MCD Election 2022: ଆଜି ଦିଲ୍ଲୀବାସୀ ମିନି ସରକାର ବାଛିବେ। ସକାଳ ଆଠଟାରୁ ଦିଲ୍ଲୀରେ ମ୍ୟୁନିସିପାଲ କର୍ପୋରେସନ୍ ନିର୍ବାଚନ ମତଦାନ ଆରମ୍ଭ ହୋଇଛି। ଦିଲ୍ଲୀର ମୋଟ ୨୫୦ ୱାର୍ଡ ପାଇଁ ୧୩୪୯ ଜଣ ପ୍ରାର୍ଥୀ ଭାଗ୍ୟ ପରୀକ୍ଷା କରୁଛନ୍ତି। ପ୍ରାୟ ଦେଢ କୋଟି ଭୋଟର ଜାତୀୟ ରାଜଧାନୀରେ ମତାଧିକାର ସାବ୍ୟସ୍ତ କରି ନିଜ ମନପସନ୍ଦର ନେତା ବାଛିବେ। ବିଜେପି ପୁଣି ଥରେ କ୍ଷମତାକୁ ଫେରିବା ପାଇଁ ଦାବି କରୁଥିବାବେଳେ ଦିଲ୍ଲୀରେ ସରକାର ଚଳାଇଥିବା ଆମ୍ ଆଦମୀ ପାର୍ଟି ମଧ୍ୟ ପରିସ୍ଥିତିକୁ ଓଲଟାଇବାକୁ ଚେଷ୍ଟା କରୁଛି। 


COMMERCIAL BREAK
SCROLL TO CONTINUE READING

ଭୋଟ୍ ସମୟ


MCD ନିର୍ବାଚନ ପାଇଁ ମତଦାନ ସକାଳ ୮ଟାରୁ ଆରମ୍ଭ ହୋଇ ସନ୍ଧ୍ୟା ସାଢେ ପାଞ୍ଚଟା ପର୍ଯ୍ୟନ୍ତ ଚାଲିବ। ରାଜ୍ୟ ନିର୍ବାଚନ ଆୟୋଗର ତଥ୍ୟ ଅନୁଯାୟୀ, ଦିଲ୍ଲୀର ମୋଟ ଭୋଟରଙ୍କ ସଂଖ୍ୟା ୧,୪୫,୦୫,୩୫୮ ରହିଛି। ସେଥିମଧ୍ୟରୁ ୭୮,୯୩,୪୧୮ ପୁରୁଷ, ୬୬,୧୦,୮୭୯ ମହିଳା ଏବଂ ୧୦୬୧ ଟ୍ରାନ୍ସଜେଣ୍ଡର ଭୋଟର ଅଛନ୍ତି। ପ୍ରଥମ ଥର ପାଇଁ ଭୋଟ୍ ଦେଉଥିବା ଯୁବକଙ୍କ ସଂଖ୍ୟା ୯୫୪୫୮ ରହିଛି। ଦିଲ୍ଲୀର ନଗର ନିଗମ ହେଉଛି ବିଶ୍ୱର ସବୁଠାରୁ ବଡ ସଂସ୍ଥା। ନିର୍ବାଚନର ପରଦିନ ଏମସିଡିର ସମସ୍ତ ସ୍କୁଲ ବନ୍ଦ ରହିବ। ନିର୍ବାଚନ ଦିନ ଏମସିଡି ବିଦ୍ୟାଳୟର ଅଧିକାଂଶ କର୍ମଚାରୀ ଡ୍ୟୁଟିରେ ରହିବେ, ତେଣୁ ପରଦିନ ସେମାନଙ୍କୁ ଛୁଟି ଦିଆଯାଇଛି।


Also Read: MCD Election 2022: କେଜ୍ରିୱାଲଙ୍କ ରାଲିରେ ୧୨ ବିଧାୟକ, ୨୦ ପାରିଷଦଙ୍କ ମୋବାଇଲ ଗାଏବ୍


କେଉଁ ଦଳର କେତେ ପ୍ରାର୍ଥୀ?


ମୋଟ ୧୩୪୯ ଜଣ ପ୍ରାର୍ଥୀ ଏମସିଡି ନିର୍ବାଚନରେ ପ୍ରତିଦ୍ୱନ୍ଦିତା କରୁଛନ୍ତି। ବିଜେପି ଏବଂ ଆମ୍ ଆଦମୀ ପାର୍ଟି ସମସ୍ତ ୨୫୦ ୱାର୍ଡରେ ନିଜର ପ୍ରାର୍ଥୀ ଦେଇଛନ୍ତି। ଅନ୍ୟପକ୍ଷରେ କଂଗ୍ରେସ ୨୪୭​​ଟି ଆସନରେ ପ୍ରାର୍ଥୀ କରିଛି। ୩୮୨ ସ୍ୱାଧୀନ ପ୍ରାର୍ଥୀ ମଧ୍ୟ ଅଛନ୍ତି। ଜେଡିୟୁ ୨୩ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି। AIMEIM ମାତ୍ର ୧୫ ଜଣ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇଛି। ବିଏସପି ୧୪୭, ଇଣ୍ଡିଆନ୍ ମୁସଲିମ୍ ଲିଗ୍ ୧୨, କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ ୩, ଅଲ୍ ଇଣ୍ଡିଆ ଫରୱାର୍ଡ ବ୍ଲକ୍ ୪, ଏନସିପି ୨୯ ଏବଂ ଏସପି ଗୋଟିଏ ଆସନରେ ପ୍ରାର୍ଥୀ କରିଛନ୍ତି।


ବୁଥରେ ସୁରକ୍ଷା ବ୍ୟବସ୍ଥା କେମିତି ଅଛି?


