ନୂଆଦିଲ୍ଲୀ: Coronavirus in India: ଦେଶରେ ପୁଣି ଆରମ୍ଭ ହେଲା କୋରୋନା ଭୂତାଣୁ (Coronavirus) ର ତାଣ୍ଡବ । ବିଗତ କିଛି ଦିନ ଧରି ଲଗାତର କୋରୋନା ମାମଲା ବଢ଼ିବାରେ ଲାଗିଛି । ଯେମିତି ଲାଗୁଛି ଦେଶରେ ମାରାତ୍ମକ କୋରୋନା ଭୂତାଣୁ ୟୁ-ଟର୍ଣ୍ଣ ନେଇଛି । ବର୍ତ୍ତମାନ ବଢ଼ୁଥିବା ସଂକ୍ରମିତ ମାମଲା ଦେଶର ଲୋକଙ୍କ ଚିନ୍ତା ବଢ଼ାଇ ଦେଇଛି । ଗତ ବର୍ଷ ଅର୍ଥାତ ୧୧ ମାର୍ଚ୍ଚ ୨୦୨୦... ଏହି ତାରିଖ ଥିଲା ଯେତେବେଳେ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) କୋରୋନାକୁ ବୈଶ୍ୱିକ ମହାମାରୀ ବୋଲି ମନେ କରିଥିଲା । ବର୍ତ୍ତମାନ ପରିସ୍ଥିତି ଗତ ବର୍ଷ ଭଳି ସମାନ ହେବାରେ ଲାଗିଛି ।


COMMERCIAL BREAK
SCROLL TO CONTINUE READING

ଅଧିକ ପଢ଼ନ୍ତୁ:-ଜାଣନ୍ତୁ କେବେଠୁ ଆରମ୍ଭ ହେବ ଟ୍ରେନର ସାମାନ୍ୟ ପରିଚାଳନା


ଉତ୍ତରରୁ ଦକ୍ଷିଣ ପର୍ଯ୍ୟନ୍ତ କୋରୋନା ମାମଲା କ୍ରମାଗତ ବଢିବାରେ ଲାଗିଛି । ଯାହା ଆଗାମୀ ଦିନରେ ଦେଶରେ ଆତଙ୍କ ସୃଷ୍ଟି କରିପାରେ । ଆଜି ଅର୍ଥାତ ଶୁକ୍ରବାର ସକାଳ ସ୍ୱାସ୍ଥ୍ୟ ମନ୍ତ୍ରଣାଳୟର ସଦ୍ୟତମ ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଦେଶରେ ୨୩,୨୮୫ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏହା ସହ ୧୧୭ ସଂକ୍ରମିକ ମୃତ୍ୟୁ ବରଣ କରିଛନ୍ତି । ଯାହା ପରେ ଦେଶରେ ବର୍ତ୍ତମାନ ଯାଏ ୧,୧୩,୦୮,୮୪୬ ସଂକ୍ରମିତ ମାମଲା ରିପୋର୍ଟ ହୋଇଛି । ଏଥିରୁ ୧,୦୯,୫୩,୩୦୦ କୋରୋନା ସଂକ୍ରମିତ ସୁସ୍ଥ ହୋଇଛନ୍ତି । ଏହା ବ୍ୟତୀତ ବର୍ତ୍ତମାନ ଯାଏ ଦେଶରେ ୧,୫୮,୩୦୬ ସଂକ୍ରମିତଙ୍କ ମୃତ୍ୟୁ ଘଟିଛି । ଦେଶରେ ବର୍ତ୍ତମାନ ସମୟରେ ୧,୯୭,୨୩୭ ସକ୍ରିୟ କୋରୋନା ମାମଲା ରହିଛି । 


