କଳାହାଣ୍ଡିର ବିକାଶ ପାଇଁ ଲାଞ୍ଜିଗଡ ଖଣି ଲାଗି ଗ୍ରାମସଭା ଡାକିବାକୁ ଅଞ୍ଚଳବାସୀଙ୍କ ଦାବି

ଭୁବନେଶ୍ୱର: କଳାହାଣ୍ଡିର ବିକାଶ ପାଇଁ ତୁରନ୍ତ ଲାଞ୍ଜିଗଡ଼ ବକ୍ସାଇଟ୍ ଖଣିର ଗ୍ରାମସଭା କରିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଅନୁରୋଧ କରିଛନ୍ତି କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବାସୀ । ଜିଲ୍ଲାପାଳ ଓ ବିଡିଓଙ୍କ ଜରିଆରେ ଦାଖଲ କରାଯାଇଥିବା ଏହି ନିବେଦନରେ ଲାଞ୍ଜିଗଡ଼ ବକ୍ସାଇଟ୍ ଖଣିର ବକ୍ସାଇଟ୍ ଖନନ କାର୍ଯ୍ୟ ଆରମ୍ଭ କରିବା ଏବଂ କଳାହାଣ୍ଡି ଜିଲ୍ଲାରେ ସ୍ଥାୟୀ ଅର୍ଥନୈତିକ ଅଭିବୃଦ୍ଧି କୁ ତ୍ୱରାନ୍ୱିତ କରିବା ଉପରେ ଗୁରୁତ୍ୱାରୋପ କରାଯାଇଛି।

୨୦୦୩ମସିହାରେ ଲାଞ୍ଜିଗଡ଼ ଆଲୁମିନା ବିଶୋଧନାଗାର ପ୍ରତିଷ୍ଠା ପରଠାରୁ କଳାହାଣ୍ଡି ଜିଲ୍ଲାରେ ଉଲ୍ଲେଖନୀୟ ଅଗ୍ରଗତି ହୋଇଛି। ଏକଦା ଭାରତର ଅନ୍ୟତମ ଗରିବ ଅଞ୍ଚଳ ଭାବେ ପରିଚିତ କଳାହାଣ୍ଡି ଏବେ ବିଶୋଧନାଗାରର ବିକାଶ ଦ୍ୱାରା ପରିଚାଳିତ ଭାରତ ସରକାରଙ୍କ "ଆକାଂକ୍ଷୀ ଜିଲ୍ଲା" ଅଭିଯାନର ଏକ ଅଂଶ ।

ଲାଞ୍ଜିଗଡ଼ ଖଣିରୁ ସ୍ଥାନୀୟ ଉପଲବ୍ଧ ବକ୍ସାଇଟ୍ ଖନନ ହୋଇନଥିବାରୁ କଳାହାଣ୍ଡିର ବିକାଶ ପ୍ରଭାବିତ ହୋଇଛି ବୋଲି ଗ୍ରାମବାସୀ ଦର୍ଶାଇଛନ୍ତି। ପଡ଼ୋଶୀ ଜିଲ୍ଲା ରାୟଗଡ଼ା ଓ କୋରାପୁଟ ଉପଲବ୍ଧ ବକ୍ସାଇଟ୍ ଭଣ୍ଡାରକୁ ଖନନ କରି ନିଜର ସାମର୍ଥ୍ୟର ଉପଯୋଗ କରିଥିବା ବେଳେ କଳାହାଣ୍ଡି ସ୍ଥାନୀୟ ଶିଳ୍ପ ପ୍ରତିଷ୍ଠାର ୨୦ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ଏହାର ସାମର୍ଥ୍ୟ ପୂରଣ ପାଇଁ ସଂଘର୍ଷ କରୁଛି।

କଳାହାଣ୍ଡିବାସୀ ସେମାନଙ୍କ ଉଦ୍ବେଗ ପ୍ରକାଶ କରି ଦାବି କରିଛନ୍ତି, ସରକାର ତୁରନ୍ତ ଲାଞ୍ଜିଗଡ଼ ବକ୍ସାଇଟ୍ ଖଣି ପାଇଁ ଗ୍ରାମସଭା କରି କଳାହାଣ୍ଡିର ବିକାଶ ପାଇଁ ଖଣି ଖନନ ଆରମ୍ଭ କରନ୍ତୁ।

କଳାହାଣ୍ଡିର ଲାଞ୍ଜିଗଡ଼ରେ ଶିଳ୍ପ ପ୍ରତିଷ୍ଠା ସମୟରେ ଅନେକ ବାହ୍ୟ କର୍ମୀ ଓ ବିଦେଶୀ ଶକ୍ତି ଶିଳ୍ପାୟନ ଓ ଅଞ୍ଚଳର ବିକାଶକୁ ରୋକିବାକୁ ଚେଷ୍ଟା କରିଥିଲେ ମଧ୍ୟ କଳାହାଣ୍ଡି ଅଞ୍ଚଳର ସାମଗ୍ରିକ ସାମାଜିକ ଓ ଅର୍ଥନୈତିକ ବିକାଶ ପାଇଁ ଜିଲ୍ଲା ଓ ରାଜ୍ୟ ପ୍ରଶାସନର ସହଯୋଗରେ ଲୋକମାନେ ଏହି ପ୍ରକଳ୍ପକୁ ସଫଳତାର ସହ କାର୍ଯ୍ୟକାରୀ କରିଥିଲେ।

ସେହିଭଳି ଲାଞ୍ଜିଗଡ଼ ବକ୍ସାଇଟ୍ ଖଣିରେ ଗ୍ରାମସଭା ଆୟୋଜନ କରି ବକ୍ସାଇଟ୍ ଖନନ ଆରମ୍ଭ କରିବା ର ଆବଶ୍ୟକତା ଉପରେ ସ୍ଥାନୀୟ ବାସିନ୍ଦା ଗୁରୁତ୍ୱାରୋପ କରିଥିଲେ, ଯାହା ସ୍ଥାନୀୟ ନିଯୁକ୍ତି ସୃଷ୍ଟି କରି କଳାହାଣ୍ଡିକୁ ବହୁତ ଉପକୃତ କରିବ ଏବଂ ଏହି ଅଞ୍ଚଳର ବିକାଶ ପାଇଁ ଏକ ସାମାଜିକ-ଅର୍ଥନୈତିକ ପରିବେଶ ପ୍ରଦାନ କରିବ ।