ଶିବସେନାରୁ ହିଁ ହେବେ ମୁଖ୍ୟମନ୍ତ୍ରୀ: କଂଗ୍ରେସ ନେତା

ନୂଆଦିଲ୍ଲୀ: ବିଜେପି ଓ ଶିବସେନା ପରେ ସରକାର ଗଠନ ପାଇଁ ଏନସିପିକୁ ରାଜ୍ୟପାଳଙ୍କ ଆମନ୍ତ୍ରଣ ଘଟଣା ମହାରାଷ୍ଟ୍ର ରାଜନୀତିକୁ ଆହୁରି ରୋଚକୀୟ କରିଦେଇଛି । ମୁଖ୍ୟମନ୍ତ୍ରୀ ପଦକୁ ନେଇ ଏନସିପି କିଛି ଗୋଳମାଳ କରିପାରେ । ଯେତେବେଳେ ଏଭଳି କିଛି ଆଶଙ୍କା ପ୍ରକାଶ ପାଉଛି, ସେତେବେଳେ ଜଣେ କଂଗ୍ରେସ ନେତାଙ୍କ ପାଖରୁ ଆସିଛି ବଡ ବୟାନ । ଶିବସେନା-କଂଗ୍ରେସ-ଏନସିପି ମେଣ୍ଟ ହେଲେ ଶିବସେନାକୁ ହିଁ ମୁଖ୍ୟମନ୍ତ୍ରୀ ପଦ ମିଳିବ ବୋଲି କହିଛନ୍ତି ମହାରାଷ୍ଟ୍ର କଂଗ୍ରେସର ଚର୍ଚ୍ଚିତ ଚେହେରା କାଗଡା ଚଂଦ୍ୟା ପଦଭୀ। 

ଆଜି ପଦଭୀ କହିଛନ୍ତି, ବର୍ତ୍ତମାନ ପର୍ଯ୍ୟନ୍ତ ମେଣ୍ଟ ନେଇ ଚୁଡାନ୍ତ ନିଷ୍ପତ୍ତି ହୋଇନାହିଁ । ଏବେ ଆଲୋଚନା ଜାରି ରହିଛି । ବିକଳ୍ପ ସରକାର ପାଇଁ ଏକ ସକରାତ୍ମକ ଫଳାଫଳ ଆସିବ ବୋଲି ସେ ଆଶା ରଖିଛନ୍ତି । ସେହିପରି ଯଦି ଶିବସେନା-କଂଗ୍ରେସ-ଏନସିପି ସରକାର ଗଢୁଛନ୍ତି, ତେବେ ଶିବସେନାକୁ ହିଁ ମୁଖ୍ୟମନ୍ତ୍ରୀ ପଦ ମିଳିବ ବୋଲି ଆଶାବ୍ୟକ୍ତ କରିଛନ୍ତି ପଦଭୀ । 

ଗୁରୁତ୍ୱପୂର୍ଣ୍ଣ କଥା ଏହା ଯେ, ବିରୋଧୀ ଦଳରେ ବସିବା ଅପେକ୍ଷା ଶିବସେନା ସହ ମେଣ୍ଟ କରି ସରକାରରେ ରହିବାକୁ ବହୁ କଂଗ୍ରେସ ନେତା ଚାହୁଁଛନ୍ତି । ଏ କ୍ଷେତ୍ରରେ କଂଗ୍ରେସ କେନ୍ଦ୍ର ନେତୃତ୍ୱଙ୍କ ଯେତେ ଉତ୍ସୁକତା ପ୍ରକାଶ ପାଉନି, ତାଠାରୁ ଅଧିକ ରାଜ୍ୟ ନେତୃତ୍ୱଙ୍କର । ଯାହାକି ଶିବସେନାକୁ ଆଶ୍ୱସ୍ତି ଦେଉଛି । କଂଗ୍ରେସ ହାଇକମାଣ୍ଡ ଏବଂ ଏନସିପି ମୁଖ୍ୟ ମଧ୍ୟ ଶିବସେନା ସହ ମେଣ୍ଟ କରି ସରକାର ଗଢିବାକୁ ଗୋଟିଏ ପ୍ରକାର ନିଷ୍ପତ୍ତି ଚୁଡାନ୍ତ କରିସାରିଛନ୍ତି । ଆଜି ସଂନ୍ଧ୍ୟା ୭.୩୦ ସୁଦ୍ଧା ଏନେଇ ଏନସିପି ରାଜ୍ୟପାଳଙ୍କ ପାଖରେ ଆଭିମୁଖ୍ୟ ସ୍ପଷ୍ଟ କରିବ । 

ବିଶ୍ୱସ୍ତ ସୂତ୍ରରୁ ଯାହା ଖବର ମିଳୁଛି, ସରକାର ଗଠନ ପୂର୍ବରୁ ଶିବସେନା ସହ ମନ୍ତ୍ରିମଣ୍ଡଳ ଭାଗବଣ୍ଟା ନେଇ ମଧ୍ୟ ଆଲୋଚନା କରିବାକୁ ଚାହୁଁଛନ୍ତି ଉଭୟ ଏନସିପି ଓ କଂଗ୍ରେସ । ଏପରିକି କଂଗ୍ରେସ ତରଫରୁ ସରକାର ଗଠନକୁ ନେଇ ଏକ ଫର୍ମୁଲା ସାମ୍ନାକୁ ଆସିଛି । ସୂତ୍ରାନୁସାରେ, ମହାରାଷ୍ଟ୍ରରେ ସରକାର ଗଢିବା ପାଇଁ କଂଗ୍ରେସ ଯେଉଁ ଫର୍ମୁଲା ଉପରେ ବିଚାର କରୁଛି, ତାହା ଅନ୍ତର୍ଗତ ଶିବସେନାକୁ ମୁଖ୍ୟମନ୍ତ୍ରୀ ପଦ ମିଳିବ । ଅନ୍ୟପକ୍ଷେ ୨ ଉପମୁଖ୍ୟମନ୍ତ୍ରୀ ମଧ୍ୟ ରହିବେ । ଏହା ବ୍ୟତୀତ କ୍ୟାବିନେଟରେ ଶିବସେନା-ଏନସିପି-କଂଗ୍ରେସର ୧୪-୧୪ ମନ୍ତ୍ରୀ ରହିବେ ।

ଏପଟେ ଏନସିପି ପ୍ରଥମରୁ ସ୍ପଷ୍ଟ କରିଛି ଯେ ଶିବସେନାକୁ ସମର୍ଥନ ସର୍ତ୍ତ ଆଧାର ମିଳିବ । ତେଣୁ ଶିବସେନା ଓ ଏନସିପି-କଂଗ୍ରେସ ମଧ୍ୟରେ କମନ ମିନିମମ ପ୍ରୋଗ୍ରାମ ଉପରେ ସରକାର ଗଠନ କରିପାରନ୍ତି । କାରଣ ଶିବସେନା ବିଚାରଗତ ଦୃଷ୍ଟିରୁ ଏନସିପି ଓ କଂଗ୍ରେସ ଠାରୁ ସଂପୂର୍ଣ୍ଣ ପୃଥକ ଦଳ ।