ବିଦାୟ ମିଲଖା ସିଂହ: ପ୍ରଥମ ଧାବକ ଯିଏ ଦୌଡୁନଥିଲେ, ଉଡୁଥିଲେ

ମିଲଖା ସିଂହ (Milkha Singh) ନଭେମ୍ୱର ୨୦,୧୯୨୯ରେ ପାକିସ୍ତାନର ଗୋବିନ୍ଦାପୁରାରେ ଏକ ଶିଖ୍ ପରିବାରରେ ଜନ୍ମ ଗ୍ରହଣ କରିଥିଲେ ।

ନୂଆଦିଲ୍ଲୀ: ଯେତେବେଳେ ଭାରତୀୟ ଖେଳ ବିଷୟରେ ଉଲ୍ଲେଖ ହେବ ମିଲଖା ସିଂହ (Milkha Singh) ଙ୍କ ନାମ ତାଲିକାର ଶୀର୍ଷରେ ଲେଖାଯିବ । ସେ ଦେଶର ପ୍ରଥମ ଟ୍ରାକ ଆଣ୍ଡ ଫିଲ୍ଡ ସୁପରଷ୍ଟାର ଥିଲେ । ଶୁକ୍ରବାର ରାତିରେ ମିଲଖା ସିଂହ ଚଣ୍ଡିଗଡ଼ରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ମିଲଖା ସିଂହଙ୍କ କ୍ୟାରିୟରର ସବୁଠାରୁ ବଡ଼ ସ୍ମରଣୀୟ ମୂହୁର୍ତ୍ତ ସେତେବେଳେ ଆସିଥିଲା ଯେତେବେଳେ ସେ ୧୯୬୦ର ରୋମ ଅଲିମ୍ପିକ୍ସରେ ସେକେଣ୍ଡର କିଛି ଅଂଶରୁ ପଦକରୁ ବଞ୍ଚିତ ହୋଇଥିଲେ । ମିଲଖା ସିଂହ ନଭେମ୍ୱର ୨୦,୧୯୨୯ରେ ପାକିସ୍ତାନର ଗୋବିନ୍ଦାପୁରାରେ ଏକ ଶିଖ୍ ପରିବାରରେ ଜନ୍ମ ଗ୍ରହଣ କରିଥିଲେ । 

ଅଧିକ ପଢ଼ନ୍ତୁ:-ଦେଶରେ ୭୪ ଦିନ ପରେ ସବୁଠାରୁ କମ୍ କୋରୋନା ମାମଲା ଚିହ୍ନଟ, ଏତିକି ସଂକ୍ରମିତଙ୍କ ମୃତ୍ୟୁ

୨୦୦ ମିଟର ଓ ୪୦୦ ମିଟର ଜାତୀୟ ରେକର୍ଡ 

ମିଲଖା ସିଂହ (Milkha Singh) ୧୯୫୬ ମେଲବୋର୍ଣ୍ଣ ଅଲିମ୍ପିକ୍ସରେ ନୂଆ ପ୍ରତିଭା ଭାବରେ ପହଞ୍ଚିଥିଲେ । ସେହି ବର୍ଷ ତାଙ୍କର ପ୍ରଦର୍ଶନ ଭଲ ନଥିଲା । କିନ୍ତୁ ଆଗାମୀ ବର୍ଷଗୁଡିକରେ ମିଲଖା ନା କେବଳ ନିଜକୁ ପରିବର୍ତ୍ତନ କରିଥିଲେ ବରଂ ନିଜ ନାମରେ ଅନେକ ରେକର୍ଡ ମଧ୍ୟ କରିଥିଲେ । ୨୦୦ ମିଟର ଓ ୪୦୦ ମିଟର ଜାତୀୟ ରେକର୍ଡ ମିଲଖାଙ୍କ ନାମରେ ଥିଲା । ତେବେ ମିଲଖା କେବଳ ରୋମ ଅଲିମ୍ପିକ୍ସ ଯୋଗୁଁ ମହାନ ନଥିଲେ । ଭାରତୀୟ ଟ୍ରାକ୍ ଆଣ୍ଡ ଫିଲ୍ଡରେ ମିଲଖାଙ୍କ ସଫଳତା ଅତୁଳନୀୟ ।