ଅଧିକ ପଢ଼ନ୍ତୁ:-୭ ବର୍ଷରେ ଦୁଇ ଗୁଣ ବଢ଼ିଛି LPG ସିଲିଣ୍ଡର ମୂଲ୍ୟ, ସବସିଡି ମଧ୍ୟ ହୋଇଛି ଶେଷ


ସେପଟେ ଗତକାଲି ୨୨,୮୫୪ ନୂତନ କୋଭିଡ-19 (COVID-19) ମାମଲା ଚିହ୍ନଟ ହୋଇଥିଲା  । ଏହାସହ ୧୨୬ ଜଣ ପ୍ରାଣ ହରାଇଥିଲେ । ବଡ କଥା ହେଉଛି ଏହି ମାମଲାର ୮୫ ପ୍ରତିଶତ ମହାରାଷ୍ଟ୍ର, ଦିଲ୍ଲୀ, ପଞ୍ଜାବ, ହରିୟାଣା, ମଧ୍ୟପ୍ରଦେଶ, ଗୁଜୁରାଟ, କର୍ଣ୍ଣାଟକ ଏବଂ ତାମିଲନାଡୁରୁ ସାମ୍ନାକୁ ଆସିଛି ।


ବୁଧବାର ମହାରାଷ୍ଟ୍ରରେ ୧୩ ହଜାର ୬୫୯ ନୂତନ କୋରୋନା ମାମଲା ସାମ୍ନାକୁ ଆସିଥିଲା । ଯାହା ପାଞ୍ଚ ମାସ ମଧ୍ୟରେ ସର୍ବାଧିକ ଥିଲା । ଦିଲ୍ଲୀରେ କୋରୋନାର ୪୦୯ ନୂଆ ମାମଲା ଆସିଥିଲା, ଯାହାକି ଦୁଇ ମାସ ମଧ୍ୟରେ ଗୋଟିଏ ଦିନର ସର୍ବାଧିକ ସଂଖ୍ୟା ଅଟେ । ପଞ୍ଜାବରେ ୨୪ ଘଣ୍ଟା ମଧ୍ୟରେ ୧୭୦୦ରୁ ଅଧିକ ମାମଲା ଚିହ୍ନଟ ହେବା ପରେ ୬ଟି ଜିଲ୍ଲା ନୱାନଶାହର, ଜଲନ୍ଦର, ହୋଶିଆରପୁର, କାପୁରଥାଲା, ପଟିଆଲା ଏବଂ ଲୁଧିଆନାରେ ରାତ୍ରି କର୍ଫ୍ୟୁ ଲାଗୁ କରାଯାଇଛି ।


ଅଧିକ ପଢ଼ନ୍ତୁ:-ମହାରାଷ୍ଟ୍ରରେ ନିୟନ୍ତ୍ରଣ ବାହାରେ କୋରୋନା, ନାଗପୁରରେ ପୁଣି ଲାଗିଲା ଲକଡାଉନ୍


ସ୍ୱାସ୍ଥ୍ୟ ମନ୍ତ୍ରଣାଳୟ କୋରୋନା ବୃଦ୍ଧି ପଛରେ ଲୋକମାନଙ୍କର ଅବହେଳା, ପରୀକ୍ଷଣର ଅଭାବ ଏବଂ ଭିଡ଼ କାର୍ଯ୍ୟକ୍ରମକୁ ଦାୟୀ କରିଛି । ମହାରାଷ୍ଟ୍ରରେ କୋରୋନା ମାମଲା ବୃଦ୍ଧି ହେତୁ ବିଭିନ୍ନ ସହରରେ ଲକଡାଉନ୍ ଓ କଠୋରତା ପର୍ଯ୍ୟାୟ ଆରମ୍ଭ ହୋଇଛି । କୋରୋନା ରୋଗୀଙ୍କ ସଂଖ୍ୟାକୁ ଆଧାର କରି ମହାରାଷ୍ଟ୍ରର ବିଭିନ୍ନ ସହରରେ କଠୋରତା ଆରମ୍ଭ ହୋଇଛି ।


ଔରଙ୍ଗାବାଦ ଏବଂ ଜାଲଗାଓଁରେ ମହାରାଷ୍ଟ୍ର ସରକାର ଆଂଶିକ ତାଲା ପକାଇବାକୁ ନିଷ୍ପତ୍ତି ନେଇଛନ୍ତି । ସେହିପରି ନାଗପୁରକୁ ସଂପୂର୍ଣ୍ଣ ଲକଡାଉନ୍ (Lockdown) କରାଯାଇଛି । ଔରଙ୍ଗାବାଦର ସମସ୍ତ ପର୍ଯ୍ୟଟନସ୍ଥଳୀ ବନ୍ଦ ରହିଛି । ବିନା ମାସ୍କ ଘରୁ ବାହାରୁ ଥିବା  ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।