ପ୍ରେମୀଯୁଗଳ ପରସ୍ପରକୁ ଚୁମ୍ବନ ଓ ଆଲିଙ୍ଗନ କରିବା ସ୍ୱାଭାବିକ, ଅପରାଧ ନୁଁହ: Madras High Court
Madras High Court: ମାଡ୍ରାସ ହାଇକୋର୍ଟ କହିଛନ୍ତି ଯେ ଯୁବାବସ୍ଥାରେ ପ୍ରେମ ସମ୍ପର୍କରେ ଥିବା ଦୁଇ ଜଣଙ୍କ ମଧ୍ୟରେ ଆଲିଙ୍ଗନ କିମ୍ବା ଚୁମ୍ବନ କରିବା ସ୍ୱାଭାବିକ। କୌଣସି ପ୍ରକାରେ ଏହା ଆଇପିସିର ଧାରା 354-A (1) (i) ଅନୁଯାୟୀ ଅପରାଧ ହୋଇପାରିବ ନାହିଁ।
Madras High Court: ପ୍ରେମୀଯୁଗଳଙ୍କ ମଧ୍ୟରେ ଆଲିଙ୍ଗନ ଏବଂ ଚୁମ୍ବନ ସ୍ୱାଭାବିକ। ଏହାକୁ ଅପରାଧ ବୋଲି ବିବେଚନା କରାଯାଇପାରିବ ନାହିଁ। ଏକ ଆବେଦନ ଶୁଣାଣି କରିବା ବେଳେ ମାଡ୍ରାସ ହାଇକୋର୍ଟ ଏହା କହିଛନ୍ତି। ଅଭିଯୁକ୍ତ ଯୁବକଙ୍କୁ ଆଶ୍ୱସ୍ତି ଦେଇ କୋର୍ଟ ଭାରତୀୟ ଦଣ୍ଡବିଧି ଆଇନର ଧାରା 354A ଅନୁଯାୟୀ ଅପରାଧିକ ମାମଲା ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।
ଲାଇଭ ଲ ରିପୋର୍ଟ ଅନୁଯାୟୀ ଜଷ୍ଟିସ ଆନନ୍ଦ ଭେଙ୍କଟେଶ ଏହି ପିଟିସନର ଶୁଣାଣି କରୁଥିଲେ। ଅଦାଲତ କହିଛନ୍ତି ଯେ ଧାରା 354A ଅନୁଯାୟୀ ଅପରାଧ ହେବା ପାଇଁ ଉକ୍ତ ବ୍ୟକ୍ତିଙ୍କ ଶାରୀରିକ ସମ୍ପର୍କ ରହିବା ଆବଶ୍ୟକ। ଏଥିରେ ଯୈନ କାର୍ଯ୍ୟକଳାପ ଅନ୍ତର୍ଭୁକ୍ତ। ଦୁଇ କିଶୋରଙ୍କ ମଧ୍ୟରେ ପ୍ରେମ ସଂପର୍କରେ ପ୍ରେମିକ ଏବଂ ପ୍ରେମିକା ପରସ୍ପରକୁ ଆଲିଙ୍ଗନ କରିବା ଏବଂ ଚୁମ୍ବନ ଦେବା ସ୍ୱାଭାବିକ। ଏହି ଧାରା ଅଧୀନରେ ଏହା କୌଣସି ପ୍ରକାରେ ଅପରାଧ ନୁହେଁ। ଏହା ଯୌନ ଉତ୍ପୀଡ଼ନ ନୁହେଁ।
ଜାଣନ୍ତୁ ପୂରା ମାମଲା
ଅଭିଯୁକ୍ତ ଯୁବକ ସନ୍ଥନଗଣେଶଙ୍କ ପକ୍ଷରୁ ଏହି ପିଟିସନ ଦାଖଲ କରାଯାଇଥିଲା। ଏଥିରେ ସେ କହିଥିଲେ ଯେ ପୋଲିସ ଷ୍ଟେସନ ଦ୍ୱାରା ତାଙ୍କ ବିରୋଧରେ ଦାଖଲ ହୋଇଥିବା ଏଫଆଇଆର ରଦ୍ଦ କରାଯାଉ। ତାଙ୍କ ବିରୋଧରେ ଅଭିଯୋଗ ହେଉଛି ଯେ ଅଭିଯୋଗକାରୀଙ୍କ ସହ ତାଙ୍କର ଦୁଇ ବର୍ଷ ପ୍ରେମ ସମ୍ପର୍କ ଥିଲା। ୧୩ ନଭେମ୍ବର ୨୦୨୨ ରେ, ସେ ଅଭିଯୋଗକାରୀଙ୍କୁ ଏକ ସ୍ଥାନକୁ ଡାକିଥିଲେ। ଦୁହେଁ କଥାବାର୍ତ୍ତା କରୁଥିବାବେଳେ ଯୁବକ ଜଣକ ଝିଅକୁ ଆଲିଙ୍ଗନ କରି ଚୁମ୍ବନ ଦେଇଥିଲେ।
ଅଭିଯୋଗକାରୀଙ୍କ ଅନୁଯାୟୀ, ଯେତେବେଳେ ସେ ଅଭିଯୁକ୍ତ ଯୁବକଙ୍କୁ ବିବାହ କରିବାକୁ କହିଥିଲେ ସେତେବେଳେ ସେ ଦୂରତା ବଜାୟ ରଖିବା ଆରମ୍ଭ କରିଥିଲେ। ଏହା ପରେ ପୀଡିତା ତାଙ୍କ ବିରୋଧରେ ପୋଲିସ ଷ୍ଟେସନରେ ଅଭିଯୋଗ କରିଥିଲେ। ଫଳସ୍ୱରୂପ, ଏହି FIR ପଞ୍ଜିକୃତ ହୋଇଥିଲା। କୋର୍ଟ କହିଛନ୍ତି ଯେ ଆବେଦନକାରୀ ଯୁବକଙ୍କ ବିରୋଧରେ କୌଣସି ଅପରାଧିକ ମାମଲା ଦାୟର ହୋଇପାରିବ ନାହିଁ।