ଗୋଟିଏ ଦିନରେ ୧୫୦ ଲିଟର କ୍ଷୀର ଦେବ `ସୁପର ଗାଈ`, ଚୀନ୍ ବୈଜ୍ଞାନିକ କଲେ କମାଲ

Super Cow: ଗୋଟିଏ ଗାଈ ଗୋଟିଏ ଦିନରେ କେତେ ଲିଟର କ୍ଷୀର ଦେଇପାରେ? ଏହାର ସାଧାରଣ ଉତ୍ତର ହେଉଛି ୨ ରୁ ୪ ଲିଟର ଅତି ବେଶୀରେ ୧୦ ରୁ ୨୦ ଲିଟର । କିନ୍ତୁ ଯଦି ଆମେ ଆପଣଙ୍କୁ କହୁ ଯେ ଗୋଟିଏ ଗାଈ ଗୋଟିଏ ଦିନରେ ୧୦୦ ରୁ ୧୫୦ ଲିଟର କ୍ଷୀର ଦେଇପାରେ, ଆପଣ ଏହାକୁ ବିଶ୍ୱାସ କରିବେ କି? କଥାଟି ଆଶ୍ଚର୍ଯ୍ୟଜନକ, କିନ୍ତୁ ସତ୍ୟ । ଚାଇନାର ବୈଜ୍ଞାନିକମାନେ ଦାବି କରିଛନ୍ତି ଯେ ସେମାନେ କ୍ଲୋନିଂ ମାଧ୍ୟମରେ ଏକ 'ସୁପର ଗାଈ' ସୃଷ୍ଟି କରିଛନ୍ତି । ବୈଜ୍ଞାନିକମାନେ ଏହିପରି ୩ ଟି ଗାଈ ସୃଷ୍ଟି କରିଛନ୍ତି, ଯାହା ସାଧାରଣ ଗାଈ ଅପେକ୍ଷା ୨୫ ରୁ ୩୫ ଗୁଣ ଅଧିକ କ୍ଷୀର ଦେବ ।

ଦି ସନର ଏକ ରିପୋର୍ଟ ଅନୁଯାୟୀ ଚାଇନାର ବୈଜ୍ଞାନିକ ମାନେ କହିଛନ୍ତି ଯେ କ୍ଲୋନିଂ ମାଧ୍ୟମରେ ପ୍ରସ୍ତୁତ ଗାଈ ଗୁଡିକ ଗୋଟିଏ ବର୍ଷରେ ୧୭୫୦୦ ଲିଟର କ୍ଷୀର ଦେଇପାରିବେ । ବ୍ରିଟେନରେ ମିଳୁଥିବା ଗାଈ ମାନଙ୍କ ଠାରୁ ଏହା ଦୁଇଗୁଣ ଅଧିକ କ୍ଷୀର ଦେବେ । ବ୍ରିଟେନର ସର୍ବୋତ୍ତମ ପ୍ରଜାତିର ଗାଈ ଗୋଟିଏ ବର୍ଷରେ ୮ ହଜାର ଲିଟର କ୍ଷୀର ଦେଇପାରେ । ଏଥି ସହିତ, ଭାରତ ତୁଳନାରେ ମଧ୍ୟ ଏହି ସୁପର ଗାଈ ବହୁତ ଗୁଣ ଅଧିକ କ୍ଷୀର ଦେବାକୁ ଯାଉଛି ।

ଚାଇନାର ଉତ୍ତର-ପଶ୍ଚିମ କୃଷି ଓ ଜଙ୍ଗଲ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟର ବୌଜ୍ଞାନିକମାନେ ୩ଟି ସୁପର ଗାଈକୁ କ୍ଲୋନ କରିଛନ୍ତି । ବୈଜ୍ଞାନିକମାନେ କହିଛନ୍ତି ଯେ ସେମାନେ ସୁପର ଗାଈର ୧୦୦୦ କ୍ଲୋନ୍ ପ୍ରସ୍ତୁତ କରିବେ । ଏହି କାରଣରୁ ଦୁଗ୍ଧ ଉତ୍ପାଦନରେ ବହୁତ ବୃଦ୍ଧି ଘଟିବ । ଚାଇନାର ଗଣମାଧ୍ୟମ ଗାଈ ମାନଙ୍କର ଏହି ପ୍ରଜନନ କାର୍ଯ୍ୟକ୍ରମକୁ କ୍ଷୀର ଆମଦାନୀ ହ୍ରାସ କରୁଥିବା ବର୍ଣ୍ଣନା କରିଛି । ଚାଇନାରେ ଯେତିକି ଦୁଗ୍ଧ ପିଆଯାଏ, ସେଥିପାଇଁ ବାହାର ଦେଶରୁ ଆମଦାନୀ କରିବାକୁ ପଡିଥାଏ ।