ଏସିଆରେ ଥିଲା ମିଲଖାଙ୍କ ଦବଦବା 

ମିଲଖା ସିଂହ ଜଣେ ଏପରି ଆଥଲେଟ୍ ଥିଲେ ଯିଏ ଅତ୍ୟନ୍ତ ଉତ୍ସାହୀ ଓ ଉତ୍ସର୍ଗୀକୃତ ଥିଲେ । ସେ ୧୯୫୮ ଟୋକିଓ ଏସୀୟ ଗେମ୍ସରେ ୨୦୦ ମିଟର ଓ ୪୦୦ ମିଟରରେ ସ୍ୱର୍ଣ୍ଣ ପଦକ ଜିତିଥିଲେ । ମେଲବୋର୍ଣ୍ଣ ଅଲିମ୍ପିକ୍ସରେ ମିଲଖା ଫାଇନାଲ ଇଭେଣ୍ଟ ପାଇଁ ଯୋଗ୍ୟତା ଅର୍ଜନ କରିପାରି ନଥିଲେ । କିନ୍ତୁ ତାଙ୍କ ମଧ୍ୟରେ ଆଗକୁ ବଢିବାର ଅଲଗା ଉତ୍ସାହ ଥିଲା । ସେ ଆମେରିକାର ଚାର୍ଲ୍ସ ଜେନକିନସଙ୍କ ସହ କଥା ହୋଇଥିଲେ । ଜେନକିନସ୍ ୪୦୦ ମିଟର ଓ ୪x୪୦୦ ମିଟର ରିଲେରେ ସ୍ୱର୍ଣ୍ଣ ପଦକ ବିଜେତା ଥିଲେ । ସେ ଜେନକିନସଙ୍କୁ ପଚାରିଥିଲେ କି ସେ କିପରି ଟ୍ରେନ୍ କରନ୍ତି । ତାଙ୍କର ରୁଟିନ୍ କ’ଣ ରହିଛି? ଜେନକିନସ୍ ବଡ଼ ହୃଦୟ ଦେଖାଇ ମିଲଖା ସହିତ ସବୁକିଛି ସେୟାର କରିଥିଲେ ।

ଏସିଆନ୍ ଗେମ୍ସରେ ସୃଷ୍ଟି କରିଥିଲେ ଜାତୀୟ ରେକର୍ଡ

ମିଲଖାଙ୍କ ବୟସ ସେତେବେଳେ ୨୭ ବର୍ଷ ହୋଇଥିଲା । ପରବର୍ତ୍ତୀ ଦୁଇ ବର୍ଷ ଅତି ଯତ୍ନର ସହ ସେ ଜିନକିନ୍ସଙ୍କ ରୁଟିନକୁ ଅନୁସରଣ କରିଥିଲେ । ଏହାର ଲାଭ ମଧ୍ୟ ହୋଇଥିଲା । ୧୯୫୮ ଏସିଆନ୍ ଗେମ୍ସରେ ମିଲଖା ଜାତୀୟ ରେକର୍ଡ ସୃଷ୍ଟି କରିଥିଲେ । ମିଲଖା ସିଂହଙ୍କୁ ୪୦୦ ମିଟର ଦୌଡିବାକୁ ବହୁତ ପସନ୍ଦ ଥିଲା । ଏଥିରେ ସେ ୪୭ ସେକେଣ୍ଡରେ ସ୍ୱର୍ଣ୍ଣ ପଦକ ଜିତିଥିଲେ । ରୌପ୍ୟ ପଦକ ଜିତିଥିବା ପାବଲୋ ସୋମ୍ବଲିଙ୍ଗୋଙ୍କଠାରୁ ମିଲଖା ସିଂହ ପ୍ରାୟ ଦୁଇ ସେକେଣ୍ଡ କମ୍ ସମୟ ନେଇଥିଲେ ।

