Road Accident: ଏମିତିବି ଆସେ ମୃତ୍ୟୁ । କେହି କିଛି ଭାବିବା ପୂର୍ବରୁ ଓଲଟ ପାଲଟ ହୋଇଗଲା ସବୁ କିଛି। କ୍ଷଣିକ ମଧ୍ୟରେ ଚୁନା ହୋଇଗଲା ସବୁ ସ୍ବପ୍ନ। ଭୟଙ୍କର ସଡ଼କ ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ହୋଇଛି। ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।  ଏକ କାର ଦୁଇଟି ମଟର ସାଇକେଲ୍ କୁ ଧକ୍କା ଦେବାରୁ ୬ ଜଣ ଯୁବକ ପ୍ରାଣ ହରାଇଥିବା ପୋଲିସ୍ କହିଛି। ରାଜସ୍ଥାନର ଶ୍ରୀଗଙ୍ଗାନଗର ଜିଲ୍ଲାରେ ଏହି ଭୟଙ୍କର ଦୁର୍ଘଟଣା ଘଟିଛି। 

 



 

ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଦୁଇଟି ବାଇକ୍ ଯୋଗେ ୬ ଜଣ ଯୁବକ ଏକ ଧାର୍ମିକ କାର୍ଯ୍ୟକ୍ରମରେ ଯୋଗ ଦେଇ ଘରକୁ ଫେରୁଥିଲେ। ସୁରତଗଡ ଓ ଅନୁପଗଡ଼ ରାଜ୍ୟ ଜାତୀୟ ରାଜପଥରେ ୨ଟି ବାଇକରେ ୬ ଜଣ ଯୁବକ ଫେରୁଥିବା ବେଳେ ହଠାତ୍ ଏକ କାର ଆସି ବାଇକ୍ ୨ଟିକୁ ଧକ୍କା ଦେଇଥିଲା। ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ଘଟିଥିଲା । ଏହାଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ପୋଲିସ୍ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରି ମେଡିକାଲ ପଠାଇଥିଲା। ହେଲେ ଡାକ୍ତରଖାନାରେ ଆଉ ତିନି ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ। ତେବେ ମୃତକମାନେ, ତାରାଚାନ୍ଦ(୨୪),ମନୀଷ(୨୫) ,ସୁନୀଲ୍ କୁମାର (୨୦), ରାହୁଲ୍ (୨୦),ବଳରାମ୍(୨୧)  ଓ ଶୁଭ କରଣ(୨୧)। ତେବେ, ମୃତଦେହ ଗୁଡିକ ପୋଷ୍ଟମଟମ୍ ପରେ ପରିବାର ଲୋକଙ୍କୁ ହସ୍ତାନର କରାଯିବ ବୋଲି ପୋଲିସ୍ କହିଛି।