ଯଦି ମମତା ଭବାନୀପୁର ଉପନିର୍ବାଚନ ହାରିଯାଆନ୍ତି ତେବେ କ`ଣ ହେବ? ଆଜି ଆସିବ ଫଳାଫଳ

କୋଲକାତା: West Bengal Bhawanipur By Election Result: ଭବାନୀପୁର ବିଧାନସଭା ଉପ-ନିର୍ବାଚନର ଫଳାଫଳ ଆଜି (ରବିବାର) ଅର୍ଥାତ ଅକ୍ଟୋବର ୩ରେ ଆସିବାକୁ ଯାଉଛି । ଏହି ଫଳାଫଳ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ (West Bengal CM Mamata Banerjee) ଙ୍କ ପାଇଁ ମହତ୍ୱପୂର୍ଣ୍ଣ ଅଟେ । ଏହି ନିର୍ବାଚନର ଫଳାଫଳ ମମତାଙ୍କ ରାଜନୈତିକ ଭବିଷ୍ୟତ ଉପରେ ଗଭୀର ପ୍ରଭାବ ପକାଇବାର ସମ୍ଭାବନା ରହିଛି । ଚଳିତ ବର୍ଷ ଆରମ୍ଭରେ ଅନୁଷ୍ଠିତ ପଶ୍ଚିମବଙ୍ଗ ବିଧାନସଭା ନିର୍ବାଚନ ସମୟରେ ମମତା ବାନାର୍ଜୀ ନନ୍ଦିଗ୍ରାମରୁ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ଶୁଭେନ୍ଦୁ ଅଧିକାରୀ (Suvendu Adhikari) ଙ୍କ ଠାରୁ ହାରି ଯାଇଥିଲେ ।

ପଶ୍ଚିମବଙ୍ଗର ହାଇ ପ୍ରୋଫାଇଲ୍ ଭବାନୀପୁର ବିଧାନସଭା ଆସନରେ ଉପ-ନିର୍ବାଚନ ପାଇଁ ସେପ୍ଟେମ୍ବର ୩୦ରେ ମତଦାନ ହୋଇଥିଲା । ଆଜି ନିର୍ବାଚନ ଫଳାଫଳ ଉପରେ ସମସ୍ତଙ୍କ ନଜର ରହିଛି । ଭୋଟ୍ ଗଣିବା ପାଇଁ ନିର୍ବାଚନ ଆୟୋଗ ପ୍ରସ୍ତୁତି ଶେଷ କରିଛି । ରବିବାର ସକାଳ ୮ଟାରୁ ଭୋଟ୍ ଗଣନା ଆରମ୍ଭ ହେବ । ଏଥିପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ।

ନିର୍ବାଚନରେ ନିଜ ଭାଗ୍ୟ ପରୀକ୍ଷା କରୁଥିବା ରାଜ୍ୟର ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (TMC) ସୁପ୍ରିମୋ ମମତା ବାନାର୍ଜୀ (Mamata Banerjee) ଙ୍କ ପାଇଁ ଏହି ଉପ-ନିର୍ବାଚନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ତାଙ୍କୁ ମୁଖ୍ୟମନ୍ତ୍ରୀ ପଦରେ ରହିବାକୁ ହେଲେ ଏଠାରୁ ଜିତିବାକୁ ପଡ଼ିବ ।

