କାହାକୁ ଓ କେତେ ମିଳିବ LPG ସିଲିଣ୍ଡର ଉପରେ ସବସିଡି? ଅର୍ଥମନ୍ତ୍ରୀ ଦେଲେ ଏହି ଜବାବ

LPG Cylinder Subsidy: ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ଅଧୀନରେ ଏଲପିଜି ସଂଯୋଗ ପାଇଁ ନଗଦ ସହାୟତା ଭାରତ ସରକାର ପ୍ରଦାନ କରୁଛନ୍ତି । ତୈଳ ମାର୍କେଟିଂ କମ୍ପାନୀଗୁଡିକ ଦ୍ୱାରା ମାଗଣା ସଂଯୋଗ ସହିତ ଏହି ଯୋଜନାର ସମସ୍ତ ହିତାଧିକାରୀଙ୍କୁ ପ୍ରଥମ ଏଲପିଜି ରିଫିଲ୍ ଓ ଷ୍ଟୋଭ୍ ମାଗଣାରେ ଯୋଗାଇ ଦିଆଯାଉଛି ।

ନୂଆଦିଲ୍ଲୀ: LPG Cylinder Subsidy: କେନ୍ଦ୍ରର ମୋଦି ସରକାର (Modi Government) ଶନିବାର ବଡ଼ ଘୋଷଣା କରିଛନ୍ତି । ସରକାର ପେଟ୍ରୋଲ ଉପରେ ଉତ୍ପାଦନ ଶୁଳ୍କ (Excise Duty Cut on Petrol-Diesel) ୮ ଟଙ୍କା ଓ ଡିଜେଲ ଉପରେ ୭ ଟଙ୍କା ହ୍ରାସ କରିଛନ୍ତି । ଏହି ନିଷ୍ପତ୍ତି ପରେ ବର୍ତ୍ତମାନ ପେଟ୍ରୋଲ ୯.୫ ଟଙ୍କା ଓ ଡିଜେଲ ୭ ଟଙ୍କା ଶସ୍ତା ହୋଇଛି । ଏଥିସହ ସରକାରଙ୍କ ଦ୍ୱାରା ଆଉ ଏକ ବଡ଼ ଘୋଷଣା କରାଯାଇଛି, ଯେଉଁ କାରଣରୁ ଲୋକମାନଙ୍କୁ ବର୍ତ୍ତମାନ ଏଲପିଜି ସିଲିଣ୍ଡର (LPG Cylinder) ଶସ୍ତା ମିଳିବ । ଚଳିତ ବର୍ଷ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା (PM Ujjwala Scheme) ର ପ୍ରାୟ ୯ କୋଟି ହିତାଧିକାରୀଙ୍କୁ ଏଲପିଜି ସବସିଡି ଦେବାକୁ ମୋଦି ସରକାର ନିଷ୍ପତ୍ତି ନେଇଛନ୍ତି । ସରକାର ସେମାନଙ୍କୁ ଗ୍ୟାସ ସିଲିଣ୍ଡର ପିଛା ୨୦୦ ଟଙ୍କା ସବସିଡି ଦେବେ । ଯୋଗ୍ୟ ବ୍ୟକ୍ତିମାନେ ଗୋଟିଏ ବର୍ଷରେ ୧୨ଟି ସିଲିଣ୍ଡର ଉପରେ ଏହି ସବସିଡି ପାଇପାରିବେ ।

ଅର୍ଥମନ୍ତ୍ରୀ ନିର୍ମଳା ସୀତାରମଣ (Finance Minister Nirmala Sitharaman) ଟ୍ୱିଟ୍ କରି କହିଛନ୍ତି ଯେ, ଏହି ସବସିଡି ଦେଶର ମା' ଓ ଭଉଣୀମାନଙ୍କୁ ବହୁତ ସାହାଯ୍ୟ କରିବ । ଏଥିସହ ସରକାରଙ୍କ ବାର୍ଷିକ ପ୍ରାୟ ୬,୧୦୦ କୋଟି ଟଙ୍କା ଖର୍ଚ୍ଚ ହେବ । ଆସନ୍ତୁ ବିସ୍ତୃତ ଭାବରେ ଜାଣିବା ଯେ ଏହି LPG ସବସିଡିର ଲାଭ କିଏ ଓ କେତେ ପାଇବେ ।

ସୂଚନାଯୋଗ୍ୟ, ଜୁନ ୨୦୨୦ରେ ଏଲପିଜି ସିଲିଣ୍ଡର ଉପରେ ସବସିଡି (LPG Cylinder Subsidy) ବନ୍ଦ ହୋଇଯାଇଥିଲା । ସେବେଠାରୁ ଉଜ୍ଜ୍ୱଳା ଯୋଜନାର ହିତାଧିକାରୀମାନେ ବଜାର ମୂଲ୍ୟରେ ଏଲପିଜି ସିଲିଣ୍ଡର କିଣୁଥିଲେ । ଜାତୀୟ ରାଜଧାନୀ ଦିଲ୍ଲୀ ବିଷୟରେ କହିବାକୁ ଗଲେ ବର୍ତ୍ତମାନ ଏଠାରେ ୧୪.୨ କିଲୋଗ୍ରାମ ଏଲପିଜି ସିଲିଣ୍ଡରର ମୂଲ୍ୟ ୧,୦୦୩ ଟଙ୍କା ରହିଛି । ବର୍ତ୍ତମାନ ସରକାରଙ୍କ ଏହି ଘୋଷଣା ପରେ ସିଲିଣ୍ଡର ପିଛା ୨୦୦ ଟଙ୍କା ସବସିଡି ସିଧାସଳଖ ଉଜ୍ଜ୍ୱଳା ଯୋଜନାର ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ ଜମା ହେବ । ଏହିପରି ସେମାନଙ୍କ ପାଇଁ ଗୋଟିଏ LPG ସିଲିଣ୍ଡରର ମୂଲ୍ୟ ୮୦୩ ଟଙ୍କା ହେବ । 