ଅଧିକ ପଢ଼ନ୍ତୁ:-ତିନିମାସ ପରେ ଦେଶରେ ଆସିପାରେ କୋରୋନାର ତୃତୀୟ ଲହର, ଚେତାବନୀ ଦେଲେ ବିଶେଷଜ୍ଞ

ଚିର ପ୍ରତିଦ୍ୱନ୍ଦ୍ୱୀ ପାକିସ୍ତାନର ଅବଦୁଲ ଖାଲିଦଙ୍କୁ କରିଥିଲେ ପରାସ୍ତ

ଦ୍ୱିତୀୟ ସ୍ୱର୍ଣ୍ଣ ପଦକ ଆହୁରି ଖାସ୍ ଥିଲା । ୨୦୦ ମିଟର ଦୌଡ଼ରେ ମିଲଖା ଚିର ପ୍ରତିଦ୍ୱନ୍ଦ୍ୱୀ ପାକିସ୍ତାନର ଅବଦୁଲ ଖାଲିଦଙ୍କୁ ପରାସ୍ତ କରିଥିଲେ । ଖାଲିଦ ଗେମ୍ସର ଏକ ନୂତନ ରେକର୍ଡ ସହିତ ୧୦୦ ମିଟରରେ ସ୍ୱର୍ଣ୍ଣ ପଦକ ଜିତିଥିଲେ । ଖାଲିଦଙ୍କୁ ଏସିଆର ଶ୍ରେଷ୍ଠ ସ୍ପ୍ରିଣ୍ଟର୍ କୁହାଯାଉଥିଲା । କିନ୍ତୁ ମିଲଖା ଭଲ ଫର୍ମରେ ଥିଲେ । ସେ ମାତ୍ର ୨୧.୬ ସେକେଣ୍ଡରେ ସ୍ୱର୍ଣ୍ଣ ପଦକ ଜିତି ଏସିଆନ ଗେମ୍ସରେ ଏକ ନୂତନ ରେକର୍ଡ ସୃଷ୍ଟି କରିଥିଲେ । ଫିନିସିଂ ଲାଇନରେ ଗୋଡର ମାଂସପେଶୀରେ ସମସ୍ୟା ଦେଖାଯିବାରୁ ସେ ତଳେ ପଡ଼ିଯାଇଥିଲେ । ସେ ୦.୧ ସେକେଣ୍ଡର ବ୍ୟବଧାନରେ ଜିତିଥିଲେ ।

କମନୱେଲଥ ଗେମ୍ସରେ ରଚିଥିଲେ ଇତିହାସ

ଏସିଆନ୍ ଗେମ୍ସରେ ଦୁଇଟି ସ୍ୱର୍ଣ୍ଣ ପଦକ ଜିତିବା ପରେ ମିଲଖାଙ୍କ ଆତ୍ମ ବିଶ୍ୱାସ ବଢ଼ିଯାଇଥିଲା । ବର୍ତ୍ତମାନ ସମୟ ଥିଲା କମନୱେଲଥ ଗେମ୍ସର । ଏହି ଗେମ୍ସରେ ମିଲଖା ସେହି ଲକ୍ଷ୍ୟ ହାସଲ କରିଥିଲେ ଯାହା ଆଜି ପର୍ଯ୍ୟନ୍ତ ଭାରତୀୟ ଆଥଲେଟିକ୍ସ ଦୁନିଆର ଏକ ସ୍ମରଣୀୟ ମୂହୁର୍ତ୍ତ ଅଟେ । ଏସିଆନ୍ ଗେମ୍ସରେ ତାଙ୍କର ସଫଳତା ଆଶ୍ଚର୍ଯ୍ୟଜନକ ଥିଲା । କିନ୍ତୁ କମନୱେଲଥ ଗେମ୍ସରେ ଯାହାକୁ 'ଏମ୍ପାୟର ଗେମ୍ସ' କୁହାଯାଉଥିଲା, ମିଲଖାଙ୍କ ପାଖରେ ନିଜକୁ ଦୁନିଆର କେତେକ ଶ୍ରେଷ୍ଠ ଆଥଲେଟଙ୍କ ଆଗରେ ପ୍ରମାଣ କରିବାର ସୁଯୋଗ ଥିଲା ।