ଟିଏମସି (TMC) ସହିତ ରାଜ୍ୟର ମୁଖ୍ୟ ବିରୋଧୀ ଭାରତୀୟ ଜନତା ପାର୍ଟି (BJP) ଏଠାରୁ ନିଜ ନିଜର ବିଜୟର ଦାବି କରୁଛି । ତୃଣମୂଳ କଂଗ୍ରେସ (TMC) ଦାବି କରିଛି ଯେ ମମତା ଏଠାରେ ୫୦ ହଜାର ଭୋଟରେ ଜିତିବେ । ଅନ୍ୟପକ୍ଷରେ ବିଜେପି ମଧ୍ୟ ଜିତିବାର ଦାବି କରୁଛି । ବିଜେପି ମମତାଙ୍କ ବିରୋଧରେ ପ୍ରିୟଙ୍କା ତିବ୍ରୁୱାଲ (Priyanka Tibrewal) ଙ୍କୁ ମୈଦାନକୁ ଓହ୍ଲାଇଛି । ବିଜେପିର ଜାତୀୟ ଉପାଧ୍ୟକ୍ଷ ତଥା ଦଳର ପୂର୍ବତନ ରାଜ୍ୟ ସଭାପତି ଦିଲୀପ ଘୋଷ କହିଛନ୍ତି ଯେ ଭବନାପୁରରେ ବିଜେପି ବହୁତ ଭଲ ଲଢେଇ କରିବ । ସେ ଦଳ ପାଇଁ ବିଜୟର ଆଶା ବ୍ୟକ୍ତ କରିଛନ୍ତି ।

ଯଦି ମମତା ବାନାର୍ଜୀ ହାରନ୍ତି ତେବେ କ'ଣ ହେବ?

ଏହି ସମୟରେ ବଙ୍ଗଳାର ରାଜନୈତିକ ଗଳିରେ ମଧ୍ୟ ଚର୍ଚ୍ଚା ହେଉଛି ଯେ ମମତା ବାନାର୍ଜୀ (Mamata Banerjee) ଭବାନୀପୁର ଉପ-ନିର୍ବାଚନରେ ​​ହାରିଗଲେ କ'ଣ ହେବ? ଏହାର କମ୍ ସମ୍ଭାବନା ରହିଛି ଯେ ମମତା ବାନାର୍ଜୀ ଉପ-ନିର୍ବାଚନରେ ​​ହାରିଥିବା ଇତିହାସର ତୃତୀୟ ମୁଖ୍ୟମନ୍ତ୍ରୀ ହୋଇପାରନ୍ତି ।

ନିୟମ ଅନୁଯାୟୀ, ସରକାର ଗଠନ ହେବାର ୬ ମାସ ମଧ୍ୟରେ ମମତା ବାନାର୍ଜୀଙ୍କୁ ଜଣେ ବିଧାୟକ ହେବାକୁ ପଡିବ । ସମ୍ବିଧାନର ଧାରା ୧୬୪ ଅନୁଯାୟୀ, ଜଣେ ମନ୍ତ୍ରୀ ଯିଏ ଲଗାତାର ୬ ମାସ ରାଜ୍ୟ ବିଧାନସଭାର ସଦସ୍ୟ ନୁହଁନ୍ତି, ସେହି ଅବଧି ଶେଷ ହେବାପରେ ସେ ମନ୍ତ୍ରୀ ପଦରେ ରହିପାରିବେ ନାହିଁ ।

ଏଭଳି ପରିସ୍ଥିତିରେ ଯଦି ମମତା ଉପ-ନିର୍ବାଚନରେ ​​ହାରନ୍ତି, ତେବେ ତାଙ୍କୁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ପଡିବ ଓ କ୍ଷମତାରେ ରହିବାକୁ TMC ବିଧାନସଭା ଦଳର ଜଣେ ନୂତନ ନେତା ବାଛିବାକୁ ପଡ଼ିବ । ଯଦି ଟିଏମସି ଅନ୍ୟ କାହାକୁ ବିଧାନସଭା ଦଳର ନେତା ଭାବରେ ମନୋନୀତ ନକରେ, ତେବେ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ ହୋଇପାରେ ।

ମମତା ବାନାର୍ଜୀ ଇତିହାସ ଦୋହରାଇବେ କି?

