Odisha News: ଆନ୍ତର୍ଜାତୀୟ ବଜାରରେ ବଢୁଛି ମିଶନ୍ ଶକ୍ତି ମହିଳାଙ୍କ ହାତ ତିଆରି ସାମଗ୍ରୀର ଚାହିଦା

Odisha News: କେନ୍ଦୁଝରର ମିଶନ୍ ଶକ୍ତି ମହିଳାଙ୍କ (Mission Shakti)ଦ୍ଵାରା ତିଆରି ବିଭିନ୍ନ ସାମଗ୍ରୀ ଏବେ ରାଜ୍ୟ ବାହାର ତଥା ଆନ୍ତର୍ଜାତୀୟ ବଜାରରେ ଉପଲବ୍ଧ ହେବ । ଏନେଇ ଉଦ୍ୟମ ଆରମ୍ଭ ହୋଇଥିବା କହିଛନ୍ତି ମିଶନ୍ ଶକ୍ତି ବିଭାଗର ଉପଦେଷ୍ଟା ଲୋପାମୁଦ୍ରା ବକ୍ସିପାତ୍ର । ଏହି ବିଭାଗରେ ୭୦ ଲକ୍ଷରୁ ଉର୍ଦ୍ଧ ମହିଳା ସାମିଲ୍ ହୋଇଥିବା ବେଳେ, ଏଥିରେ ୬ଲକ୍ଷରୁ ଉର୍ଦ୍ଧ ସ୍ୱୟଂ ସହାୟିକା ଗୋଷ୍ଠୀ ଯୋଗ ଦେଇଥିବା ସେ କହିଛନ୍ତି । 

ଏଥି ମଧ୍ୟରୁ କେନ୍ଦୁଝର ସଦର ବ୍ଲକ ତଥା ସହରାଞ୍ଚଳରେ ମିଶନ୍ ଶକ୍ତି ବିଭାଗରେ ସାମିଲ୍ ହୋଇଥିବା ୩୦ ହଜାର ମହିଳା କିଭଳି ଭାବେ ୨୨ଟି ବିଭାଗ ସହିତ ସମନ୍ଵୟ ରକ୍ଷା କରି ସମସ୍ତ ଯୋଜନାର ଲାଭ ପାଇବେ। ସେ-ନେଇ କେନ୍ଦୁଝରରେ ମହିଳାମାନଙ୍କ ସହିତ ଆଲୋଚନା କରିଛନ୍ତି ଲୋପାମୁଦ୍ରା ବକ୍ସିପାତ୍ର । ଭାରତର ଏକମାତ୍ର ରାଜ୍ୟ ଭାବେ ଓଡ଼ିଶାରେ ମହିଳାମାନଙ୍କ ସଶକ୍ତିକରଣ ପାଇଁ ଗଠିତ ହୋଇଛି ମିଶନ୍ ଶକ୍ତି ବିଭାଗ। 

ଉପସ୍ଥିତ ମହିଳା ମହାସଂଘମାନଙ୍କ ମଧ୍ୟରେ ସମନ୍ଵୟ ରକ୍ଷା ସହିତ, ସହଭାଗୀତା କିପରି ବଢ଼ିବ ଓ ସେମାନେ SHG ରୁ କିଭଳି SMEରେ ପରିଣତ ହେବେ, ସେନେଇ ମିଶନ୍ ଶକ୍ତି ଉଦଦେଷ୍ଟା ସେମାନଙ୍କୁ ଗୁରୁମନ୍ତ୍ର ପ୍ରଦାନ କରିଥିଲେ । କେନ୍ଦୁଝର ଜିଲ୍ଲାରେ ମହିଳା ସ୍ୱୟଂ ସହାୟିକା ଗୋଷ୍ଠୀମାନଙ୍କ ଦ୍ଵାରା ଉତ୍ପାଦିତ ବିଭିନ୍ନ ସାମଗ୍ରୀ, ଉଦାହରଣ ସ୍ୱରୂପ ଫୁଲବଡ଼ି, ଆନ୍ତର୍ଜାତୀୟ ବଜାରରେ କିଭଳି ବିକ୍ରୀ ହୋଇପାରିବ, ସେନେଇ ଉଦ୍ୟମ ହେଉଥିବା ସେ କହିଥିଲେ । ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଥିବା ମିଲେଟ୍ କାଫେରେ ମହିଳାଙ୍କ ଦ୍ଵାରା ମାଣ୍ଡିଆରେ ପ୍ରସ୍ତୁତ ବିଭିନ୍ନ ସ୍ଵାଦିଷ୍ଟ ବ୍ୟଞ୍ଜନ ଖାଇ ସେ ଏସବୁର ପ୍ରଶଂସା କରିଥିଲେ ।