ഇന്ത്യൻ വാഹന മാർക്കറ്റിൽ കാര്യമായ ചലനമുണ്ടാക്കാൻ കഴിയാത്ത സിട്രോൺ കൂപ്പെ എസ്യുവി സെഗ്മെൻ്റിൽ ഒരു കൈ നോക്കാൻ ഇറങ്ങുകയാണ്. ഓഗസ്റ്റ് 2ന് വാഹനം വിപണിയിലെത്തിക്കാനാണ് കമ്പനി ശ്രമിക്കുന്നത്.
വില പ്രഖ്യാപിച്ചിട്ടില്ലെങ്കിലും രൂപം വെളിപ്പെടുത്തുകയാണ് സിട്രോൺ ഇപ്പോൾ ചെയ്തിരിക്കുന്നത്. കൺസെപ്റ്റ് പതിപ്പിന് സമാനമായ രൂപം തന്നെയാണ് പ്രൊഡക്ഷൻ മോഡലിലും സമ്മാനിച്ചിരിക്കുന്നത്.
മുൻവശത്ത് സിട്രൺ ലോഗോയുള്ള ടൂ സ്ലാറ്റ് ഗ്രിൽ, എൽഇഡി പ്രൊജക്ടർ ഹെഡ്ലാംപ് എന്നിവ ലഭിക്കുന്നു. മുകളിൽ നിന്നും വശങ്ങളിലേക്ക് ചരിഞ്ഞിറങ്ങുന്ന റൂഫ് ലൈൻ വാഹനത്തിന്റെ കൂപ്പെ ഡിസൈനെ കൂടുതൽ മനോഹരമാക്കിയിരിക്കുന്നു.
6-സ്പീഡ് മാനുവൽ, ടോർക്ക് കൺവെർട്ടർ ഓട്ടോമാറ്റിക് ഗിയർബോക്സ് ഓപ്ഷനുകളുള്ള 110 ബിഎച്ച്പി, 1.2 ലീറ്റർ 3 സിലിണ്ടർ ടർബോ പെട്രോൾ എൻജിനായിരിക്കും ബസാൾട്ടിന്റെ കരുത്ത്.
വയർലെസ് കണക്ടിവിറ്റി പിന്തുണയ്ക്കുന്ന 10.2 ഇഞ്ച് ടച്ച്സ്ക്രീൻ ഇൻഫോടെയ്ൻമെൻ്റ് സിസ്റ്റം, ഓട്ടോമാറ്റിക് ക്ലൈമറ്റ് കണ്ട്രോൾ, ഹിൽ ഹോൾഡ് അസിസ്റ്റ്, ഇഎസ്പി, ടയർ പ്രഷർ മോണിറ്ററിംഗ് സിസ്റ്റം തുടങ്ങി നിരവധി ഫീച്ചറുകളും ബസാൾട്ട് വാഗ്ദാനം ചെയ്യുന്നു.
ഉടൻ പുറത്തിറങ്ങാനിരിക്കുന്ന ടാറ്റയുടെ കൂപ്പെ എസ്യുവി ടാറ്റ കർവ് തന്നെയാണ് ബസാൾട്ടിൻ്റെ മുഖ്യ എതിരാളി. ഹ്യുണ്ടായ് ക്രെറ്റ, ഹോണ്ട എലിവേറ്റ്, മാരുതി ഗ്രാൻഡ് വിറ്റാര, കിയ സെൽറ്റോസ്, സ്കോഡ കുഷാക്ക് തുടങ്ങിയവയായും ബസാൾട്ട് ഏറ്റുമുട്ടേണ്ടി വരും.
ബസാൾട്ടിൻ്റെ വിലയെ പറ്റി സിട്രോൺ ഒന്നും പുറത്തുവിട്ടിട്ടില്ലെങ്കിലും 12 മുതൽ 15 ലക്ഷം രൂപയ്ക്ക് സി 3 എയർക്രോസിൻ്റെ മുകളിലായിരിക്കും ബസാൾട്ടിന്റെ സ്ഥാനം.