Gujarat Election 2022: ପ୍ରଧାନମନ୍ତ୍ରୀଙ୍କ ଗସ୍ତ ସୁରକ୍ଷା ବ୍ୟବସ୍ଥାରେ ବଡ଼ ଭୁଲ୍, ମୁଣ୍ଡ ଉପରେ ବୁଲୁଥିଲା ସନ୍ଦିଗ୍ଧ ଡ୍ରୋନ

Gujarat Election News: ଦିନ କେଇଟା ପରେ ଗୁଜୁରାଟ ନିର୍ବାଚନ । ଏଥିଯୋଗୁଁ ଗୁଜରାଟ ପାଣିପାଗ ବେଶ ସରଗରମ ରହିଛି। ବିଜେପି, କଂଗ୍ରେସ, ଆପ୍ ମଧ୍ୟରେ ଏଠାରେ ଜୋରଦାର ଲଢେଇ ହେବାକୁ ଯାଉଛି । ନିଜ ଲୋକଙ୍କୁ ଆକୃଷ୍ଟ କରିବାକୁ କଳବଳ କୌଶଳ ଲଗାଇଦେଇଛନ୍ତି ସବୁ ଦଳ। ତେବେ ଗୁଜରାଟରେ ନିର୍ବାଚନୀ ମାହୋଲ ଦେଖିବାକୁ ମିଳୁଥିବା ବେଳେ ପ୍ରଧାନମନ୍ତ୍ରୀଙ୍କ ଗସ୍ତ ସମୟର ଏକ ବଡ଼ ଖବର ସାମ୍ନାକୁ ଆସିଛି ।

Gujarat Election 2022: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗୁଜରାଟ ଗସ୍ତ ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଏକ ରାଲିରେ ପ୍ରଧାନମନ୍ତ୍ରୀଙ୍କ ସୁରକ୍ଷା ଭଙ୍ଗ କରିବାକୁ ପ୍ରସ୍ତୁତି ଚାଲିଥିଲା। ତେବେ ଏନଏସଜି ଏହି ବଡ ଷଡଯନ୍ତ୍ରକୁ ପଣ୍ଡ କରିଛି। ପ୍ରଧାନମନ୍ତ୍ରୀଙ୍କ ରାଲି ଅନୁଷ୍ଠିତ ହେବାକୁ ଥିବା ଅହମ୍ମଦାବାଦ ଜିଲ୍ଲାର ବାଭଲା ଠାରେ ସୁରକ୍ଷା ଏଜେନ୍ସି ଦ୍ୱାରା ଏକ ଡ୍ରୋନ୍ ଦେଖିବାକୁ ମିଳିଥିଲା। ଏଠାରେ ହିଁ ପ୍ରଧାନମନ୍ତ୍ରୀଙ୍କ ରାଲି ଅନୁଷ୍ଠିତ ହେବାର ଥିଲା। ପ୍ରଧାନମନ୍ତ୍ରୀଙ୍କ ରାଲି ପୂର୍ବରୁ ସୁରକ୍ଷା ଦୃଷ୍ଟିରୁ ଏହି ଅଞ୍ଚଳକୁ 'ନୋ ଫ୍ଲାଏ ଜୋନ୍' ଘୋଷିତ କରାଯିବା ପରେ ମଧ୍ୟ ଏହାପରେ ବି ଏକ ସନ୍ଦିଗ୍ଧ ଡ୍ରୋନର ଉଡାଣ କୁ ନେଇ ଆଶଙ୍କା ଉପୁଜିଥିଲା। ଯାହା ଫଳରେ NSG ଦ୍ୱାରା ଡ୍ରୋନ୍ କୁ ଗୁଳି ଚଳାଇ ଖସାଇ ଦିଆଯାଇଥିଲା । ତେବେ ଏପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ କିମ୍ବା ପୋଲିସ ପକ୍ଷରୁ କୌଣସି ସୂଚନା ଦିଆଯାଇନାହିଁ। 