୧୯୭୦ରେ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତ୍ରିଭୁବନ ନାରାୟଣ ସିଂ ଉପ-ନିର୍ବାଚନରେ ​​ହାରି ଯାଇଥିଲେ ଓ ପରେ ତାଙ୍କୁ ଇସ୍ତଫା ଦେବାକୁ ପଡିଥିଲା । ଏହା ପରେ ୨୦୦୯ରେ ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନ୍ ମଧ୍ୟ ଉପ-ନିର୍ବାଚନରେ ​​ହାରି ଯାଇଥିଲେ । ସୋରେନଙ୍କ ପରାଜୟର ପରିଣାମ ସ୍ୱରୂପ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଇଥିଲା । ଏଭଳି ପରିସ୍ଥିତିରେ ପ୍ରଶ୍ନ ଉଠିଛି ଯେ ମମତା ବାନାର୍ଜୀ ତ୍ରିଭୁବନ ନାରାୟଣ ସିଂ କିମ୍ବା ଶିବୁ ସୋରେନଙ୍କ ପରି ଇତିହାସ ପୁନରାବୃତ୍ତି କରିବେ କି, ଯେଉଁମାନେ ମୁଖ୍ୟମନ୍ତ୍ରୀ ପଦରେ ରହି ଉପ-ନିର୍ବାଚନ ହାରିଯାଇଥିଲେ ?

ଶୁଭେନ୍ଦୁ ଅଧିକାରୀଙ୍କ ଠାରୁ ହାରି ଯାଇଥିଲେ ମମତା

୨୦୨୧ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ​​ମମତା ବାନାର୍ଜୀ ନନ୍ଦିଗ୍ରାମ ଆସନରୁ ବିଜେପିର ଶୁଭେନ୍ଦୁ ଅଧିକାରୀଙ୍କ ଠାରୁ ପରାଜିତ ହୋଇଥିଲେ, ଯାହାର ଫଳାଫଳକୁ କଲିକତା ହାଇକୋର୍ଟରେ ଚ୍ୟାଲେଞ୍ଜ କରାଯାଇଥିଲା । ମମତା ବାନାର୍ଜୀ ଦାବି କରିଛନ୍ତି ଯେ ତିନିଟି କାରଣରୁ ଅଧିକାରୀଙ୍କ ନିର୍ବାଚନକୁ ଶୂନ୍ୟ ଘୋଷଣା କରାଯାଉ -ଦୁର୍ନୀତିଗ୍ରସ୍ତ ଆଚରଣ, ଧର୍ମ ଆଧାରରେ ଭୋଟ୍ ମାଗିବା ଏବଂ ବୁଥ୍ ଦଖଲ ।

ଭବାନୀପୁରରେ ଅଧିକାଂଶ ଗୁଜୁରାଟୀ ଜନସଂଖ୍ୟା 

ଭବାନୀପୁରରେ ୭୦ ପ୍ରତିଶତରୁ ଅଧିକ ଅଣ-ବଙ୍ଗୀୟ ବାସ କରନ୍ତି ଓ ସେଠାରେ ଗୁଜୁରାଟର ଅଧିକାଂଶ ଲୋକ ଅଛନ୍ତି, ଯେଉଁମାନେ ମମତାଙ୍କୁ ସେମାନଙ୍କର ପ୍ରତିନିଧୀ ଭାବରେ ଗ୍ରହଣ କରନ୍ତି ନାହିଁ । ତେବେ ଏହା ପ୍ରଥମ ଥର ହେବ ନାହିଁ ଯେ ଗାଦିରେ ବସିଥିବା ସିଏମ୍ ନିର୍ବାଚନରେ ​​ହାରିଛନ୍ତି ଏବଂ ଦଳ ସରକାର ଗଠନ କରିଛନ୍ତି ।

