ମୁମ୍ବାଇ ଅର୍ଥର ରୋଡ୍ ଜେଲର ୭୭ କଏଦୀ ଏବଂ ୨୬ କର୍ମଚାରୀ କୋରୋନା ପଜିଟିଭ

ମୁମ୍ବାଇ: ଜେଲକୁ ଧସେଇ ପଶିଲା କୋରୋନା । ମୁମ୍ବାଇ ଅର୍ଥର ରୋଡ୍ ଜେଲର ୭୭ କଏଦୀ ଏବଂ ୨୬ କର୍ମଚାରୀ କୋରୋନା ପଜିଟିଭ ବୋଲି ସ୍ପଷ୍ଟ ହୋଇଛି । ଯାହାକି ମହାରାଷ୍ଟ୍ର ସରକାରଙ୍କ ଚିନ୍ତା ବଢ଼ାଇ ଦେଇଛି । ଜେଲର ରୋଷେୟା ଠାରୁ ଏହି କୋରୋନା ସଂକ୍ରମଣ ହୋଇଥିବା କୁହାଯାଉଛି । ଆଗକୁ ଆକ୍ରାନ୍ତଙ୍କ ସଂଖ୍ୟା ଆହୁରି ବଢ଼ିବାର ଆଶଙ୍କାକୁ ମଧ୍ୟ ଏଡ଼ାଇ ହେଉନାହିଁ । ସଂକ୍ରମିତ କଏଦୀ ଏବଂ କର୍ମଚାରୀଙ୍କୁ ମୁମ୍ବାଇର ଜିଟି ହସ୍ପିଟାଲ ଏବଂ ସେଣ୍ଟ ଜର୍ଜ ହସ୍ପିଟାଲରେ ଭର୍ତ୍ତି କରାଯାଇଛି । 

ଯେତେବେଳେ କୋରୋନା କାୟାବିସ୍ତାର କରିବା ଆରମ୍ଭ କରିଥିଲା, ସେବେଠୁ ମୁମ୍ବାଇର ସମସ୍ତ ୮ଟି ଜେଲକୁ ଆଇସୋଲେସନ କରି ରଖିଥିଲେ ମହାରାଷ୍ଟ୍ର ସରକାର । ମାତ୍ର ଏହା ସତ୍ତ୍ୱେ ମଧ୍ୟ କୋରୋନା କବଳରୁ ଜେଲ ପରିସରକୁ ରକ୍ଷା କରାଯାଇପାରିନାହିଁ । ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖଙ୍କ କହିବା କଥା ହେଲା, ଜେଲର ୭୨ ଜଣ କଏଦୀ ରୋଷେୟାଙ୍କ ସଂସ୍ପର୍ଶରେ ଆସିଥିଲେ । ରୋଷେୟାଙ୍କ ଠାରେ କୋରୋନା ପଜିଟିଭ ଟିହ୍ନଟ ହୋଇଥିବାରୁ ତାଙ୍କଠାରୁ ଏହା ବ୍ୟାପିଥିବା ଜଣାପଡ଼ୁଛି । 

ଅନ୍ୟପଟେ ଏବେ କେବଳ ମୁମ୍ବାଇରେ କୋରୋନା ଆକ୍ରାନ୍ତଙ୍କ ସଂଖ୍ୟା ୧୧୨୧୯ରେ ପହଞ୍ଚିଛି । ସେହିପରି ୪୩୭ ଜଣଙ୍କ ମୃତ୍ୟୁ ହେଲାଣି । ଗତ ୨୪ ଘଣ୍ଟା ମଧ୍ୟରେ ୨୫ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।