ମେ ୨୦୧୬ରେ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଦ୍ୱାରା ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା (PMUY) ଆରମ୍ଭ କରାଯାଇଥିଲା । ଏଥିରେ ଗ୍ରାମାଞ୍ଚଳର ଗରିବ ପରିବାରକୁ ସ୍ୱଚ୍ଛ ଇନ୍ଧନ ଆକାରରେ LPG ସଂଯୋଗ ମିଳିଥାଏ । ଏହି ଯୋଜନାର ୱେବସାଇଟରେ ଉପଲବ୍ଧ ସୂଚନା ଅନୁଯାୟୀ, ଏପ୍ରିଲ୍ ୨୫ ପର୍ଯ୍ୟନ୍ତ ପ୍ରାୟ ୯.୧୭ କୋଟି LPG ସଂଯୋଗ ଜାରି ହୋଇସାରିଛି । ଦେଶର ୯ କୋଟି ହିତାଧିକାରୀ ଯେଉଁମାନେ ପୂର୍ବରୁ କାଠ, କୋଇଲା ଇତ୍ୟାଦିରେ ରୋଷେଇ କରୁଥିଲେ, ସେମାନେ ବର୍ତ୍ତମାନ ଏଲପିଜି ଗ୍ୟାସ୍ ମାଧ୍ୟମରେ ରୋଷେଇ କରୁଛନ୍ତି । ଏହା ମହିଳାଙ୍କ ସ୍ୱାସ୍ଥ୍ୟ ଉପରେ ମଧ୍ୟ ବହୁତ ସକାରାତ୍ମକ ପ୍ରଭାବ ପକାଇଛି ।

ଏହା ବି ପଢ଼ନ୍ତୁ:-ଚିନ୍ତନ ଶିବିର ପରେ କଂଗ୍ରେସର ବଢ଼ିଲା ଚିନ୍ତା, ବର୍ତ୍ତମାନ ଦଳ ନେବାକୁ ଯାଉଛି ଏହି ପଦକ୍ଷେପ

ଏହା ବି ପଢ଼ନ୍ତୁ:-ଗଡକରୀ କଲେ ଏପରି ଘୋଷଣା, ଖୁସିରେ ନାଚି ଉଠିବେ କାର-ବାଇକ୍ ଚାଳକ

ଏହା ବି ପଢ଼ନ୍ତୁ:-ଏହି ଲୋକମାନେ ରାଜଧାନୀରୁ କିଣିବେ ମଦ ତ ସିଧା ଯିବେ ଜେଲ!

ଏହି ଯୋଜନା ଅନ୍ତର୍ଗତ ୧୪ ସୂତ୍ରୀୟ ଘୋଷଣା ଅନୁଯାୟୀ, ଏସସି ପରିବାର, ଏସଟି ପରିବାର, ପ୍ରଧାନମନ୍ତ୍ରୀ ଆୱାସ ଯୋଜନା (ଗ୍ରାମୀଣ), ଅତି ପଛୁଆ ବର୍ଗ, ଅନ୍ତ୍ୟେଦୟ ଅନ୍ନ ଯୋଜନା (AAY) ଏବଂ ଚା' ଏବଂ ପୂର୍ବତନ ଚା' ବଗିଚାରେ କାର୍ଯ୍ୟକରୁଥିବା ବୟସ୍କ ମହିଳା, ଜନଜାତି, ବନବାସୀ, ଦ୍ୱୀପପୁଞ୍ଜ ଏବଂ ନଦୀ ଦ୍ୱୀପରେ ରହୁଥିବା ଲୋକମାନେ, SECC ପରିବାର (AHL TIN) ଏବଂ ଗରିବ ପରିବାର ଏହାର ଲାଭ ଉଠାଇ ପାରିବେ । ଏହି ଯୋଜନାର ଲାଭ ଉଠାଇବାକୁ ଆବେଦନକାରୀଙ୍କୁ ୧୮ ବର୍ଷ ବୟସ ହେବା ଆବଶ୍ୟକ । ଆହୁରି ମଧ୍ୟ ଗୋଟିଏ ଘରେ କେବଳ ଗୋଟିଏ LPG ସଂଯୋଗ ମିଳିବ । 

ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ଅଧୀନରେ ଏଲପିଜି ସଂଯୋଗ ପାଇଁ ନଗଦ ସହାୟତା ଭାରତ ସରକାର ପ୍ରଦାନ କରୁଛନ୍ତି । ତୈଳ ମାର୍କେଟିଂ କମ୍ପାନୀଗୁଡିକ ଦ୍ୱାରା ମାଗଣା ସଂଯୋଗ ସହିତ ଏହି ଯୋଜନାର ସମସ୍ତ ହିତାଧିକାରୀଙ୍କୁ ପ୍ରଥମ ଏଲପିଜି ରିଫିଲ୍ ଓ ଷ୍ଟୋଭ୍ ମାଗଣାରେ ଯୋଗାଇ ଦିଆଯାଉଛି ।