ଏମସିଡି ନିର୍ବାଚନ ପାଇଁ ମୋଟ ୧୩, ୬୩୮ଟି ମତଦାନ କେନ୍ଦ୍ର ସ୍ଥାପନ କରାଯାଇଛି। ଏଥିରେ ସମୁଦାୟ ୫୬ ହଜାର ଇଭିଏମ୍ ବ୍ୟବହାର କରାଯାଉଛି। ଏମସିଡି ନିର୍ବାଚନରେ ​​ମଧ୍ୟ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା କରାଯାଇଛି। ନିର୍ବାଚନକୁ ଶାନ୍ତି ଶୃଙ୍ଖଳାର ସହ ଶେଷ କରିବା ପାଇଁ ୪୦ ହଜାର ସୈନିକ ଡ୍ୟୁଟିରେ ଉପସ୍ଥିତ ଅଛନ୍ତି। CAPF କର୍ମଚାରୀମାନେ ନିର୍ବାଚନରେ ​​ସୁରକ୍ଷା ବ୍ୟବସ୍ଥା ଦେଖୁଛନ୍ତି। ଏହା ସହିତ ୟୁପି ଏବଂ ରାଜସ୍ଥାନର ହୋମ ଗାର୍ଡଙ୍କୁ ମଧ୍ୟ ମୁତୟନ କରାଯାଇଛି। ରାଜସ୍ଥାନରୁ ତିନି ହଜାର ଓ ୟୁପିରୁ ୧୪ ହଜାର ସୁରକ୍ଷାକର୍ମୀ ଦିଲ୍ଲୀ ଆସିଛନ୍ତି। ଏଥି ସହିତ CAPF ଏବଂ SAPର ୧୦୮ଟି କମ୍ପାନୀ ଦିଲ୍ଲୀ ନିର୍ବାଚନ ଡ୍ୟୁଟିରେ ନିୟୋଜିତ ହୋଇଛନ୍ତି।


Also Read: Gujarat Election 2022: ସେହି ୧୦ ବିଧାନସଭା ଆସନ, ଯାହା ଉପରେ ରହିଛି ସବୁ ଦଳ ନଜର


ନିର୍ବାଚନ ସମୟରେ କଟକଣା-


ଏମସିଡି ନିର୍ବାଚନ ପାଇଁ ରବିବାର ଦିଲ୍ଲୀର ସମସ୍ତ ବଜାର ବନ୍ଦ ରହିବ। କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ ଏହା ଘୋଷଣା କରିଛି। ଏଥି ସହିତ ଶୁକ୍ରବାର ଠାରୁ ତିନି ଦିନ ପାଇଁ ଦିଲ୍ଲୀରେ ମଦ ବିକ୍ରି ବ୍ୟାନ କରାଯାଇଛି। ଡିସେମ୍ବର ୭ ଭୋଟ ଗଣତି ଦିନ ମଧ୍ୟ ଜାତୀୟ ରାଜଧାନୀରେ ଡ୍ରାଏ ଡେ ପାଳନ କରାଯିବ। ସେହିପରି ଏମସିଡି ନିର୍ବାଚନ ହେତୁ ମେଟ୍ରୋ ସମୟ ମଧ୍ୟ ପରିବର୍ତ୍ତନ କରାଯାଇଛି। ମେଟ୍ରୋ ସେବା ସକାଳ ୪ଟାରୁ ଆରମ୍ଭ ହୋଇଛି। ସକାଳ ୬ଟା ପରେ ସାଧାରଣ ଫ୍ରିକ୍ୱେନ୍ସି ସାଧାରଣ ଦିନ ପରି ଜାରି ରହିବ ବୋଲି ମେଟ୍ରୋ କର୍ତ୍ତୃପକ୍ଷ ସୂଚନା ଦେଇଛନ୍ତି।


MCDର ଇତିହାସ


୧୯୫୮ ମସିହାରେ ଦିଲ୍ଲୀର ମ୍ୟୁନିସିପାଲ କର୍ପୋରେସନ୍ ପ୍ରତିଷ୍ଠିତ ହୋଇଥିଲା । ୨୦୧୨ରେ ତତ୍କାଳୀନ ମୁଖ୍ୟମନ୍ତ୍ରୀ ଶୀଲା ଦୀକ୍ଷୀତଙ୍କ କାର୍ଯ୍ୟକାଳରେ ଏହାକୁ ତିନି ଭାଗ (ଉତ୍ତର, ଦକ୍ଷିଣ ଏବଂ ପୂର୍ବ ଦିଲ୍ଲୀ ମ୍ୟୁନିସିପାଲ କର୍ପୋରେସନ୍) ରେ ବିଭକ୍ତ କରାଯାଇଥିଲା। ତେବେ ଚଳିତ ବର୍ଷ ଏହି ତିନୋଟି ନିଗମକୁ ପୁଣି ମିଶ୍ରଣ କରାଯାଇଛି। ୨୦୧୭ MCD ନିର୍ବାଚନରେ ​​ବିଜେପି ମୋଟ ୨୭୦ ୱାର୍ଡ ମଧ୍ୟରୁ ୧୮୧ଟିରେ ଜିତିଥିଲା। ​​ଆମ୍ ଆଦମୀ ପାର୍ଟି ୪୮ ଏବଂ କଂଗ୍ରେସ ୨୭ଟି ୱାର୍ଡ ଜିତିଥିଲା। ୨୦୧୭ ରେ ୫୩ ପ୍ରତିଶତ ମତଦାନ ହୋଇଥିଲା।