IND vs NZ T20 : ସିରିଜ ପୋଛିଲା ଭାରତ, ରୋହିତଙ୍କ ସଫଳତା ପଛରେ ଅଛି ଏହି ବିଦେଶୀ ଖେଳାଳିଙ୍କ ହାତ

ନୂଆଦିଲ୍ଲୀ: ରବିବାର ନ୍ୟୁଜିଲାଣ୍ଡ ବିପକ୍ଷ ଟି-୨୦ ସିରିଜକୁ ଭାରତୀୟ ଦଳ ୩-୦ରେ ପୋଛିଲା। ଏହା ସହ ରୋହିତ ଶର୍ମା ଜଣେ ମହାନ ଅଧିନାୟକ ଭାବେ ଉଭା ହୋଇଛନ୍ତି। ଭାରତର କିମ୍ବଦନ୍ତୀ ସ୍ପିନର ପ୍ରଜ୍ଞାନ ଓଝା, ରୋହିତ ଶର୍ମାଙ୍କ ଅଧିନାୟକତ୍ୱ ବିଷୟରେ ଏକ ବଡ଼ ଖୁଲାସା କରିଛନ୍ତି। ରୋହିତ ଜଣେ ବଡ଼ ଅଧିନାୟକ ହେବା ପଛରେ ଜଣେ ପୂର୍ବତନ କ୍ରିକେଟରଙ୍କ ହାତ ଥିବା ସେ କହିଛନ୍ତି।

ପୂର୍ବତନ କ୍ରିକେଟର ପ୍ରଜ୍ଞାନ ଓଝା ଭାରତୀୟ ଟି-୨୦ ଦଳର ଅଧିନାୟକ ରୋହିତ ଶର୍ମାଙ୍କ ବିଷୟରେ ଏକ ବଡ଼ ଖୁଲାସା କରିଛନ୍ତି। ସେ କହିଛନ୍ତି ଯେ, ରୋହିତ ଶର୍ମା ଅଧିନାୟକ ହେବା ପଛରେ ଅଷ୍ଟ୍ରେଲିଆର ପୂର୍ବତନ ୱିକେଟ୍ କିପର ତଥା ବ୍ୟାଟ୍ସମ୍ୟାନ୍ ଆଦମ ଗିଲକ୍ରିଷ୍ଟ ଅଛନ୍ତି। ସେ ଆହୁରି କହିଛନ୍ତି, 'ରୋହିତ ଶର୍ମା, ମୁମ୍ବାଇ ଇଣ୍ଡିଆନ୍ସ ପାଇଁ ଏକ ବଡ଼ ଅଧିନାୟକ ଥିଲେ, କିନ୍ତୁ ଆଦମ ଗିଲକ୍ରିଷ୍ଟଙ୍କ ହାତ ଏହା ପଛରେ ଅଛି। ସେ ରୋହିତଙ୍କ ପ୍ରତିଭାକୁ ଚିହ୍ନିଥିଲେ ଏବଂ ତାଙ୍କୁ ଡେକାନ୍ ଚାର୍ଜର୍ସ ହାଇଦ୍ରାବାଦର ଉପ-ଅଧିନାୟକ କରିଥିଲେ।' 

କହିବାକୁ ଗଲେ ରୋହିତ ଶର୍ମା ତାଙ୍କର ଆଇପିଏଲ୍ କ୍ୟାରିଅର୍ ଡେକାନ୍ ଚାର୍ଜର୍ସ ହାଇଦ୍ରାବାଦ ଦଳରୁ ଆରମ୍ଭ କରିଥିଲେ। ସେହି ସମୟରେ ଦଳର ଅଧିନାୟକ ଆଦମ ଗିଲକ୍ରିଷ୍ଟ ଥିଲେ। ଆଇପିଏଲ ଅଧିନାୟକତ୍ୱରେ ଭାରତର କିମ୍ବଦନ୍ତୀ ଓପନର୍ ରୋହିତ ଶର୍ମା, ମୁମ୍ବାଇ ଇଣ୍ଡିଆନ୍ସକୁ ପାଞ୍ଚ ଥର ଟାଇଟଲ ଦେଇଛନ୍ତି। ସେ ଦଳକୁ ବହୁତ ଭଲ ଭାବରେ ବାଛନ୍ତି। ତାଙ୍କର ଛକା ମାରିବାର କଳା ବିଷୟରେ ବିଶ୍ୱ ଅବଗତ ଅଛି। ଯେତେବେଳେ ରୋହିତ ତାଙ୍କ ଫର୍ମରେ ଥାଆନ୍ତି, ସେତେବେଳେ ସେ ସବୁଠୁ ବଡ ବୋଲରଙ୍କୁ ମଧ୍ୟ ପାଣି ପିଆଇ ପାରନ୍ତି।

ରୋହିତ ଶର୍ମା ବର୍ତ୍ତମାନ କେବଳ ଟିମ୍ ଇଣ୍ଡିଆର ନୁହେଁ ବରଂ ବିଶ୍ୱର ଶ୍ରେଷ୍ଠ ଓପନିଂ ବ୍ୟାଟ୍ସମ୍ୟାନ୍ ଅଟନ୍ତି। ଦିନିକିଆ କ୍ରିକେଟରେ ରୋହିତଙ୍କର ତିନୋଟି ଦ୍ୱିଶତକ ରହିଛି। ବର୍ତ୍ତମାନ ଅନ୍ୟ କୌଣସି ବ୍ୟାଟ୍ସମ୍ୟାନ୍ ମଧ୍ୟ ରୋହିତଙ୍କ ଏହି ରେକର୍ଡର ନିକଟତର ନୁହଁନ୍ତି। ରୋହିତ ଟି-୨୦ କ୍ରିକେଟରେ ଚାରୋଟି ଶତକ ହାସଲ କରିଛନ୍ତି। ଦୁନିଆର ସମସ୍ତ ବୋଲରମାନେ ତାଙ୍କ ଆକ୍ରମଣାତ୍ମକ ବ୍ୟାଟିଂକୁ ଭୟ କରୁଛନ୍ତି। ନିକଟରେ ଟି-୨୦ ବିଶ୍ୱକପରେ ଭାରତର ପରାଜୟ ପରେ ବିରାଟ କୋହଲି ଦଳର ଅଧିନାୟକତ୍ୱ ଛାଡିଛନ୍ତି। ଏହା ପରେ ବୋର୍ଡ ରୋହିତ ଶର୍ମାଙ୍କୁ ଟି-୨୦ ଦଳର ନୂତନ ଅଧିନାୟକ ଭାବରେ ଘୋଷଣା କରିଥିଲା। ସେ ସ୍ଥାୟୀ ଅଧିନାୟକ ହେବା ମାତ୍ରେ ନିଜର ଚମତ୍କାରତା ଦେଖାଇବା ଆରମ୍ଭ କରିଛନ୍ତି। ରୋହିତଙ୍କ ଅଧିନାୟକତ୍ୱରେ ଏକ ଯୁବ ଦଳ ଭାରତ-ନ୍ୟୁଜିଲାଣ୍ଡ ବିପକ୍ଷ ସିରିଜର ତିନୋଟି ମ୍ୟାଚ୍ ଜିତିଛି।