ଅଧିକ ପଢ଼ନ୍ତୁ:-ରାଜଧାନୀରେ ପୁଣି କମିଲା ସୁନା-ରୁପା ଦର, ଜାଣନ୍ତୁ କ'ଣ ରହିଛି ରେଟ୍

ଜିତିଥିଲେ ସ୍ୱର୍ଣ୍ଣ ପଦକ, କିନ୍ତୁ କରିନଥିଲେ ଆଶା

ବହୁ ବର୍ଷ ପୂର୍ବେ ଟାଇମ୍ସ ଅଫ୍ ଇଣ୍ଡିଆକୁ ଦେଇଥିବା ଏକ ସାକ୍ଷାତକାରରେ ମିଲଖା କହିଥିଲେ ଯେ, "ମୋର ବିଶ୍ୱାସ ନଥିଲା ଯେ ମୁଁ କମନୱେଲଥ ଗେମ୍ସରେ ସ୍ୱର୍ଣ୍ଣ ପଦକ ଜିତିବି । ମୋର ବିଶ୍ୱାସ ଏଥିପାଇ ମଧ୍ୟ ନଥିଲା କାରଣ ମୁଁ ବିଶ୍ୱ ରେକର୍ଡଧାରୀ ମେଲକମ୍ ସ୍ପେନ୍ସଙ୍କ ସହ ଦୌଡୁଥିଲି । ସେ ୪୦୦ ମିଟରରେ ସର୍ବୋତ୍ତମ ସ୍ପ୍ରିଣ୍ଟର୍ ବା ଧାବକ ଥିଲେ । ମିଲଖାଙ୍କ ଆମେରିକୀୟ କୋଚ୍ ଡକ୍ଟର ଆର୍ଥର୍ ହାୱାର୍ଡ ସ୍ପେନ୍ସଙ୍କ ରଣନୀତିକୁ  ବୁଝି ନେଇଥିଲେ । ସେ ଦେଖିଲେ ଯେ ସେ ଶେଷରେ ଦ୍ରୁତ ଗତିରେ ଦୌଡ଼ୁଥିଲେ । ଏପରି ପରିସ୍ଥିତିରେ ସେ ମିଲଖାଙ୍କୁ ପୁରା ରେସରେ ସମସ୍ତ ଶକ୍ତି ସହିତ ଦୌଡ଼ିବାକୁ କହିଥିଲେ । ମିଲଖାଙ୍କ କୌଶଳ ସଫଳ ହୋଇଥିଲା । ଏବଂ ୪୪୦ ଗାର୍ଡ ଦୌଡ଼ରେ ମିଲଖା ଆରମ୍ଭରୁ ଶେଷ ପର୍ଯ୍ୟନ୍ତ ଆଗରେ ଥିଲେ । ଏହି ସମୟ ମଧ୍ୟରେ ସେ ୪୬.୬ ସେକେଣ୍ଡ ସମୟ ନେଇ ଏକ ନୂତନ ଜାତୀୟ ରେକର୍ଡ ମଧ୍ୟ ସୃଷ୍ଟି କରିଥିଲେ ।

୫୨ ବର୍ଷ ଧରି ରହିଥିଲା ମିଲଖାଙ୍କ ରେକର୍ଡ 

କମନୱେଲଥ ଗେମ୍ସରେ ଟ୍ରାକ୍ ଆଣ୍ଡ ଫିଲ୍ଡରେ ସ୍ୱର୍ଣ୍ଣ ପଦକ ଜିତିଥିବା ମିଲଖା ପ୍ରଥମ ଭାରତୀୟ ଥିଲେ । ତାଙ୍କର ରେକର୍ଡ ୫୨ ବର୍ଷ ଧରି ରହିଥିଲା ​।  ୨୦୧୦ ଗେମ୍ସରେ ଡିସ୍କସ୍ ଥ୍ରୋର୍ କୃଷ୍ଣ ପୁନିଆ ସ୍ୱର୍ଣ୍ଣ ପଦକ ଜିତିଥିଲେ । ଏହା ପରେ ବିକାଶ ଗୌଡା ୨୦୧୪ରେ ସ୍ୱର୍ଣ୍ଣ ପଦକ ଜିତିଥିଲେ । ମିଲଖା ସିଂହଙ୍କ ସ୍ୱର୍ଣ୍ଣ ପଦକ ଜିତିବାକୁ ଅନେକ ଉତ୍ସବ ପାଳନ କରାଯାଇଥିଲା । ତାଙ୍କ ଅନୁରୋଧ କ୍ରମେ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଏକ ଦିନିଆ ଜାତୀୟ ଛୁଟି ଘୋଷଣା କରିଥିଲେ ।