ଯଦି ରାଜ୍ୟରେ ବିଧାନ ପରିଷଦ ଥାଆନ୍ତା ତେବେ ସହଜ ହୋଇଥାନ୍ତା ମମତାଙ୍କ ରାସ୍ତା 

ଯଦି ରାଜ୍ୟରେ ଏକ ବିଧାନ ପରିଷଦ ଥାଆନ୍ତା, ତେବେ ମମତା ସେହି ବିଧାନ ପରିଷଦର ସଦସ୍ୟ ଭାବରେ ନିର୍ବାଚିତ ହୋଇପାରିଥାନ୍ତେ । ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଓ ୟୁପି ମୁଖ୍ୟମନ୍ତ୍ରୀ ଆଦିତ୍ୟନାଥ ମଧ୍ୟ ଶପଥ ଗ୍ରହଣ କରିବା ସମୟରେ ଉଭୟ ଗୃହର ସଦସ୍ୟ ନଥିଲେ । ପରେ ଉଭୟ ବିଧାନ ପରିଷଦର ସଦସ୍ୟ ହୋଇଥିଲେ ।

କିନ୍ତୁ ପଶ୍ଚିମବଙ୍ଗରେ ବିଧାନ ପରିଷଦ ନାହିଁ, ଯେଉଁଥିପାଇଁ ମମତାଙ୍କ ପଥ କଷ୍ଟକର । ସେଥିପାଇଁ ଭବାନୀପୁର ଉପ-ନିର୍ବାଚନରେ ​​ଜିତିବା ତାଙ୍କ ପାଇଁ ଅଧିକ ଗୁରୁତ୍ୱପୂର୍ଣ୍ଣ । ସ୍ୱାଧୀନତା ପରେ ଜୁନ୍ ୫, ୧୯୫୨ରେ ବଙ୍ଗଳାରେ ୫୧ ସଦସ୍ୟ ବିଶିଷ୍ଟ ବିଧାନ ପରିଷଦ ଗଠନ କରାଯାଇଥିଲା । ଏହା ପରେ ଏହାକୁ ୨୧ ମାର୍ଚ୍ଚ ୧୯୬୯ରେ ରଦ୍ଦ କରାଯାଇଥିଲା । ଏଭଳି ପରିସ୍ଥିତିରେ ମୁଖ୍ୟମନ୍ତ୍ରୀ ପଦରେ ରହିବାକୁ ହେଲେ ୬ ମାସ ମଧ୍ୟରେ ଯେକୌଣସି ଆସନରୁ ବିଧାନସଭା ନିର୍ବାଚନରେ ​​ଜିତିବା ବାଧ୍ୟତାମୂଳକ ଅଟେ ।

ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତିରଥ ସିଂ ରାୱତଙ୍କ ସହ ସମାନ ସମସ୍ୟା ଘଟିଥିଲା । ରାଜ୍ୟରେ ବିଧାନସଭା ନିର୍ବାଚନ ହେବାକୁ ଏକ ବର୍ଷ ବାକି ଥିବାରୁ ଉପ-ନିର୍ବାଚନର ସମ୍ଭାବନା ବହୁତ କମ୍ ଥିଲା ଓ ରାଜ୍ୟରେ ବିଧାନ ପରିଷଦ ନ ଥିବାରୁ ତାଙ୍କୁ ଏଠାରୁ ନିର୍ବାଚିତ ହୋଇଆସିବାର କୌଣସି ବିକଳ୍ପ ନଥିଲା । ତେଣୁ ତାଙ୍କୁ ତାଙ୍କ ପଦରୁ ଇସ୍ତଫା ଦେବାକୁ ପଡିଥିଲା ।

ଏଠାରେ କହି ରଖୁଛୁ ଯେ ମମତା ବାନାର୍ଜୀଙ୍କ ପାଇଁ ଟିଏମସିର ବିଜେତା ପ୍ରାର୍ଥୀ ଶୋଭେନଦେବ ଚଟ୍ଟୋପାଧ୍ୟାୟ ଏହି ଆସନରୁ ଇସ୍ତଫା ଦେଇଥିଲେ ଯାହା ଦ୍ୱାରା ଏହି ଆସନରୁ ମୁଖ୍ୟମନ୍ତ୍ରୀ ସେପ୍ଟେମ୍ବର ୩୦ରେ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିପାରିବେ । ମେ ୨୧ରୁ ଏହି ଆସନ ଖାଲି ଅଛି ।