ରିପୋର୍ଟରେ କୁହାଯାଇଛି ଯେ, ଡ୍ରୋନରେ ପୋଲିସ କୌଣସି ପ୍ରକାରର ସନ୍ଦେହଜନକ ସନ୍ଧାନ ପାଇ ନାହିଁ । ତେବେ କାହିଁକି ଏବଂ କେଉଁ କାରଣରୁ ନୋ ଫ୍ଲାଇଂ ଜୋନରେ ଡ୍ରୋନକୁ ଉଡ଼ାଗଲା ତାହା ଜାଣିବାକୁ ସୁରକ୍ଷା ଏଜେନ୍ସି (Security Agency) ଚେଷ୍ଟା କରୁଛି। ସୂଚନାନୁସାରେ, ଏହି ଘଟଣା ଅପରାହ୍ଣ  ୪ଟା ବାଜି ୩୦ ମିନିଟ ସମୟରେ ହୋଇଥିଲା। ଏହି ମାମଲାରେ ଜଣେ ବ୍ୟକ୍ତିଙ୍କୁ ମଧ୍ୟ ଗିରଫ କରାଯାଇଛି।

ଫଟୋଗ୍ରାଫର ଉଡାଉଥିଲେ ଡ୍ରୋନ
ପ୍ରକାଶ ଥାଉକି, କେତେକ ଗଣମାଧ୍ୟମ ରିପୋର୍ଟରେ ମଧ୍ୟ କୁହାଯାଇଛି ଯେ,  ବାବଲାରେ ପ୍ରଧାନମନ୍ତ୍ରୀଙ୍କ ରାଲି ସ୍ଥାନ ନିକଟରେ ଭିଡିଓ ରେକର୍ଡିଂ ପାଇଁ ଡ୍ରୋନ୍ (Drone) ଏକ ଘରୋଇ ଫଟୋଗ୍ରାଫର ଦ୍ୱାରା ଉଡାଯାଇଥିଲା । ସୁରକ୍ଷା ଅଧିକାରୀ ଡ୍ରୋନକୁ ଦେଖିବା ମାତ୍ରେ ସେମାନେ ଏହାକୁ ତଳକୁ ଖସାଇଦେଇଥିଲେ। ଏହା ପରେ ପୋଲିସ କାଶ କାଲୁ ଭୋଇ, ନିକୁଲ ରମେଶ ଭୋଇ ପାରମାର ଏବଂ ରାଜେଶ ପ୍ରଜାପତି ନାମକ ତିନି ଜଣ ଯୁବକଙ୍କୁ ଗିରଫ କରିଛି। ଏହି ତିନିଜଣଙ୍କୁ ପଚରାଉଚରା କରାଯାଉଛି। 'ନୋ ଫ୍ଲାଇଂ ଜୋନ୍' (No Flying Zone) ଉଲ୍ଲଂଘନ କରିବା ନେଇ ପୋଲିସ ଏହି ମାମଲାରେ ଏଫ୍ଆଇଆର୍ ପଞ୍ଜିକରଣ କରିଛି।

ପଞ୍ଜାବରେ ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାରେ ଢିଲାପଣ
ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି (Prime Minister Narendra Modi) ୫ ଜାନୁୟାରୀ ୨୦୨୨ ରେ ପଞ୍ଜାବର ଫିରୋଜପୁର ଗସ୍ତ କରିଥିଲେ। ପ୍ରବଳ ବର୍ଷା ହେତୁ ପ୍ରଧାନମନ୍ତ୍ରୀଙ୍କୁ ରାସ୍ତାରେ ଯିବାକୁ ପଡୁଥିଲା, କିନ୍ତୁ ହୁସେନାୱାଲା ଠାରୁ ୩୦ କିଲୋମିଟର ଦୂରରେ ଏହି ରାସ୍ତାରେ ବିକ୍ଷୋଭକାରୀଙ୍କୁ ଦେଖିବାକୁ ମିଳିଥିଲା । ଯେଉଁ କାରଣରୁ ତାଙ୍କ କନଭେ ପ୍ରାୟ ୨୦ ମିନିଟ୍ ପର୍ଯ୍ୟନ୍ତ ଏକ ଅସୁରକ୍ଷିତ ଅଞ୍ଚଳରେ ରହିଥିଲା। ପ୍ରଧାନମନ୍ତ୍ରୀ ମୋଦିଙ୍କ କନଭେ ଯେଉଁଠି ଅଟକି ରହିଥିଲା ​​ସେହି ଅଞ୍ଚଳକୁ ହେରୋଇନ ଚୋରା ଚାଲାଣକାରୀ, ଚୋର ତସ୍କରଙ୍କ ଗଡ଼ ବୋଲି ବିବେଚନା କରାଯାଏ। ଗତ ବର୍ଷ ସେପ୍ଟେମ୍ବର ମାସରେ ଏହି ଅଞ୍ଚଳରେ ଏକ ଆତଙ୍କବାଦୀ ଘଟଣା ମଧ୍ୟ ଘଟିଥିବା ନଜିର ରହିଛି।