ପୁଣି ଥରେ ଏସିଆନ୍ ଗେମ୍ସରେ ଜଲୱା

୧୯୫୮ ମିଲଖାଙ୍କ କ୍ୟାରିୟରର ସର୍ବୋତ୍ତମ ବର୍ଷ ଥିଲା । ଏହା ପରେ ୧୯୫୯ରେ ସେ ଅନେକ ୟୁରୋପୀୟ ଇଭେଣ୍ଟ ଜିତିଥିଲେ । ସେ ୧୯୬୦ରେ ରୋମ ଅଲିମ୍ପିକ୍ସ ପାଇଁ ପ୍ରସ୍ତୁତ ହେଉଥିଲେ । ଏଠାରେ ସେ କୌଣସି ପଦକ ଜିତିପାରିଲେ ନାହିଁ କିନ୍ତୁ ୪୫.୭୩ ସେକେଣ୍ଡ ସମୟ ନେଇ ସେ ୪୦୦ ମିଟରର ଏକ ନୂତନ ଜାତୀୟ ରେକର୍ଡ ସୃଷ୍ଟି କରିଥିଲେ । ଏହି ଘଟଣା ମିଲଖାଙ୍କର ପରିଚୟ ସହିତ ଯୋଡ଼ି ଯାଇଛି ।

ଯେତେବେଳେ ମିଲଖା ସିଂହଙ୍କୁ ମିଳିଥିଲା ଚ୍ୟାଲେଞ୍ଜ 

୧୯୬୦ର ଏହି ଘଟଣା ପରେ ମିଲଖା ସିଂହ ପୁଣି ଥରେ ଉତ୍ସାହ ଦେଖାଇଲେ । ଏବଂ ୧୯୬୨ର ଜାକର୍ତ୍ତା ଏସିଆନ୍ ଗେମ୍ସରେ ଆଉ ଦୁଇଟି ସ୍ୱର୍ଣ୍ଣ ପଦକ ଜିତିଥିଲେ । ମିଲଖା ପାଇଁ ବଡ ଚ୍ୟାଲେଞ୍ଜ ଭାବେ ତାରକା ମାଖନ ସିଂଙ୍କ ସାମ୍ନାକୁ ଆସିଥିଲେ । ସେହିବର୍ଷ ଜାତୀୟ ଚାମ୍ପିୟନଶିପ୍‌ରେ ମାଖନ୍ ମିଲଖାଙ୍କୁ ପରାସ୍ତ କରିଥିଲେ । ମିଲଖା ପରେ କହିଥିଲେ, "ଯଦି ମୁଁ ଟ୍ରାକରେ କାହାକୁ ଭୟ କରୁଥିଲି, ତେବେ ସେ ମାଖନ୍ ଥିଲେ । ସେ ଜଣେ ମହାନ ଆଥଲେଟ୍ ଥିଲେ । ସେ ମୋର ସର୍ବଶ୍ରେଷ୍ଠ ପ୍ରଦର୍ଶନ କରାଇଥିଲେ ।"

ମିଲଖାଙ୍କ ନାଁରେ ୧୦ ଏସୀୟ ଗୋଲ୍ଡ

ସୂଚନାଯୋଗ୍ୟ, ଏସିଆନ୍ ଗେମ୍ସର ୪୦୦ ମିଟର ଫାଇନାଲ ଦିନ ମିଲଖା ପୁଣି ସ୍ୱର୍ଣ୍ଣ ପଦକ ଜିତିଥିଲେ ଏବଂ ଯୁବ ସାଥୀକୁ ଅଧା ସେକେଣ୍ଡରେ ପରାସ୍ତ କରିଥିଲେ । ଏହି ଯୋଡି ୪x୪୦୦ ମିଟର ଦଳରେ ଏକାଠି ହୋଇଥିଲେ । ସେମାନଙ୍କ ସହ ଦଲଜିତ ସିଂ ଏବଂ ଜଗଦୀଶ ସିଂ ବି ମଧ୍ୟ ଥିଲେ ।  ସେମାନେ ଏସିଆନ୍ ଗେମ୍ସରେ ରେକର୍ଡ ସୃଷ୍ଟି କରି ସ୍ୱର୍ଣ୍ଣ ପଦକ ଜିତିଥିଲେ । ସେମାନେ ୩:୧୦.୨ ସେକେଣ୍ଡ ନେଇଥିଲେ । ଏହିପରି ମିଲଖାଙ୍କ ନାଁରେ ମୋଟ ୧୦ଟି ଏସୀୟ ସ୍ୱର୍ଣ୍ଣ ପଦକ ହୋଇଥିଲା ।