାଚ ଦେଖିପାରିବେନି ଦର୍ଶକ । ପ୍ରତି ୨ ଦିନରେ ସମସ୍ତ ଖେଳାଳି, ଅଫିସିଆଲ, ପୋଲିସ, ଗଣମାଧ୍ୟମ ପ୍ରତିନିଧିଙ୍କ RTPCR Test କରାଯିବ । ଦର୍ଶକ ନଆସୁଥିଲେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ପୋଲିସ କମିଶନର ଷ୍ଟାଡିୟମ ସୁରକ୍ଷା ଯାଞ୍ଚ କରିଥିବା ବେଳେ ସୁରକ୍ଷା ପାଇଁ ମୁତୟନ ହେବେ ଡିସିପିଙ୍କ ନେତୃତ୍ୱରେ ୪ ଜଣ ଅତିତିକ୍ତ DCP, ୧୦ ACP, ୭୫ ଅଫିସର ଏବଂ ୨୫ ପ୍ଲାଟୁନ ଫୋର୍ସ । ଖେଳାଳି ରହୁଥିବା ହୋଟେଲ ଠାରୁ ଷ୍ଟାଡିୟମ ପର୍ଯ୍ୟନ୍ତ ରହିବ ଟ୍ରାଫିକ କଟକଣା ।

ପୂର୍ବରୁ ପୁରୁଷ ହକି ବିଶ୍ୱକପ ସହ ହକି ଲିଗ ସଫଳତାର ସହ ଆୟୋଜନ କରି ବିଶ୍ୱର ଦୃଷ୍ଟି ଆକର୍ଷଣ କରି ସାରିଛି ଓଡିଶା । ଏବେ ପୁଣି ଏକ ନୂଆ ସଫଳ ଇତିହାସ ଲିପିବଦ୍ଧ ହେବାକୁ ଯାଉଛି ।