ପ୍ରଶ୍ନ ହେଉଛି ଏହି କ୍ଲୋନ କିପରି ପ୍ରସ୍ତୁତ ହେଲା । ଏହି ପ୍ରଶ୍ନ ଉପରେ, ଗାଈ କ୍ଲୋନିଂ ପ୍ରୋଜେକ୍ଟର ନେତୃତ୍ୱ ନେଉଥିବା ବୈଜ୍ଞାନିକ ଜିନ୍ ୟାପିଙ୍ଗ କହିଛନ୍ତି ଯେ ଗାଈ କାନରୁ ଟିସୁ ନେଇ ଭ୍ରୁଣ ପ୍ରସ୍ତୁତ କରାଯାଇଥିଲା ଓ ପରେ ସେହି ଭ୍ରୁଣଗୁଡିକ ୧୨୦ ଗାଈରେ ସ୍ଥାନାନ୍ତରିତ କରାଯାଇଥିଲା ।

ୟାପିଙ୍ଗ କହିଛନ୍ତି ଯେ ଭ୍ରୁଣ ପ୍ରତିରୋପଣ କରାଯାଇଥିବା ୪୨ ଟି ଗାଈ ଗର୍ଭବତୀ ହୋଇଥିଲେ । ବର୍ତ୍ତମାନ ତିନୋଟି ସୁପର ଗାଈ ଜନ୍ମ ହୋଇଥିବାବେଳେ ଆଗାମୀ ଦିନରେ ୧୭.୫ ପ୍ରତିଶତ ଗାଈ ଜନ୍ମ ହେବାର ସମ୍ଭାବନା ରହିଛି ।

ବାସ୍ତବରେ ଚୀନ୍ ଏହି ପ୍ରକଳ୍ପ ମାଧ୍ୟମରେ ୧୦୦ ଟି ସୁପର ଗାଈର ଏକ ଦଳ ଗଠନ କରିବାକୁ ସ୍ୱପ୍ନ ଦେଖୁଛି । ଦୁନିଆରେ ସର୍ବାଧିକ ଦୁଗ୍ଧ ଉତ୍ପାଦନ କରୁଥିବା ଗାଈ ଯୋଗୁଁ ଚାଇନାରେ ଦୁଗ୍ଧ ଉତ୍ପାଦନ ଯଥେଷ୍ଟ ବୃଦ୍ଧି ପାଇବ ଓ ଏହା କେବଳ ଚାଇନାର ଘରୋଇ ଆବଶ୍ୟକତା ପୂରଣ କରିବ ନାହିଁ, ଭବିଷ୍ୟତରେ କ୍ଷୀର ମଧ୍ୟ ରପ୍ତାନି ହୋଇପାରିବ 

ବୈଜ୍ଞାନିକ ଜିନ୍ କହିଛନ୍ତି ଯେ ବ୍ୟବସାୟ ସହ ଜଡିତ ନହେବା ପର୍ଯ୍ୟନ୍ତ ଏହିପରି କ୍ଲୋନିଂ କୌଶଳର କୌଣସି ଆର୍ଥିକ ଲାଭ ହେବ ନାହିଁ । ଏଥିପାଇଁ କ୍ଲୋନିଂ ବୃଦ୍ଧି କରିବାର ଆବଶ୍ୟକତା ରହିବ । ଚାଇନାରେ, କମ୍ କ୍ଷୀର ଦେଉଥିବା ଗାଈର ଗର୍ଭରେ ହାଇବ୍ରିଡ୍ ଭ୍ରୁଣ ଲଗାଇ ସୁପର ଗାଈ ସଂଖ୍ୟା ବୃଦ୍ଧି କରାଯାଉଛି । ଯଦି ଏହିପରି ଗାଈ ବୃଦ୍ଧି ହୁଏ, କ୍ଷୀର ଉତ୍ପାଦନ ମଧ୍ୟ ବହୁତ ବୃଦ୍ଧି ପାଇବ ।

ଜିନ୍ କହିଛନ୍ତି ଯେ ସୁପର ଗାଈର ଟିସୁ ସଞ୍ଚୟ ହୋଇ ସୁରକ୍ଷିତ ରଖାଯିବ, ଯାହା ଦ୍ୱାରା ଅଧିକରୁ ଅଧିକ ସୁପର ଗାଈ ଜନ୍ମ ହୋଇପାରିବେ । ରିପୋର୍ଟ ଅନୁଯାୟୀ, ବର୍ତ୍ତମାନ ଚାଇନାରେ ୬.୬ ନିୟୁତ ଗାଈ ଅଛନ୍ତି, ସେଥିମଧ୍ୟରୁ ୭୦ ପ୍ରତିଶତ ଗାଈ ବିଦେଶରୁ ଆମଦାନୀ ହୋଇଛି । ଯଦି ଚୀନ୍ ଏକ ହଜାର ସୁପର ଗାଈ ପ୍ରସ୍ତୁତ କରେ, ତେବେ ଏହା ପ୍ରତିବର୍ଷ ୧୮୦୦ ଟନ୍ କ୍ଷୀର ଉତ୍ପାଦନକୁ ବୃଦ୍ଧି କରିବାରେ ସକ୍ଷମ ହେବ ।