ମହାପ୍ରଭୁଙ୍କ ନୀତିରେ ବିଳମ୍ବ ହେବା ଗ୍ରହଣୀୟ ନୁହେଁ: ଅରବିନ୍ଦ ପାଢ଼ୀ
Jagannath temple Puri: ତେବେ ପୂଜାପଣ୍ଡା ଓ ବିମାନବଡୁ ସେବକଙ୍କ ମଧ୍ୟରେ ବିବାଦ ଯୋଗୁ ନୀତିକାନ୍ତି ବିଳମ୍ବ ହୋଇଥିବା ଜଣାପଡ଼ିଛି।
ପୁରୀ: ଶ୍ରୀମନ୍ଦିରରେ ଶ୍ରୀଜିଉଙ୍କ ନୀତି ବିଳମ୍ବକୁ ନେଇ ମୁହଁ ଖୋଲିଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ। ସେ କହିଛନ୍ତି, ଆଜି ମହାପ୍ରଭୁଙ୍କ ଚିତାଲାଗି ନୀତି ଥିବାରୁ କୌଣସି ବିଳମ୍ବ ଗ୍ରହଣୀୟ ନୁହେଁ। ଶୃଙ୍ଖଳିତ ନୀତିକାନ୍ତି ସମ୍ପାଦନ ପାଇଁ ଶ୍ରୀମନ୍ଦିର ପ୍ରଶାସନ ସମସ୍ତଙ୍କ ସହଯୋଗ କାମନା କରୁଛି ବୋଲି ଶ୍ରୀ ପାଢ଼ୀ କହିଛନ୍ତି।
ତେବେ ଆଜି ଶ୍ରୀମନ୍ଦିରରେ ଶ୍ରୀଜୀଉମାନଙ୍କ ନୀତି ବିଳମ୍ବ ହୋଇଛି। ସୂର୍ଯ୍ୟପୂଜା ୮ଟା ୨୫ରେ ହୋଇଥିବାବେଳେ ଦ୍ଵାରାପାଳ ପୂଜା ପାଇଁ ୩ ଘଣ୍ଟା ବିଳମ୍ବ ହୋଇଛି। ୧୧ଟା ୨୫ରେ ଦ୍ଵାରାପାଳ ପୂଜା ସମ୍ପନ୍ନ ହୋଇଥିଲା। ତେବେ ପୂଜାପଣ୍ଡା ଓ ବିମାନବଡୁ ସେବକଙ୍କ ମଧ୍ୟରେ ବିବାଦ ଯୋଗୁ ନୀତିକାନ୍ତି ବିଳମ୍ବ ହୋଇଥିବା ଜଣାପଡ଼ିଛି। ଅପରପକ୍ଷେ ଶ୍ରାବଣ ମାସ ପାଇଁ ଭକ୍ତଙ୍କ ପ୍ରବଳ ଭିଡ଼ ହୋଇଥିବାବେଳେ ବିଳମ୍ବ ଓ ଦର୍ଶନ ବନ୍ଦ ଯୋଗୁ ଭକ୍ତ ଗୁଳୁଗୁଳିରେ ହନ୍ତସନ୍ତ ହୋଇ ଅସନ୍ତୋଷ ବ୍ୟକ୍ତ କରିଛନ୍ତି। ଏଥିସହ ବିଶୃଙ୍ଖଳିତ ସେବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଭକ୍ତ।
ତେବେ ଜୟ ବିଜୟ ଦ୍ଵାର ନିକଟକୁ ଜଣେ ବିମାନ ବଡୁ ଚାଲିଯିବାରୁ ମହାସ୍ନାନ ପାଇଁ ଜିଦ୍ ଧରିଥିଲେ ପୂଜାପଣ୍ଡା। ଏହାକୁ ନେଇ ବିବାଦ ହୋଇଥିଲା। ଦିନ ୮ଟା ୨୫ରୁ ୧୧ଟା ୨୫ ଯାଏଁ ଅଟକି ରହିଥିଲା ଠାକୁରଙ୍କ ନୀତିକାନ୍ତି। ଆଲୋଚନା ପରେ ବିବାଦର ସମାଧାନ ହୋଇଥିଲା। ତିନି ଘଣ୍ଟା ବିଳମ୍ବରେ ଦ୍ଵାରପାଳ ପୂଜା ଏବଂ ଗୋପାଳ ବଲ୍ଲଭ ନୀତି ସମ୍ପନ୍ନ ହୋଇଥିଲା।
ଅନ୍ୟପଟେ ଆସନ୍ତାକାଲି ସୋମବାର ଶ୍ରାବଣ ଶୁକ୍ଲ ପ୍ରତିପଦ ତିଥିରେ ଶ୍ରୀବିଗ୍ରହମାନଙ୍କ ଖସାପଡ଼ା ନୀତି ଅନୁଷ୍ଠିତ ହେବ। ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବା ପରେ ଆପାତତଃ ଅପରାହ୍ନ ୫ଟାଠାରୁ ରାତ୍ର ୯ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ।